Mesborg

Vun Wikipedia
Wapen/Flagg Koort

Wapen vun Mesborg

Mesborg
Laag vun Mesborg in Düütschland
Basisdaten
Bundsland: Neddersassen
Landkreis: Horborg
Samtgemeen: Hullnst
Gemeen: Mesborg
Inwahners:
Hööchd: 15 m över NN
Postleettall: 21647
Vörwahl: 04165
Geograafsche Laag:
Koordinaten:53° 24′ N, 9° 42′ O
53° 24′ N, 9° 42′ O

Karte

Mesborg (hoochdüütsch Moisburg) is en Dörp in de Gemeen Mesborg (Samtgemeen Hullnst) in’n Landkreis Horborg, Neddersassen.

Geografie[ännern | Bornkood ännern]

De Oort liggt an de Eest. Twee Beken doot dor in de Eest fleten, von Süüdwesten her de Starsbeek un von Noordoosten her de Mesbörger Beek. En Stück in’n Noordwesten münnt ok noch von Westen her de Guldbeek in de Eest.

De Naveröörd sünd Doans in’n Noorden, Imbeek, Arsdörp un Ilsdörp in’n Noordoosten, Rühmannshoff, Grauen un Eversen in’n Oosten, Podendörp, Appel un Appelbeek in’n Süüdoosten, Emmen in’n Süden, Starsbeek un Wosbossel in’n Süüdwesten, Rahmsdörp in’n Westen un Nindörp in’n Noordwesten.

Historie[ännern | Bornkood ännern]

Ansicht von’n Oort ut en Book von Matthäus Merian ut dat Johr 1654/1658

Mesborg kummt 1322 toeerst in de Oorkunnen vör. De Watermöhl an de Eest dükert 1379 toeerst in de Oorkunnen op.

Ünner Hertog Otto II. von Horborg is op dat rechte Över von de Eest en Poppeermöhl anleggt worrn. Vom em is kort later 1597 ok de Poppeermöhl in Starsbeek boot worrn. De Poppeermöhl weer en wichtigen Weertschpsfaktor för de Hertög von Horborg. Ünner Hertog Willem August is denn ok noch en Münt bi de Möhl inricht worrn. De hett aver blots bet 1629 Bestand hatt. 1621 is denn noch en Poppeermöhl in Appelbeek boot worrn un 1622 in Ooldklooster. Dör disse Poppeermöhlen weer Mesborg Gerichtsoort för Saken, de mit de Poppeermakeree to doon hebbt, för dat ganze Düütsche Riek.

In dat 19. Johrhunnert weren de olen Möhlen aver kuum noch kunkurrenzfähig un de Möhl in Mesborg hett denn 1843 dichtmaakt.

Dat Amtshuus von dat ole Amt Mesborg is 1618 in’n Stil von de Romantik boot worrn. 1983 hebbt se dat restaureert.

In de Franzosentied von 1810 bet 1814 hett de Oort to de Mairie Mesborg in’n Kanton Buxthu höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort weer bet 1859 Seet von dat Amt Mesborg un denn bet 1885 in dat Amt Horborg. Na 1885 weer dat in’n Kreis Horborg. 1932 is dat Deel von’n ne’en grötteren Landkreis Horborg worrn.

De Oort is an’n 1. Juli 1972 Deel von de Gemeen Mesborg worrn.

In’n Eersten Weltkrieg sünd 30 Soldaten ut Mesborg fullen oder vermisst un in’n Tweten Weltkrieg 77.[1]

Inwahnertall[ännern | Bornkood ännern]

Johr Inwahners
1812-00-001812[2] 384
1824-00-001824[3] 59 Füürsteden
1848-00-001848[4] 488 Lüüd, 71 Hüüs
1910-12-011. Dezember 1910[5] 450
1925-00-001925[6] 507
1933-00-001933[6] 581
1939-00-001939[6] 575

Wapen[ännern | Bornkood ännern]

Dat Wapen von Mesborg is vörn sülvern un achtern blau. Vörn is en roden Borgtoorn mit sülvern Gidderdoor to sehn un achtern en sülvern Balken, op den dree rode Pähl liggt. De Toorn steiht för de ole Borg, von de de Oort sien Naam af hett. De Deel achtern is dat Wapen von de Familie von Heimbrook, de en ganze Tied de Borglüüd op de Mesborg weren.

Religion[ännern | Bornkood ännern]

Mesborg is evangeelsch-luthersch präägt un billt en egen Kaspel.

För de Kathoolschen is de St.-Maria-Kark in Buxthu tostännig.

Kultur[ännern | Bornkood ännern]

Denkmaals för de Fullenen ut de twee Weltkrieg’ staht in de Kark von Mesborg un blangen dat ole Amtshuus. De Denkmaals sünd ok för 32 Fullene ut de olen Oostrebeden, de ehr Familien na’n Krieg na Mesborg kamen sünd.

In de ole Watermöhl is vondaag dat Möhlenmuseum Mesborg inricht.

In Mesborg gifft dat siet 1972 dat Mic Mac, wat en Disko is, de wied in de Ümgegend bekannt is. Besünners in de Johren 1970 un 1980 weer dat een von de gröttsten Diskos in de Ümgegend, in de ok veel bekannte Musikers optreden sünd. Nadem de Disko denn en poor Maal den Besitter wesselt hett, is se 2006 dichtmaakt worrn. 2010 hett de Disko denn mit en ne’en Besitter wedder apenmaakt.

Verenen[ännern | Bornkood ännern]

Mesborg hett en egene freewillige Füürwehr un en Schüttenvereen, de 1861 grünnt worrn is. Dat Schüttenfest warrt jümmer an’t twete Wekenenn in’n Juni fiert.

Brüük[ännern | Bornkood ännern]

An’n 1. Mai warrt elk Johr en Maiboom opstellt.

Weertschop un Infrastruktur[ännern | Bornkood ännern]

De Volksbank Geest hett in Mesborg in de Straat Op’n Damm 14 en Filiaal.

Verkehr[ännern | Bornkood ännern]

Dör Mesborg löppt de Landsstraat 141, de in’n Noorden över Doans un Pippens na Buxthu an de Bundsstraat 73 ran geiht un in’n Süden över Emmen na Hullnst un wieder över Duhrn na Töst an de Bundsstraat 75 ran. In’n Westen geiht de Kreisstraat 17 över Rahmsdörp na Beekdörp un in’n Oosten de K 53 na Grauen. Över de K 31 un K 71 gifft dat in Grauen Ansluss an de Bundsstraat 3. In’n Noordoosten geiht de K 17 na Imbeek un an de B 73 ran. Ans gifft dat noch lüttjere Straten na Podendörp un Starsbeek.

De nächste Autobahn is de Autobahn 1. De Opfohrt 45 Hullnst liggt so söss Kilometer in’n Süden von Mesborg.

De nächste Bahnhoff is so bi acht Kilometer wied weg in’n Noorden de Bahnhoff Buxthu an de Nedderelvbahn.

Scholen[ännern | Bornkood ännern]

In Mesborg gifft dat de Grundschool Mesborg.

Medien[ännern | Bornkood ännern]

Dat köstenlose Bladd Neue Buxtehuder warrt jümmer middwekens un sünnavends an all Huushollen verdeelt. dat Hollenstedter Tageblatt warrt een Maal in’e Week tostellt.

Infrastruktur[ännern | Bornkood ännern]

Dat Afwater warrt in dat Klärwark Hullnst klärt.

Literatur[ännern | Bornkood ännern]

  • Erich Tauber: Moisburg unser Dorf. 2007

Footnoten[ännern | Bornkood ännern]

  1. http://www.denkmalprojekt.org/dkm_deutschland/moisburg_wk1u2_ns.htm
  2. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 57: http://books.google.de/books?id=Q 5OAAAAcAAJ&pg=PA57
  3. C. H. Jansen: Statistisches Handbuch des Königreichs Hannover. 1824, Sied 412: http://books.google.de/books?id=tG0AAAAAcAAJ&pg=PA412
  4. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 99: http://books.google.de/books?id=eOI-AAAAcAAJ&pg=PA99
  5. http://www.gemeindeverzeichnis.de/gem1900/gem1900.htm?hannover/harburg.htm
  6. a b c http://www.verwaltungsgeschichte.de/harburg.html