Benninghöben

Vun Wikipedia
Zur Navigation springen Zur Suche springen
Wapen/Flagg Koort
hett keen Wapen
Benninghöben
Laag vun Benninghöben in Düütschland
Basisdaten
Bundsland: Neddersassen
Landkreis: Heidkreis
Gemeen: Snevern
Inwahners:
Postleettall: 29640
Vörwahl: 05199
Geograafsche Laag:
Koordinaten:53° 6′ N, 9° 55′ O
53° 6′ N, 9° 55′ O

Benninghöben (hoochdüütsch Benninghöfen) is en lütten Oort in de Gemeen Snevern in’n Landkreis Heidkreis, Neddersassen. Binnen de Gemeen höört de Oort to de polietsche Oortschop Häbe.

Geografie[ännern | Bornkood ännern]

De Oort liggt in de Lümbörger Heid un in dat Naturschuulrebeed Lümbörger Heid. Dat Water ut dat Rebeed flütt över de Brunau af.

De Naveröörd sünd Habenbeck-Bobendörp in’n Noorden, Behrn in’n Noordoosten, Steenkenhöben un Bissen in’n Süüdoosten, Timmerloh un Schaal in’n Süden, Häbe, Bockhäbe, Pietz un Möhr in’n Süüdwesten, Snevern in’n Westen un Wulfsbarg un Tütsbarg in’n Noordwesten.

Historie[ännern | Bornkood ännern]

Benninghöben bestünn to Anfang von dat 19. Johrhunnert blots ut twee Hööv, is denn aver to en lütt Dörp ranwussen, dat utgangs dat 19. Johrhunnert söven Hööv harr. Na düsse Tied is de Oort aver bilütten wedder lüttjer worrn. Dat leeg ünner annern dor an, dat de Vereen Naturschuulpark Hööv un Land in Benninghöben un ümto opköfft hett, üm dor den Naturschuulpark Lümbörger Heid intorichten.

Verwaltungsgeschicht[ännern | Bornkood ännern]

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Woltern in’n Kanton Soltau höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Neenkerken in’n Kanton Wasra.

De Oort hett vör 1852 to de Amtsvaagdie Snevern in dat Amt Rodenborg tohöört un is in dat Johr denn in dat ne’e Amt Snevern wesselt. Dit Amt hett blots söven Johr bestahn. Von 1859 bet 1885 hett Benninghöben to dat Amt Soltau höört. Na 1885 weer dat in’n Kreis Soltau. 1977 is dat Deel von’n Landkreis Soltau-Fambossel worrn, de siet 2011 Heidkreis heten deit.

De Oort höört von öllers bi de Gemeen Häbe mit bi, de an’n 1. März 1974 mit de Gemeenreform in Neddersassen Deel von de Gemeen Snevern worrn is. Sietdem höört Benninghöben binnen de Gemeen to de Oortschop Häbe, de en egen Oortsvörsteiher hett.

Inwahnertall[ännern | Bornkood ännern]

Johr Inwahners
1791-00-001791[1] 2 Füürsteden
1812-00-001812[2] 23
1824-00-001824[3] 3 Füürsteden
1848-00-001848[4] 33 Lüüd. 6 Hüüs
1871-12-011. Dezember 1871[5] 48 Lüüd. 7 Hüüs
1885-12-011. Dezember 1885[6] 26 Lüüd. 6 Hüüs
1905-12-011. Dezember 1905[7] 29 Lüüd. 4 Hüüs

Religion[ännern | Bornkood ännern]

Benninghöben is evangeelsch-luthersch präägt un höört to dat Kaspel von de Fredenskark in Häbe. Düsse Kark is 1956 boot un 1961 egenstännige Karkengemeen worrn. Vörher hett de Oort to dat Kaspel von de Peter-un-Paul-Kark in Snevern tohöört.

För de Kathoolschen is de St.-Ansgar-Kark in Snevern tostännig, de siet 1. November 2006 to de St.-Maria-Karkengemeen in Soltau tohöört. De St.-Ansgar-Kark is 1963 boot un an’n 1. Januar 1964 egenstännige Karkengemeen worrn. Vörher is dat Rebeed ok al von de St.-Maria-Kark in Soltau betreut worrn.

Weertschop un Infrastruktur[ännern | Bornkood ännern]

För Benninghöben is de freewillige Füürwehr Häbe mit tostännig.

Verkehr[ännern | Bornkood ännern]

Benninghöben liggt aflegen in de Lümbörger Heid. Över de Kreisstraat 44 kummt een in’n Süden na Schaal an de Bundsstraat 3 un de Landsstraat 170. In’n Oosten kummt een na de K 51 un de L 211.

De nächste Autobahn is de Autobahn 7 (Afsnidd HamborgHannover). De Opfohrt 43 Bissen liggt so fiev Kilometer in’n Süüdoosten von Benninghöben an de L 211.

De nächste Bahnhoff is so bi 13 Kilometer wied weg in’n Westen de Bahnhoff Snevern an de Heidbahn.

Scholen[ännern | Bornkood ännern]

De Kinner ut Benninghöben gaht in Snevern op de Grundschool an’t Pietzmoor.

Lüüd[ännern | Bornkood ännern]

De Maler Günther Weißflog hett von 1936 bet 1955 in Benninghöben leevt.

Footnoten[ännern | Bornkood ännern]

  1. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 20
  2. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 116
  3. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 48
  4. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 153
  5. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 92
  6. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 101
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 153