Mairie Behrn
De Mairie Behrn weer in de Franzosentied (1810 bet 1813) een von de dree Mairien, in de de Kanton Garlstörp indeelt weer. De Seet weer in Behrn. Se harr 1758 Inwahners.[1]
Historie
[ännern | Bornkood ännern]De Ümgegend von Behrn hett vör de Franzosentied to de Amtsvaagdien Amelkusen un Garlstörp von dat Amt Winsen, de Vaagdie Soltau von de Amtsvaagdie Fambossel-Soltau un de Amtsvaagdie Snevern von dat Amt Rodenborg höört. Dat Amt Winsen un de Amtsvaagdie Fambossel-Soltau weren in dat Förstendom Lümborg un dat Amt Rodenborg in dat Hartogdom Bremen. Dat allens leeg in dat Kurförstendom Hannover. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer Behrn keen egen Mairie. Dat weer Deel von de Mairie Bissen in’n Kanton Soltau von’n Distrikt Horborg, Departement von de Nedderelv.[2] Dat hett sik to’n 1. Januar 1811 ännert. Dat Königriek Westfalen müss dat Rebeed direkt an dat Franzöösche Kaiserriek afgeven. De Grenz von Westfalen na dat Kaiserriek weer aver ganz in de Neegd un hett en Reeg Mairien dörsneden. Dorbi is de Mairie Behrn nee billt worrn. Dat weer nu een von de dree Mairien in’n franzööschen Kanton Garlstörp, Distrikt Lümborg, Departement von de Elvmünnen. In de Mairie sünd Öörd in tohoopfaat worrn, de vörher in Westfalen to acht Mairien höört harrn: de Mairien Bissen, Bocken, Wils, Timmerloh un Woltern ut’n Kanton Soltau un de Mairien Unnel, Ebendörp un Rulfsen ut’n Kanton Garlstörp. Von de Mairien Wils un Woltern sünd blots Delen an de Mairie Behrn gahn. De Rest von de Mairie Wils keem an de Mairie Lauenbrüch un von de Mairie Woltern an de Mairie Soltau. Ok von de Mairien Bissen, Rulfsen, Bocken un Timmerloh sünd blots Delen an de Mairie Behrn gahn. De Rest is bi dat Königriek Westfalen bleven un keem dor an Mairien in’n Distrikt Ülzen von dat Departement von de Aller.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd
[ännern | Bornkood ännern]Dor hebbt düsse Öörd tohöört:
- Kaiserriek Frankriek:[1]
- Behrn, Steenken, Bossel (149 Inwahners), Unnel (109), Heimbeuk, Meenern (32), Tunnhoff, Wehlen (43), Wesel, Inzmöhlen (62), Rulfsen (113), Olndörp (98), Wohlenbüttel (37), Sottörp (99), Soosdörp (32), Ebendörp (67), Hörpel (65), Döhl (48), Volgern (62), Scharmbeck[Notiz 1] (37), Stimbeck, Grebenhoff (69), Hützel (90), Wils, Sellhorn (48), Babenhavenbeck (31), Neddenhabenbeck (29), Einem (21), Ehrhoorn, Wintemaur (49), Deimen, Harm (72), Dibbern, Hambossel, Heinhoff, Hoop (104), Schaal, Möhr (37), Benninghöben (19), Tütsbarg, Bockhäbe (20), Langwedel, Häbe (116)
Vondaag sünd düsse Öörd Deel von de Samtgemenen Amelkusen, Töst un Hanstää un de Gemenen Snevern, Behrn un Bissen.
Footnoten
[ännern | Bornkood ännern]- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 58
- ↑ Bulletin des lois du Royaume de Westphalie. Königliche Bookdruckeree, Kassel 1810, Sied 40
Notizen
[ännern | Bornkood ännern]- ↑ Dat Book Der französische Kayser-Staat unter der Regierung des Kaysers Napoleon des Großen, im Jahre 1812 schrifft an düsse Steed Scharmbeck, aver so en Oort is in de Ümgegend nich to finnen. Dat Book tellt hier de Öörd von de fröhere Mairie Bocken op. Dorüm is to vermoden, dat dor Swimmbeck mit meent is, dat in dat Book ans fehlt.