Kamp (Landkreis Horborg)

Vun Wikipedia
Wapen/Flagg Koort
Wapen unbekannt
Kamp
Laag vun Kamp in Düütschland
Basisdaten
Bundsland: Neddersassen
Landkreis: Horborg
Samtgemeen: Töst
Gemeen: Will
Inwahners:
Postleettall: 21261
Vörwahl: 04188
Geograafsche Laag:
Koordinaten:53° 15′ N, 9° 47′ O
53° 15′ N, 9° 47′ O

Karte

Kamper Möhl

Kamp (hoochdüütsch Kampen) is en Dörp in de Gemeen Will (Samtgemeen Töst) in’n Landkreis Horborg, Neddersassen. To Kamp höört von öllers ok de lütten Öörd Haßel un Kamperlien mit bi.

Geografie[ännern | Bornkood ännern]

Kamp liggt an’n Kamper Beek, de in’n Oosten in’n Fuhlaubeek münnt. De Fuhlaubeek sülvs münnt üm un bi een Kilometer in’n Oosten von dat Dörp in de Eest.

De Naveröörd sünd Kamperlien, Langeloh un Hinkenbossel in’n Noorden, Hökel in’n Noordoosten, Handörp in’n Oosten, Will in’n Süüdoosten, Haßel, Lütt un Groot Todtshorn in’n Süden, Otter in’n Westen un Schillingsbosse, Knick, Töst un Glüsen in’n Noordwesten.

Historie[ännern | Bornkood ännern]

Kamp keem an’n 11. November 1105 as Volcerecampe toeerst in de Oorkunnen vör, nadem Graaf Dierk III. von Katelnborg von sien Vader Land in dat Dörp arvt harr un bi dat Stiften von dat Klooster Katelnborg dissen Besitt dat Klooster mitgeven hett.

De Windmöhl in Kamp is 1866 as Galerie-Hollanner von J. Peters boot worrn. 1892 weer de Möhl in Besitt von W. Fischer un is in dat Johr an Heinrich Blanck verköfft worrn. 1906 is in de Möhl en Motoor inboot worrn. 1963 is dor toletzt Koorn mahlt worrn. De Möhl is jümmer noch in’n Besitt von de Familie Blanck. 2001 hett sik en Möhlenvereen grünnt, de de Möhl pacht hett. De Windmöhl is as Bodenkmaal schuult.

In’n Eersten Weltkrieg sünd acht Soldaten ut Kamp fullen oder vermisst un in’n Tweten Weltkrieg 34.[1]

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Töst in’n Kanton Töst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Vaagdie Töst in dat Amt Horborg tohöört. 1852 is de Vaagdie Töst in dat Amt Mesborg wesselt, dat 1859 denn in dat Amt Töst ümwannelt worrn is. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

In de Midd von dat 19. Johrhunnert is de Oort Hinkenbossel Deel von de Gemeen Kamp worrn. De Gemeen Kamp is an’n 1. Juli 1972 mit de Gemeenreform in Neddersassen Deel von de Gemeen Will worrn.

Inwahnertall[ännern | Bornkood ännern]

Johr Inwahners
1793-00-001793[2] 8 Füürsteden
1812-00-001812[3] 104
1824-00-001824[4] 15 Füürsteden
1848-00-001848[5] 156 Lüüd, 24 Hüüs
1871-12-011. Dezember 1871[6] 191 Lüüd, 32 Hüüs
1910-12-011. Dezember 1910[7] 258
1925-00-001925[8] 313
1933-00-001933[8] 283
1939-00-001939[8] 277

Religion[ännern | Bornkood ännern]

Kamp is evangeelsch-luthersch präägt un höört to dat Kaspel von de Nikodemus-Kark in Handörp. Disse Kark is 1957 bet 1959 boot worrn. Vörher hett de Oort to dat Kaspel von de Johannes-de-Döper-Kark in Töst höört.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Kultur[ännern | Bornkood ännern]

Kriegerdenkmaal

En Denkmaal för de Fullenen ut de twee Weltkrieg’ steiht in Kamp an de Hauptstraat.

Verenen[ännern | Bornkood ännern]

De Schüttenvereen Kamp un Ümgegend is 1921 grünnt worrn.

Weertschop un Infrastruktur[ännern | Bornkood ännern]

Kamp hett en egen freewillige Füürwehr, de 1935 grünnt worrn is. Vörher hett dat en Plichtfüürwehr geven.

Verkehr[ännern | Bornkood ännern]

Oortsschild mit plattdüütschen Naam

In Kamp krüüzt sik de de Kreisstraten K 66 un K 65. De K 65 löppt in’n Noorden bi Kamperlien an de Landsstraat 141 un in’n Süden över Haßel un Lütt Todtshorn na Groot Todtshorn. De K 66 geiht in’n Westen na Otter un in’n Oosten an de L 141. De L 141 wedder föhrt in’n Noordwesten na Töst an de Bundsstraat 75 un in’n Oosten von Kamp an de Bundsstraat 3. De B 3 büddt in’n Süden Ansluss an snevern un Soltau un geiht in’n Noorden na de B 75 bi Bookholt un de B 73 bi Buxthu. De B 75 löppt in’n Süüdwesten na Lauenbrüch, Scheeßl un Rodenborg un in’n Noordoosten över Kakenstörp an Bookholt langs un na Ninndörp.

De nächste Autobahn is de Autobahn 1. De Opfohrt 45 Hullnst liggt so 15 Kilometer in’n Noordwesten von Kamp an de L 141.

De nächsten Bahnhööv sünd so bi fiev Kilometer wied weg in’n Noordwesten de Bahnhoff Töst an de Bahnlien Hamborg–Bremen un fiev Kilometer in’n Oosten de Bahnhoff Handörp an de Heidbahn.

De Oort hett 2013 tweesprakige Oortsschiller kregen, op de blangen den hoochdüütschen Naam ok de plattdüütsche mit op steiht.

Scholen[ännern | Bornkood ännern]

Dat eerste Schoolhuus is wohrschienlich üm 1670 rüm boot worrn.[9] Toeerst in de Oorkunnen dükert dat 1695 op.[9] Dat weer dat twete Schoolhuus in de Vaagdie Töst.[9] Vörher hett de Schoolmeester de Schölers ut Kamp, Will un Todtshorn op’n Dibbens-Hoff Ünnerricht geven.[9] 1748 is en neet Schoolhuus boot worrn un 1874 noch wedder en neet.[9] Disse School is 1979 denn dichtmaakt worrn.[9]

Vondaag gaht de Schölers na de Grundschool Handörp. Na de Grundschool gaht de Kinner normalerwies in Töst na School, op de Hauptschool Töst, de Realschool Töst oder dat Gymnasium Töst.

Literatur[ännern | Bornkood ännern]

  • Helmut R. Tödter: Kampen, Welle und Todtshorn. Heimatbuch des südlichen Todt. 2005

Footnoten[ännern | Bornkood ännern]

  1. http://www.denkmalprojekt.org/dkm_deutschland/kampen_harburg.htm
  2. Christoph B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 45: https://books.google.de/books?id=jN5QAAAAcAAJ&pg=RA1-PA45
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 61: http://books.google.de/books?id=Q 5OAAAAcAAJ&pg=PA61
  4. C. H. Jansen: Statistisches Handbuch des Königreichs Hannover. 1824, Sied 110: http://books.google.de/books?id=tG0AAAAAcAAJ&pg=RA1-PA110
  5. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 93: http://books.google.de/books?id=eOI-AAAAcAAJ&pg=PA93
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 131: https://books.google.de/books?id=qTZDAQAAMAAJ&pg=RA2-PA131
  7. http://www.gemeindeverzeichnis.de/gem1900/gem1900.htm?hannover/harburg.htm
  8. a b c http://www.verwaltungsgeschichte.de/harburg.html
  9. a b c d e f Infos op en Tafel, de in dat Dörp Kamp op en Findling anbrocht is:

Weblenken[ännern | Bornkood ännern]

Kamp (Landkreis Horborg). Mehr Biller, Videos oder Audiodateien to’t Thema gifft dat bi Wikimedia Commons.