Avens

Dit Woort hett noch annere Bedüden: kiek dorför ünner Aven.

Wapen/Flagg	Koort
Basisdaten
Bundsland: Neddersassen Landkreis: Horborg Samtgemeen: Töst Gemeen: Heidenau
Inwahners:
Postleettall:	21258
Vörwahl:	04182
Geograafsche Laag:	53° 19′ N, 9° 40′ O

Avens (hoochdüütsch Avensen) is en Dörp in de Gemeen Heidenau (Samtgemeen Töst) in’n Landkreis Horborg, Neddersassen. De Oort Avensermoor liggt en poor Kilometer in’n Süüdwesten in dat Tisser Buurnmoor/Ekelmoor, höört aver liekers as Moorkolonie von öllers to Avens.

Geografie

Avens liggt an’n Dörpgraven, de annerthalv Kilometer in’n Süden von’n Oort in de Au münnt. De Au wedder flütt bi Avensermoor in de Oost.

De Naveröörd sünd Holtörp mit Holtörper Heid in’n Noorden, Makensbrook un Hullnst in’n Noordoosten, Duhrn mit Hääg in’n Oosten, Wüstenhöben un Töst in’n Süüdoosten, Wist un Wümm in’n Süden, Veloh, Avensermoor, Evsdörpermoor un de Herwigshoff in’n Süüdwesten, Evsdörp in’n Westen un Kallmoor un Hollinde in’n Noordwesten.

Historie

Avens kummt 1024 toeerst in de Oorkunnen vör.

Verwaltungsgeschicht

In de Franzosentied von 1810 bet 1814 hett de Oort to de Mairie Töst in’n Kanton Töst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Vaagdie Töst in dat Amt Horborg tohöört. 1852 is de Vaagdie Töst in dat Amt Mesborg wesselt, dat 1859 denn in dat Amt Töst ümwannelt worrn is. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

1929 hebbt sik Avens un Evsdörp tohoopslaten un de ne’e Gemeen Heidenau billt.

Inwahnertall

Johr	Inwahners
1793-00-001793	12 Füürsteden
1812-00-001812	155
1824-00-001824	25 Füürsteden
1848-00-001848	179 Lüüd, 34 Hüüs
1871-12-011. Dezember 1871	265 Lüüd, 54 Hüüs
1910-12-011. Dezember 1910	313

Religion

Avens is evangeelsch-luthersch präägt un höört siet 1977 to dat Kaspel von de Maria-Magdalena-Kark in Evsdörp. Vörher hett de Oort to dat Kaspel von de Andreas-Kark in Hullnst tohöört.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Kultur

Verenen

De Schüttenvereen Avens-Evsdörp is 1925 grünnt worrn un hett 1929 den ne’en Naam Schüttenvereen Heidenau kregen.

Weertschop un Infrastruktur

De freewillige Füürwehr Heidenau is för Avens un Evsdörp tostännig.

De Volksbank Geest hett in Avens in de Töster Straat 2 en Filiaal.

Verkehr

Dör Avens löppt de Kreisstraat 15, de in’n Noordwesten över Evsdörp un Hollinde na Holv geiht un in’n Süüdoosten över Wüstenhöben na Töst an de Bundsstraat 75. Lüttjere Straten gifft dat ans över Kallmoor na Kalf un na Veloh an de Landsstraat 142.

De nächste Autobahn is de Autobahn 1. De Opfohrt 46 Heidenau liggt so dree Kilometer in’n Noordwesten von Avens.

De nächste Bahnhoff is so bi söven Kilometer wied weg in’n Süüdoosten de Bahnhoff Töst an de Bahnlien Hamborg–Bremen. Von 1917 bet 1971 hett dat in Evsdörp ok en Bahnhoff an de Bahnlien Wilst–Töst geven, de weniger as een Kilometer von Avens weg weer.

Scholen

De Kinner ut Avens gaht na de Grundschool Heidenau in Evsdörp. Nadem se mit de de Grundschool trech sünd, gaht de Kinner normalerwies in Töst na School, op de Hauptschool Töst, de Realschool Töst oder dat Gymnasium Töst.