Reinsählen

Vun Wikipedia
Wapen/Flagg Koort
hett keen Wapen
Reinsählen
Laag vun Reinsählen in Düütschland
Basisdaten
Bundsland: Neddersassen
Landkreis: Heidkreis
Gemeen: Snevern
Inwahners:
Postleettall: 29640
Vörwahl: 05198
Geograafsche Laag:
Koordinaten:53° 9′ N, 9° 49′ O
53° 9′ N, 9° 49′ O

Karte

Reinsählen (hoochdüütsch Reinsehlen) is en Dörp in de Gemeen Snevern in’n Landkreis Heidkreis, Neddersassen. Polietsch höört de Oort bi Issell mit bi.

Geografie[ännern | Bornkood ännern]

Reinsählen is in de Lümbörger Heid un in’n Noordwesten liggt dat Naturschuulrebeed Böver Fintaudaal. De Wümm flütt so bi een Kilometer in’n Noordoosten von’n Oort langs un de Fintau spiest sik ut Gravens, de ut Reinsählen kaamt.

De Naveröörd sünd Vossbarg, Wintemaur-Gäbesdörp un Wintemaur an de Chaussee in’n Noorden, Baal in’n Oosten, Snevern un Hansahlen in’n Süüdwesten un Issell in’n Westen.

Historie[ännern | Bornkood ännern]

Kort vör’n Tweten Weltkrieg is 1938 in Reinsählen de Flegerhorst Reinsählen anleggt worrn. In de Baracken von’n Flegerhorst sünd na’n Krieg Verdrevene ut de Oostrebeden intagen. Eerst in’n März 1946 400 Lüüd un denn in en tweten Transport an’n 20. Mai 1946 noch wedder 1200 Lüüd ut dat Rebeed von Grottkau in Slesien. 1949 wullen de Briten den Flegerplatz denn wedder för dat egene Militär bruken. En groten Deel von de Verdrevenen is dorüm 1950 na Hambühren II tagen.[1] De Briten sünd bet 1994 bleven. Sietdem warrt dat Gelänn von de Alfred Toepfer Akademie för Naturschuul un von en Hotel bruukt.

Mit dat Lager för Verdrevene is 1946 ok en Krankenstatschoon mit 150 Bedden boot worrn. Nadem de Verdrevenen 1950 ut Reinsählen weg sünd, is dat Krankenhuus bleven un is noch bet 1968 as Butensteed von dat Krankenhuus Soltau bruukt worrn.

In de Franzosentied von 1810 bet 1814 hett de Oort to de Mairie Lauenbrüch in’n Kanton Töst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to dat Amt Rodenborg tohöört, denn von 1852 bet 1859 to dat Amt Snevern un na 1859 to dat Amt Soltau. Na 1885 weer dat in’n Kreis Soltau. 1977 is dat Deel von’n Landkreis Soltau-Fambossel worrn, de 2011 den ne’en Naam Landkreis Heidkreis kregen hett.

De Oort hett al jümmer to de Gemeen Issell mit bihöört un is an’n 1. März 1974 tohoop mit Issell Deel von de Gemeen Snevern worrn.

In’n Tweten Weltkrieg sünd söss Soldaten ut Reinsählen fullen oder vermisst[2].

Inwahnertall[ännern | Bornkood ännern]

Johr Inwahners
1812-00-001812[3] 22
1824-00-001824[4] 6 Füürsteden
1848-00-001848[5] 51 Lüüd, 7 Hüüs

Religion[ännern | Bornkood ännern]

Reinsählen is evangeelsch-luthersch präägt un höört to dat Kaspel von de Peter-un-Paul-Kark in Snevern.

För de Kathoolschen is de St.-Ansgar-Kark in Snevern tostännig, de siet 1. November 2006 to de St.-Maria-Karkengemeen in Soltau tohöört. De St.-Ansgar-Kark is 1963 boot un an’n 1. Januar 1964 egenstännige Karkengemeen worrn. Vörher is dat Rebeed ok al von de St.-Maria-Kark in Soltau betreut worrn.

Kultur[ännern | Bornkood ännern]

En Denkmaal för de Fullenen ut de twee Weltkrieg’ steiht in Wintemaur an’n Karkhoff.

Weertschop un Infrastruktur[ännern | Bornkood ännern]

För Reinsählen is de freewillige Füürwehr Issell mit tostännig.

Verkehr[ännern | Bornkood ännern]

Oortsschild von Reinsählen

Dör Reinsählen löppt de Landsstraat 171, de in’n Noorden bi Wintemaur an de Chaussee an de Bundsstraat 3 ran geiht un in’n Süüdwesten na Snevern. In’n Oosten löppt en lüttjere Straat na Baal un ok an de B 3 ran un in’n Westen na Issell.

De nächste Autobahn is de Autobahn 7. De Opfohrt 43a Snevern liggt so 18 Kilometer in’n Süüdoosten von Reinsählen.

De nächsten Bahnhööv sünd so bi fiev Kilometer wied weg in’n Noorden in Wintemaur an de Chaussee un in’n Süden in Snevern an de Heidbahn.

In Reinsählen gifft dat en Segelflegerplatz.

Dat Dörp hett ne’e gröne Oortsschiller kregen, op de nu ok de plattdüütsche Naam blangen den hoochdüütschen mit op steiht.

Scholen[ännern | Bornkood ännern]

1851 hett Reinsählen tohoop mit Wintemaur un Baal en Schoolverband grünnt un de Kinner sünd in Wintemaur na de Volksschool gahn. Düsse School hett in de Johren 1970 dichtmaakt. Sietdem gaht de Kinner in Snevern op de Grundschool an’n Oosterwald.

Lüüd[ännern | Bornkood ännern]

De Hambörger Polizeipräsident Bruno Georges is in’t Krankenhuus Reinsählen doodbleven. De Künstler Jörg-Werner Schmidt harr en Atelier in Camp Reinsählen. De Riederin Lisa Wilcox hett in Reinsählen arbeidt.

Literatur[ännern | Bornkood ännern]

  • Dorfchronik der Gemeinde Insel. Insel, Reinsehlen, Barrl und Höpen. Eine Gemeinde im Wandel der Zeit. Heimatbund Snevern, 2012

Footnoten[ännern | Bornkood ännern]

  1. http://www.hambuehren.de/gemeinde/geschichte/lager-reinsehlen-wird-aufgeloest/
  2. http://www.denkmalprojekt.org/2013/wintermoor_stadt-schneverdingen_lk-heidekreis_wk1_wk2_ns.html
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 61: http://books.google.de/books?id=Q 5OAAAAcAAJ&pg=PA61
  4. C. H. Jansen: Statistisches Handbuch des Königreichs Hannover. 1824, Sied 504: http://books.google.de/books?id=tG0AAAAAcAAJ&pg=PA504
  5. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 153: http://books.google.de/books?id=eOI-AAAAcAAJ&pg=PA153