Glüsen (Gemeen Töst)

Vun Wikipedia
Zur Navigation springen Zur Suche springen
Wapen/Flagg Koort

Wapen vun Glüsen

Glüsen
Laag vun Glüsen in Düütschland
Basisdaten
Bundsland: Neddersassen
Landkreis: Horborg
Samtgemeen: Töst
Gemeen: Töst
Inwahners:
Postleettall: 21255
Vörwahl: 04182
Geograafsche Laag:
Koordinaten:53° 17′ N, 9° 44′ O
53° 17′ N, 9° 44′ O

Glüsen (hoochdüütsch Todtglüsingen) is en Dörp in de Gemeen Töst (Samtgemeen Töst) in’n Landkreis Horborg, Neddersassen. To Glüsen hebbt polietsch von öllers ok de Öörd Langeloh un Neddernhoff tohöört.

Geografie[ännern | Bornkood ännern]

An Glüsen langs flütt de Glüser Beek, de denn in’n Noordoosten von’n Oort in de Eest münnt.

De Naveröörd sünd Boitschen in’n Noorden, Kakenstörp in’n Noordoosten, Neddernhoff un Lohbargen in’n Oosten, Langeloh, Hökel, Hinkenbossel un Kamp mit Kamperlien in’n Süüdoosten, Otter, Knick un Schillingsbossel in’n Süden, Töst in’n Westen un Wüstenhöben un Duhrn in’n Noordwesten.

Historie[ännern | Bornkood ännern]

Schievenfibel von Glüsen

Glüsen keem an’n 11. November 1105 as Glusinge toeerst in de Oorkunnen vör, nadem Graaf Dierk III. von Katelnborg von sien Vader Land in dat Dörp arvt harr un bi dat Stiften von dat Klooster Katelnborg dissen Besitt dat Klooster mitgeven hett.

In’n Eersten Weltkrieg sünd 21 Soldaten ut Glüsen fullen oder vermisst un in’n Tweten Weltkrieg 48.[1]

In’n Oktober 1940 is dat Marientorpedolager Glüsen anleggt worrn.[2] Dat leeg in de Schaapheid in’n Noorden von de hüdige B 75 bi Glüsen. Op en Rebeed von 75 Hektar sünd dor 30 bet 50 Bunkers boot worrn, in de Torpedos inlagert worrn sünd, mit de se Scheep in Hamborg utrüst hebbt.[2] Dat Lager weer an dat Enn von dat Johr 1941 trech un is bet an’t Enn von’n Krieg bedreven worrn, as an’n 18. April 1945 brietsche Truppen dat Rebeed innahmen hebbt.[2]

De Briten hebbt in de eerste Tied in dat Lager Kriegsfungene ünnerbrocht.[2] Von 1945 bet 1948 hebbt se dat as Lager för Kraftstoff bruukt.[2] 1948/1949 hebbt de Briten de Bunkers sprengt un dat Gelänn an de Düütschen trügggeven.[2] Na disse Tied is dat Gelänn wedder för de Bueree bruukt worrn.[2]

2012 is in Glüsen en Schievenfibel funnen worrn, de den sülven Typ hett as de Schievenfibel von Maschen.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Töst in’n Kanton Töst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Vaagdie Töst in dat Amt Horborg tohöört. 1852 is de Vaagdie Töst in dat Amt Mesborg wesselt, dat 1859 denn in dat Amt Töst ümwannelt worrn is. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

De Oort is an’n 1. Juli 1972 mit de Gemeenreform in Neddersassen Deel von de Gemeen Töst worrn.

De Oort Hinkenbossel hett bet in dat 19. Johrhunnert to Glüsen tellt, is denn aver in de Gemeen Kamp wesselt.

Inwahnertall[ännern | Bornkood ännern]

Johr Inwahners
1793-00-001793[3] 18 Füürsteden
1812-00-001812[4] 202
1824-00-001824[5] 27 Füürsteden
1848-00-001848[6] 271 Lüüd. 34 Hüüs
1871-12-011. Dezember 1871[7] 322 Lüüd. 48 Hüüs
1910-12-011. Dezember 1910[8] 652
1925-00-001925[9] 707
1933-00-001933[9] 740
1939-00-001939[9] 780

Religion[ännern | Bornkood ännern]

Glüsen is evangeelsch-luthersch präägt un höört to dat Kaspel von de Johannes-de-Döper-Kark in Töst.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Kultur[ännern | Bornkood ännern]

In Glüsen steiht en Denkmaal för de Fullenen ut de twee Weltkrieg’.

Verenen[ännern | Bornkood ännern]

Glüsen hett en Schüttenvereen, de 1949 grünnt worrn is, un en Sportvereen, de 1930 grünnt worrn is.

Weertschop un Infrastruktur[ännern | Bornkood ännern]

Glüsen hett en egene freewillige Füürwehr, de an’n 30. Juli 1905 grünnt worrn is. Vörher hett dat en Plichtfüürwehr geven.

Verkehr[ännern | Bornkood ännern]

Dör Glüsen löppt de Kreisstraat 57, de in’n Westen in Töst an de Bundsstraat 75 ran geiht un in’n Oosten över Neddernhoff na Lohbargen an de B 3. De B 3 löppt in’n Süden na Snevern un Soltau to un in’n Noorden bi Bookholt an de B 75 ran un bi Buxthu an de B 73 ran. De B 75 löppt in’n Süüdwesten över Töst na Lauenbrüch, Scheeßl un Rodenborg un in’n Noordoosten över Kakenstörp an Bookholt langs na Ninndörp. En lüttjere Straat löppt in’n Süden na Knick an de Landsstraat 141.

De nächste Autobahn is de Autobahn 1. De Opfohrt 45 Hullnst liggt so teihn Kilometer in’n Noorden von Glüsen.

De nächste Bahnhoff is en beten mehr as een Kilometer wied weg in’n Süüdwesten de Bahnhoff Töst an de Bahnlien Hamborg–Bremen.

Scholen[ännern | Bornkood ännern]

De Kinner gaht na de Grundschool Glüsen op School. Na de Grundschool gaht de Kinner normalerwies in Töst na School, op de Hauptschool Töst, de Realschool Töst oder dat Gymnasium Töst.

Lüüd[ännern | Bornkood ännern]

De Zooloog Werner Peters is 1929 in Glüsen boren un de Speelbaas Rolf Meyer is dor 1963 doodbleven.

Literatur[ännern | Bornkood ännern]

  • Festschrift - Todtglüsingen feiert seine Geburtstage: 900 Jahre Todtglüsingen, 100 Jahre Todtglüsinger Feuerwehr, 75 Jahre Todtglüsinger Sportverein. 2005

Footnoten[ännern | Bornkood ännern]

  1. http://www.denkmalprojekt.org/dkm_deutschland/todtgluesingen_wk1u2_ns.htm
  2. a b c d e f g Das Marinetorpedolager Todtglüsingen op relikte.com
  3. Christoph B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 229: https://books.google.de/books?id=jN5QAAAAcAAJ&pg=PA229
  4. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 61: http://books.google.de/books?id=Q 5OAAAAcAAJ&pg=PA61
  5. C. H. Jansen: Statistisches Handbuch des Königreichs Hannover. 1824, Sied 602: http://books.google.de/books?id=tG0AAAAAcAAJ&pg=PA602
  6. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 93: http://books.google.de/books?id=eOI-AAAAcAAJ&pg=PA93
  7. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 132: https://books.google.de/books?id=qTZDAQAAMAAJ&pg=RA2-PA132
  8. http://www.gemeindeverzeichnis.de/gem1900/gem1900.htm?hannover/harburg.htm
  9. a b c http://www.verwaltungsgeschichte.de/harburg.html