Mairie Lauenbrüch
De Mairie Lauenbrüch weer in de Franzosentied (1810 bet 1813) een von de dree Mairien, in de de Kanton Töst indeelt weer. De Seet weer in Lauenbrüch. Se harr 2461 Inwahners.[1]
Historie
[ännern | Bornkood ännern]De Ümgegend von Lauenbrüch hett vör de Franzosentied to dat Gericht Lauenbrüch un de Amtsvaagdien Scheeßl un Snevern von dat Amt Rodenborg in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer Lauenbrüch Deel von de Mairie Riep, wat een von de twölv Mairien in’n Kanton Töst von’n Distrikt Horborg, Departement von de Nedderelv, weer.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Lauenbrüch weer nu een von de dree Mairien in’n Kanton Töst, Distrikt Horborg, Departement von de Nedderelv. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to söss Mairien höört harrn: de Mairien Riep, Fintel un Westervees ut’n Kanton Töst, de Mairie Scheeßl ut’n Kanton Rodenborg un de Mairien Snevern un Wils ut’n Kanton Soltau. Von de Mairie Scheeßl is blots de Oort Scheeßl sülvs an de Mairie Lauenbrüch kamen. De Rest von de Mairie is in de Mairie Rodenborg wesselt. Ok de Mairie Snevern is nich kumplett an Lauenbrüch gahn. En Deel keem an de Mairie Neenkerken. Von de Mairie Wils keem blots de Oort Reinsählen. De Rest keem an de Mairie Behrn.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd
[ännern | Bornkood ännern]Dor hebbt düsse Öörd tohöört:
- Kaiserriek Frankriek:[1]
- Lauenbrüch, Moorhuus (282 Inwahners), Riep (25), Vahl (69), Benkeloh (23), Varel, Ventzloh (18), Fintel, Haxloh, Hambrock (366), Wessloh (59), Eggersmöhl (15), Oostervees (175), Westervees (210), Scheeßl (356), Deepen, Lünzen (167), Bult, Brookhoff (44), Schultenwe (38), Osterwe, Grotenwe (50), Reinsählen (22), Snevern (314), Hansahlen, Höpen (59), Zoarn (121), Meyerhoff, Gallhorn (48)
Vondaag sünd düsse Öörd Deel von de Samtgemeen Fintel un de Gemenen Scheeßl un Snevern.
Footnoten
[ännern | Bornkood ännern]- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 61
- ↑ Bulletin des lois du Royaume de Westphalie. Königliche Bookdruckeree, Kassel 1810, Sied 43