Olendörp (Landkreis Stood)
| Wapen/Flagg | Koort | |
|---|---|---|
|
|
| |
| Basisdaten | ||
| ||
| Flach: | 23,88 km² | |
| Inwahners: | 3143 (31. Dezember 2022) | |
| Hööchd: | 12 m över de See | |
| Postleettall: | 21726 (oolt: 2164) | |
| Vörwahl: | 04144 | |
| Geograafsche Laag: | Koordinaten:53° 36′ N, 9° 15′ O53° 36′ N, 9° 15′ O | |
| Grenzen bi OSM: | 445790 
| |
| Gemeenslötel: | 03 3 59 036 | |
| Börgermeester: | Johann Schlichtmann (WG) | |
| Websteed: | www.samtgemeinde-oldendorf.de | |
|
Koort Kreis 
 | ||
_-_Fachwerk_Bauernhof.JPG)
Olendörp (hoochdüütsch Oldendorf) is en Dörp un ene Gemeen in’n Landkreis Stood in Neddersassen. Olendörp hett 3143 Inwahners (Stand 31. Dezember 2022) un is Deel vun de Samtgemeen Olendörp-Himmelpoorten. Dorto höört denn ok de lüttjeren Öörd Kaken, Timmerlood, Sunn, Wittenmoor un Siedlung Olendörp.
Geografie
[ännern | Bornkood ännern]In’n Süden von Olendörp liggt dat Naturschuulrebeed von dat Hoge Moor. Dat Water flütt in’n Süüdwesten över den Gröpeler Möhlenbeek af, in’n Oosten över den Olendörper Beek na’n Hosterbeek.
De Naveröörd sünd Blomendol in’n Noorden, Burweg, Bossel un Himmelpoorten in’n Noordoosten, Kuhla in’n Oosten, Heinbockel un Hogenoh in’n Süüdoosten, de Böötz, Beeß un Öölm in’n Süüdwesten, Esdörp un Brobargen in’n Westen un Kronenborg in’n Noordwesten.
Historie
[ännern | Bornkood ännern]De Oort kummt al in de Tied 1111 bet 1116 as Aldenthorp in en Oorkunn vör un weer to de Tied en egen Kaspel.[1]
In’n Eersten Weltkrieg sünd 43 Lüüd ut Olendörp fullen oder vermisst un in’n Tweten Weltkrieg 110.[2]
In August 1959 hett bi Olendörp Heid un Moor in’t Hoge Moor brennt, wat veer Weken duurt hett, dat se’t löscht harrn. Dat Hoge Moor warrt hüüt wedder natt sett.
Verwaltungsgeschicht
[ännern | Bornkood ännern]In de Franzosentied hett de Oort toeerst 1810 bet 1811 binnen dat Königriek Westfalen to de Mairie Olendörp in’n Kanton Himmelpoorten höört un denn von 1811 bet 1814 to dat Franzöösche Kaiserriek ünner Napoleon un dor ok wedder to de Mairie Olendörp in’n Kanton Himmelpoorten.
Vör 1885 hett Olendörp en Böörd in dat Amt Himmelpoorten billt. 1885 is de Oort denn Deel von’n Kreis Stood worrn un 1932 von’n Landkreis Stood.
Olendörp hett sik 1965 mit de dree lüttjeren Gemenen Beeß, Bossel un Brobargen to de Samtgemeen Olendörp tohoopslaten. Düsse Samtgemeen harr man söven Johr Bestand. Denn hett dat de Gemeenreform in Neddersassen geven un to’n 1. Juli 1972 is de ne’e, düüdlich gröttere Samtgemeen Olendörp grünnt worrn, von de Olendörp Liddmaat un Seet weer. Disse Samtgemeen harr Bestand bet to’n 1. Januar 2014, as de Samtgemeen Olendörp mit de Samtgemeen Himmelpoorten to de Samtgemeen Olendörp-Himmelpoorten tohoopgahn is.
Religion
[ännern | Bornkood ännern]_-_Feldsteinkirche_800_Jahre.JPG)
Olendörp is evangeelsch-luthersch präägt. De Martinskark in Olendörp is in dat 12. Johrhunnert ut Feldsteen boot un is 36 Meter hooch. Blangen de Martinskark gifft dat in de Feldstraat ok noch en Fre’e-Christen-Gemeen, de to’n Bund von de Freekarklichen Pingstgemenen tohöört.
För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.
Inwahnertall
[ännern | Bornkood ännern]| Johr | Inwahners |
|---|---|
| 1791[3] | 46 Füürsteden |
| 1824[4] | 101 Füürsteden |
| 1848[5] | 744 Lüüd, 125 Hüüs |
| 1858[6] | 830 |
| 1. Dezember 1871[7] | 892 Lüüd, 134 Hüüs |
| 1. Dezember 1885[8] | 862 Lüüd, 148 Hüüs |
| 1. Dezember 1905[9] | 909 Lüüd, 167 Hüüs |
| 1. Dezember 1910[10] | 1.003* |
| 1925[11] | 1.062* |
| 1933[11] | 1.112* |
| 1939[11] | 1.044* |
| 2011[12] | 2.901* |
- * tohoop mit Kaken, Sunn un de Timmerlood
Politik
[ännern | Bornkood ännern]Gemeenraat
[ännern | Bornkood ännern]| Johr | CDU | SPD | WG | Free Wählers * | De Grönen |
|---|---|---|---|---|---|
| 2006[13] | 4 | 2 | 5 | 1 | 1 |
| 2011[14] | 3 | - | 7 | 3 | - |
- 2006 = WG II, 2011 = Bürger für Umwelt
Börgermeesters
[ännern | Bornkood ännern]- üm 1922: Hermann Schomaker
- üm 1968: Franz Schomaker
- üm 1974: Rudolf Pöpke
- üm 1981: Heinz Mannfrahs
- vör 2009: Georg Hellweeg
- na 2009: Johann Schlichtmann (WG)
Gemeendirekters
[ännern | Bornkood ännern]- ~1965: Rudi Fauck
Wapen un Flagg
[ännern | Bornkood ännern]De Flagg vun de Gemeend is deelt, vörn gollen un achtern gröön. Baven op is dat Wapen. Dat Wapen is deelt, vörn op gröön en gollen Krüüz un achtern noch wedder deelt, so dat baven en swarten halven Aadler mit rode Klauen un Snabel to sehn is, de na buten kickt. Neern is op swart en gollen Lööw mit rode Klauen un Tung, de op de achtersten Been steiht un na buten kickt.
Dat Krüüz steiht för de Martinskark un de gröne Achtergrund is Teken för de Bedüden vun de Bueree in’t Dörp. Aadler un Lööw kaamt ut dat Wapen vun Daniel von Arentsschild, de vun 1642 af an sien Seet in Olendörp harr un 1670 in de Kark bisett worrn is.
Dat Wapen hett de Gemeenraat an’n 27. September 1982 beslaten un to’n 30. Dezember 1982 hett de Landkreis Stood dat genehmigt.
Kultur
[ännern | Bornkood ännern]Olendörp hett twee Denkmaals för de Fullenen ut de twee Weltkrieg’.
De Harvstmarkt in Olendörp is jümmer an’n eersten Middweken in’n Oktober. Den Markt gifft dat al en poor hunnert Johr lang. Toeerst weer he an’n Sünndag na’n Martensdag (10. November), 1665 is he aver op’n Middweken leggt worrn. Eerst so üm 1930 rüm is he denn in’n Oktober leggt worrn, wenn beter Weder is. Wiehnachtsmarkt warrt in Olendörp jümmer an’n eersten Advent bi de Kark fiert.
Dat Brunkhorstsche Huus in Olendörp is en olen Buurnhoff blangen dat Raadhuus. Dat Neddersassenhuus is to Anfang von dat 19. Johrhunnert boot worrn un weer later ok en Gasthuus. Toletzt hett dat de Samtgemeen Olendörp övernahmen un 2000 an de Gemeen Olendörp övergeven. Kumplett trech worrn is de Ümbo 2004. Nu warrt dat Gebüüd för Veranstaltungen bruukt.
Verenen
[ännern | Bornkood ännern]Olendörp hett en egene freewillige Füürwehr, de 1883 grünnt worrn is. De Schüttengill Olendörp is 1924 grünnt worrn un de Turn- un Sportvereen 1921.
Weertschop un Infrastruktur
[ännern | Bornkood ännern]Olendörp gellt na dat Regionale Ruumordnungsprogramm as Grundzentrum för de Öörd in de Ümgegend.
Verkehr
[ännern | Bornkood ännern]Vun Olendörp geiht de Landsstraat 114 na’n Oosten an Kuhla vörbi na Himmelpoorten an de Bundsstraat 73, de denn wiedergeiht na Stood un Hamborg. Na’n Westen geiht de L 114 na Esdörp un ran de Bundsstraat 74 in Öölm, de denn na Bremervöör geiht. Lüttjere Straten loopt vun Olendörp na de Naverdörper Brobargen (K 78), Kronenborg (K 4), Blomendol, Bossel (K 66), Heinbockel (K 72) un Hogenoh.
De nächste Bahnhoff is in Himmelpoorten an de Nedderelvbahn von Cuxhoben na Hamborg, wat so bi söss Kilometer weg is.
Scholen
[ännern | Bornkood ännern]Olendörp hett dat Schoolzentrum Olendörp mit Grund-, Haupt- un Realschool. Dat Gymnasium, woneem de Olendörpers hengaht, is de Vincent-Lübeck-School in Stood. Blangen dat Schoolzentrum liggt dat Rudolf-Pöpke-Sportzentrum.
Bi dat Schoolzentrum liggt ok de Kinnergoorn, de 1972 grünnt worrn is. He weer toeerst in dat Organistenhuus von de Martinskark ünnerbröcht, is 1993 denn aver in dat hüdige ne'e Gebüüd an de Sunner Straat ümtagen.
Ünnernehmens
[ännern | Bornkood ännern]In Olendörp in de Hauptstraat 7 weer bet 2010 de Seet von de Volksbank Olendörp, de denn Deel von de Volksbank Freenbeek-Olendörp-Ohlers worrn is. Vondaag hett de Oort blots noch en Filial von de Volksbank un een von de Kreisspoorkass Stood in de Hauptstraat 10.
De wichtigste Laden in’n Oort is de EDEKA-Supermarkt von Michael Tiemann in de Midd von’n Oort blangen de Kark. Tiemann bedrifft ok en Drogerie in Olendörp (de vördem bet 2012 to Schlecker höört hett).
De Reederee tom Wörden hett ehren Seet in Olendörp.
Versorgung
[ännern | Bornkood ännern]Dat Afwater warrt siet 1972 in dat Klärwark Olendörp klärt. Dat Klärwark is 1970/1971 boot worrn. Dat Klärwark liggt in’n Süden von Olendörp (53° 35′ N, 9° 16′ O). Dreger von dat Klärwark weer de Samtgemeen Olendörp. To’n 1. Januar 2004 hett de Drinkwaterverband Stoder Land dat denn övernahmen. Dat Klärwark is för 4400 Inwahners utleggt, anslaten sünd opstunns so 3900.[15]
Lüüd
[ännern | Bornkood ännern]De Schriever vun de Geschicht vun Haas un Swienegel, Willem Schröder, is 1808 in Olendörp boren. Na em hett ok de Willem-Schröder-Straat in Olendörp ehrn Naam kregen.
De Basketballspelers Linda Fröhlich un ehr Broder Richard Fröhlich sünd in Olendörp opwussen.
Literatur
[ännern | Bornkood ännern]- Dietrich Alsdorf: Oldendorf im Wandel der Zeit. 1987
Footnoten
[ännern | Bornkood ännern]- ↑ Hamburgisches Urkundenbuch. Band 1, Perthes-Besser, 1842, Sied 125
- ↑ Onlineprojekt Gefallenendenkmäler
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 175
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 464
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 134
- ↑ Franz Heinrich Ungewitter: Neueste Erdbeschreibung und Staatenkunde. 1858, Sied 420
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 143
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 152
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 160
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
- ↑ /www.samtgemeinde-oldendorf.de/oldendorf.html
- ↑ http://wahl.kdo.de/?kommune=Samtgemeinde%20Oldendorf&instflash=yes&noflash=&wahl=2006_____Gemeinderatswahl%20Oldendorf_____060907152093731&showData=sitze
- ↑ http://wahl.kdo.de/?kommune=Samtgemeinde%20Oldendorf&instflash=yes&noflash=&wahl=2011_____Gemeinderatwahl%20Oldendorf%2011.09.2011_____110721101651317&showData=sitze
- ↑ http://www.twv-staderland.de/de/aeo/klaeranlage.html
Weblenken
[ännern | Bornkood ännern]
- Websteed vun de Gemeen Olendörp (hoochdüütsch)
Balje | Bargst | Beekdörp | Bliersdörp | Brest | Burweg | Buxthu | Deinst | Dollern | Drochters | Düünbeudel | Engelschopp | Esdörp | Freenbeek | Freiborg | Gauderhandviddel | Gothenborg | Greundiek | Grootweurn | Hammoh | Harsfeld | Heinbockel | Himmelpoorten | Hornborg | Hullern-Twielenfleth | Jörk | Kronenborg | Krummendiek | Kutenhult | Mittelskark | Neekark | Nottensdörp | Obbens | Oederquart | Ohlers | Olendörp | Sounsiek | Steenkark | Stood | Wischhoben