Mairie Hullnst

De Mairie Hullnst weer in de Franzosentied (1810 bet 1813) een von de dree Mairien, in de de Kanton Töst indeelt weer. De Seet weer in Hullnst. Se harr 1508 Inwahners.

Historie

De Ümgegend von Hullnst hett vör de Franzosentied to de Vaagdie Hullnst von dat Amt Mesborg in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Hullnst een von de 15 Mairien in’n Kanton Mesborg von’n Distrikt Horborg, Departement von de Nedderelv. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Hullnst weer nu een von de dree Mairien in’n Kanton Töst, Distrikt Horborg, Departement von de Nedderelv. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de söss Mairien Hullnst, Dierstörp, Rahmstörp, Eversen, Raad un Holtörp (all söss in’n Kanton Mesborg) höört harrn. Von de Mairie Eversen is blots de Oort Ömbüddel an de Mairie Hullnst kamen, de Rest is in de Mairie Mesborg wesselt.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Hullnst

• Kaiserriek Frankriek:

  Hullnst (318 Inwahners), Wennerstörp, Klauenborg (79), Rahmstörp, Emm (114), Wosbossel, Starsbeek (84), Resbossel (90), Ömbüddel (55), Raad (81), Mienenbüddel (48), Olendörp, Winzendörp (140), Dierstörp, Dreest (195), Holtörp (89), Holv (67), Hassbossel (148)

Vondaag sünd düsse Öörd Deel von de Samtgemeen Hullnst un de Gemeen Vosshusen.