Appelbeek (Oort)

Vun Wikipedia
Wapen/Flagg Koort
hett keen Wapen
Appelbeek
Laag vun Appelbeek in Düütschland
Basisdaten
Bundsland: Neddersassen
Landkreis: Horborg
Samtgemeen: Hullnst
Gemeen: Mesborg
Inwahners:
Postleettall: 21279
Vörwahl: 04165
Geograafsche Laag:
Koordinaten:53° 23′ N, 9° 44′ O
53° 23′ N, 9° 44′ O

Karte

Watermöhl in Appelbeek

Appelbeek (hoochdüütsch Appelbeck) is en lütten Oort in de Gemeen Mesborg (Samtgemeen Hullnst) in’n Landkreis Horborg, Neddersassen. De Oort höört von öllers bi Podendörp/Mesborg mit bi.

Geografie[ännern | Bornkood ännern]

De Oort liggt nich wied af von de Münn von’n Appelbeek in de Eest. De Appelbeek is hier to en acht Hektar groten Möhlendiek opstaut. An’n Möhlendiek sluut sik na Oosten noch en ganze Reeg Fischdieken an.

De Naveröörd sünd Podendörp in’n Noorden, Grauen un Appel in’n Noordoosten, Olendörp un Wennersdörp in’n Süüdoosten, Hullnst in’n Süüdwesten, Wosbossel un Emm in’n Westen un Mesborg in’n Noordwesten.

Historie[ännern | Bornkood ännern]

De Oort Appelbeek is as Poppeermöhl an’n Beek mit den sülven Naam anleggt worrn.[1] Bet in de twete Hälft von dat 19. Johrhunnert bestünn de Oort ok blots ut disse Möhl. Eerst in disse Tied sünd dor denn noch mehr Hüüs anleggt worrn. Besünners in de Tied von’n Tweten Weltkrieg sünd in’n Süden von de Möhl en ganze Reeg Hüüs boot worrn.[1] Toeerst in’n Krieg för Utbummte ut Hamborg, na’n Krieg denn jümmer mehr för Verdrevene ut de Oostrebeden.[1]

De Möhl is 1622 anleggt worrn, as de Horbörger Hartog Willem August de Poppermöhl in Mesborg ümboot hett, üm dor Münten to prägen.[2]

De Poppeermöhl is över twölv Generatschonen bet 1856 lopen.[1] In dat Johr hett dat en Brand geven un bi’n Wedderopbo is de Möhl in en Koornmöhl ümwannelt worrn.[1] Stücker wat Johren later is dor ok noch en Saagwark anboot worrn.[1]

1927 is bi de Möhl ok en Gasthuus inricht worrn un 1936 hebbt se en Saal boot.[1] An’n 21. April 1954 sünd dat Gasthuus un dat Wahnhuus afbrennt.[1] Blots de Möhl is stahn bleven.[1] Dorüm sünd Möhl un Saagwark dichtmaakt worrn un de Rüüm sünd as Gasthuus bruukt worrn.[1] Dat ne’e Gasthuus is to Pingsten 1955 trech worrn.[1]

Dat Gasthuus besteiht as Restaurant un Café vondaag noch un warrt von de Familie Vollmers bedreven.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Mesborg in’n Kanton Buxthu höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1859 to de Huusvaagdie Mesborg von dat Amt Mesborg tohöört. von 1859 bet 1885 weer dat in dat Amt Töst un von 1885 bet 1932 in’n Kreis Horborg. 1932 is dat Deel von’n ne’en un grötteren Kreis Horborg worrn.

Inwahnertall[ännern | Bornkood ännern]

Johr Inwahners
1791-00-001791[3] 1 Füürsteed
1812-00-001812[4] 18
1824-00-001824[5] 1 Füürsteed
1848-00-001848[6] 25 Lüüd, 1 Huus
1871-12-011. Dezember 1871[7] 14 Lüüd, 3 Hüüs
1885-12-011. Dezember 1885[8] 14 Lüüd, 2 Hüüs
1905-12-011. Dezember 1905[9] 6 Lüüd, 1 Huus

Religion[ännern | Bornkood ännern]

Appelbeek is evangeelsch-luthersch präägt un höört to dat Kaspel von de Kark in Mesborg.

För de Kathoolschen is de St.-Maria-Kark in Buxthu tostännig.

Weertschop un Infrastruktur[ännern | Bornkood ännern]

Verkehr[ännern | Bornkood ännern]

De Straat dör Appelbeek löppt in’n Süden an de Kreisstraat 31 ran un in’n Noordwesten achter Podendörp an de K 53. De K 53 geiht in’n Westen in Mesborg an de Landsstraat 141 un in’n Oosten na Grauen. De K 31 geiht in’n Noordoosten över Appel na Eversen un de Höll an de Bundsstraat 3 ran. In’n Süüdwesten löppt de K 31 in Hullnst an de L 141.

De L 141 wedder föhrt von Mesborg in’n Noorden na Buxthu un von Hullnst in’n Süden na Töst.

De nächste Autobahn is de Autobahn 1 (Afsnidd HamborgBremen). De Opfohrt 45 Hullnst liggt so veer Kilometer in’n Süüdwesten von Appelbeek an de L 141.

De nächste Bahnhoff is so bi ölven Kilometer wied weg in’n Noorden de Bahnhoff Buxthu an de Nedderelvbahn von Cuxhoben na Hamborg. De Bahnhoff Sprötz an de Bahnlien Hamborg–Bremen liggt 13 Kilometer in’n Süüdoosten.

Scholen[ännern | Bornkood ännern]

De Grundschölers ut Appelbeek gaht na de Grundschool Mesborg.

Footnoten[ännern | Bornkood ännern]

  1. a b c d e f g h i j k Infos to Appelbeek op de Websteed von de Gemeen Mesborg
  2. Programm Moisburger Mühlenfest (PDF)
  3. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 11
  4. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 58
  5. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 22
  6. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 99
  7. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 131
  8. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 146
  9. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 77