Hökel

Wapen/Flagg	Koort
Basisdaten
Bundsland: Neddersassen Landkreis: Horborg Samtgemeen: Töst Gemeen: Handörp
Inwahners:
Postleettall:	21256
Vörwahl:	04188
Geograafsche Laag:	53° 15′ N, 9° 48′ O

Hökel (hoochdüütsch Höckel) is en Dörp in de Gemeen Handörp (Samtgemeen Töst) in’n Landkreis Horborg, Neddersassen. De Oort höört polietsch al von öllers bi Handörp mit bi un warrt ok Heidparadies nöömt.

Geografie

Hökel liggt in de Lümbörger Heid an’n Süüdwestrand von de Lohbargen. De Flidderbarg mit 107 m över NN liggt dicht bi’n Oort. An’n Westrand von’n Oort flütt de Eest langs.

De Naveröörd sünd Lohbargen un Sprötz in’n Noorden, Suurhoop, Seppens un Holm-Seppens in’n Noordoosten, Wörm un Holm in’n Oosten, Handörp un Inzmöhlen in’n Süüdoosten, Will un Cordshagen in’n Süden, Kamp mit Kamperlien in’n Süüdwesten, Knick un Schillingsbossel in’n Westen un Hinkenbossel, Töst, Glüsen, Langeloh un Neddernhoff in’n Noordwesten.

Historie

Hökel weer jümmer en temlich lütt Oord in de Heid mit nich mehr as 50 Inwahners. Eerst in dat 20. Johrhunnert is de Oort wussen, as an’n Flidderbarg en Reeg Feernhüüs anleggt worrn sünd. Disse Hüüs sünd later deelwies utboot worrn un warrt nu dat ganze Johr dör bewahnt.

Verwaltungsgeschicht

In de Franzosentied von 1810 bet 1814 hett de Oort to de Mairie Töst in’n Kanton Töst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Vaagdie Töst in dat Amt Horborg tohöört. 1852 is de Vaagdie Töst in dat Amt Mesborg wesselt, dat 1859 denn in dat Amt Töst ümwannelt worrn is. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

De Oort is as Deel von de Gemeen Handörp an’n 1. Juli 1972 mit de Gemeenreform in Neddersassen tohoop mit Inzmöhlen an de nu gröttere Gemeen Handörp kamen.

Inwahnertall

Johr	Inwahners
1793-00-001793	2 Füürsteden
1812-00-001812	35
1824-00-001824	4 Füürsteden
1848-00-001848	48 Lüüd, 5 Hüüs
1871-12-011. Dezember 1871	49 Lüüd, 5 Hüüs

Religion

Hökel is evangeelsch-luthersch präägt un höört to dat Kaspel von de Nikodemus-Kark in Handörp. De Kark is 1957 bet 1959 boot worrn. Vörher hett de Oort to dat Kaspel von de Martins-Kark in Jesborg höört.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Weertschop un Infrastruktur

Verkehr

Dör Hökel löppt de Bundsstraat 3, de in’n Süden över Will na Snevern un Soltau to geiht un in’n Noorden över Sprötz na de Bundsstraten B 75 (bi Bookholt) un B 73 (bi Buxthu). Ans gifft dat blots noch en lüttje Straat na Handörp.

De nächste Autobahn is de Autobahn 1. De Opfohrt 44 Raad liggt so 13 Kilometer in’n Noorden von Hökel.

De nächste Bahnhoff is so bi dree Kilometer wied weg in’n Süüdoosten de Bahnhoff Handörp an de Heidbahn.

Scholen

De Kinner ut Hökel gaht na de Grundschool Handörp op School. Na de Grundschool gaht de Kinner normalerwies in Töst na School, op de Hauptschool Töst, de Realschool Töst oder dat Gymnasium Töst.

Lüüd

De Lichenologin Gisela Ernst harr in Hökel en Feernhuus.

Literatur

• Hermann Schettler: Ortschronik von Handeloh: mit den ehemaligen Gemeinden und jetzigen Ortsteilen Handorf/Handeloh, Höckel, Inzmühlen und Wörme. 1983