Doasdörp

Vun Wikipedia
Zur Navigation springen Zur Suche springen
Wapen/Flagg Koort

Wapen vun Doasdörp

Doasdörp
Laag vun Doasdörp in Düütschland
Basisdaten
Bundsland: Neddersassen
Landkreis: Horborg
Gemeen: Vosshusen
Inwahners:
Postleettall: 21629
Vörwahl: 040
Geograafsche Laag:
Koordinaten:53° 26′ N, 9° 48′ O
53° 26′ N, 9° 48′ O

Hauptstraat in Doasdörp

Doasdörp (hoochdüütsch Daerstorf) is en Dörp in de Gemeen Vosshusen in’n Landkreis Horborg, Neddersassen. Binnen de Gemeen höört de Oort to de Oortschop Vosshusen.

Geografie[ännern | Bornkood ännern]

De Oort liggt op de Geest un an’n Westrand von de Horbörger Bargen mit den Staatsforst Rosengoorn.

De Naveröörd sünd Vosshusen un Wulmsdörp in’n Noorden, de Fischbeker Heid un Fischbeek un Neegraven in’n Noordoosten, Tempelbarg in’n Oosten, Rosengoorn, Sieversen un Langenrehm in’n Süüdoosten, Swiersdörp, Ilsdörp un Arsdörp in’n Süüdwesten un Ketzendörp un Öbergünn in’n Noordwesten.

Historie[ännern | Bornkood ännern]

Bild, dat de brietsche Soldaat Edward Ardizzone tekent hett, as sien Eenheit 1945 Doasdörp innahmen hett

To de öllsten Teken von Minschen in dat Rebeed von dat hüdige Doasdörp tellt dat Grootsteengraff Doasdörp ut de Jungsteentied.

Doasdörp kummt an’n 20. Juni 1295 as Dardestorpe toeerst in en Oorkunn von dat Klooster Hilmssen vör, in de de Bischop Konrad de Propstie St. Andreä in Hilmssen ünner annern de Afgaven in Doasdörp mit een Hoff överlett.

In’n Eersten Weltkrieg sünd dree Soldaten ut Doasdörp fullen oder vermisst.[1]

Doasdörp is kort vör Enn von’n Tweten Weltkrieg an’n 20. April 1945 von de Briten („A Company“ von de Infanterieeenheit „1st Rifle Brigade“ un de „8th King’s Royal Irish Hussars“) innahmen worrn.[2]

Fröher hett to Doasdörp ok en Deel von den Anbo Vosshusen tohöört. Dat weer en lüttje Enklaav in dat Moor, dat in dat Siedland von Oolland hen na de Geest liggt. Dör düt Rebeed is 1881 de Nedderelvbahn boot worrn, de 1905 ok en lütten Bahnhoff kregen hett. Disse Bahnhoff harr bet 1970 den Naam Doasdörp. Vondaag heet he Bahnhoff Vosshusen.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Mesborg in’n Kanton Buxthu höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett eerst to de Vaagdie Ilsdörp un vör 1859 toletzt to de Huusvaagdie Mesborg von dat Amt Mesborg tohöört. Von 1859 bet 1885 weer dat in dat Amt Töst un denn 1885 bet 1932 in’n Kreis Horborg. 1932 is dat Deel von’n ne’en un grötteren Kreis Horborg worrn.

An’n 1. Januar 1970 is de Gemeen Doasdörp Deel von de Gemeen Vosshusen worrn, de an’n 1. Juli 1972 mit de Gemeenreform in Neddersassen denn noch wedder grötter worrn is.

Inwahnertall[ännern | Bornkood ännern]

Johr Inwahners
1791-00-00 1791[3] 9 Füürsteden
1812-00-00 1812[4] 101
1824-00-00 1824[5] 15 Füürsteden
1848-00-00 1848[6] 126 Lüüd. 15 Hüüs
1871-12-011. Dezember 1871[7] 124 Lüüd. 19 Hüüs
1910-12-011. Dezember 1910[8] 132
1925-00-00 1925[9] 153
1933-00-00 1933[9] 132
1939-00-00 1939[9] 144

Religion[ännern | Bornkood ännern]

Doasdörp is evangeelsch-luthersch präägt un höört to dat Kaspel von de Nicolai-Kark in Ilsdörp.

För de Kathoolschen is de Marien-Kark in Buxthu tostännig.

Wapen[ännern | Bornkood ännern]

Dat Wapen von Doasdörp wiest op grönen Grund en sülvern Ploog. Dat Schildhöövd billt en Feld, dat baven vörn swart, baven achtern gollen, ünnen vörn gollen un ünnen achtern swart is. Dat Feld in’n Schildfoot is in fiev ümschichtig gollen un swarte Striepen deelt, von de de beiden ganz buten gollen sünd.

Kultur[ännern | Bornkood ännern]

En Denkmaal för de Fullenen ut de twee Weltkrieg’ steiht in Ilsdörp bi de Kark.

Weertschop un Infrastruktur[ännern | Bornkood ännern]

De Plichtfüürwehr von 1902 in Doasdörp hett sik 1935 mit de Plichtfüürwehr in Wulmsdörp tohoopdann un denn en freewillige Füürwehr billt.

Verkehr[ännern | Bornkood ännern]

Dör Doasdörp löppt de Landsstraat 235, de in’n Noorden in Vosshusen an de Bundsstraat 73 ran geiht un in’n Süüdwesten in Ilsdörp an de Bundsstraat 3 ran. De B 73 löppt von Vosshusen in’n Oosten över Fischbeek, Neegraven un Huusbrook na Horborg un de B 3 in’n Süden dör Raad un Mienenbüddel, an Bookholt un Snevern langs un op Soltau to. In’n Noordwesten loopt de B 73 un de B 3 in Öbergünn tohoop un de B 73 geiht denn wieder na Buxthu un na Stood.

De nächste Autobahn is de Autobahn 1. De Opfohrt 44 Raad liggt so acht Kilometer in’n Süden von Doasdörp an de B 3.

De nächste Bahnhoff is so bi ölven Kilometer wied weg in’n Noordwesten de Bahnhoff Buxthu an de Nedderelvbahn, aver de S-Bahnhoff von de S-Bahn Hamborg (S3/S31) in Vosshusen liggt man veer Kilometer wied weg in’n Noorden.

Footnoten[ännern | Bornkood ännern]

  1. http://www.denkmalprojekt.org/dkm_deutschland/elstorf.htm
  2. Över dat Kriegsenn in Ilsdörp un ümto (PDF; 1,7 MB; hoochdüütsch)
  3. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 51
  4. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 58
  5. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 120
  6. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 99
  7. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 131
  8. Inwahnertallen op gemeindeverzeichnis.de
  9. a b c Inwahnertallen op verwaltungsgeschichte.de

Weblenken[ännern | Bornkood ännern]

Commons-logo.svg Doasdörp. Mehr Biller, Videos oder Audiodateien to’t Thema gifft dat bi Wikimedia Commons.