Wintemaur an de Chaussee
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 29640 | |
| Vörwahl: | 05198 | |
| Geograafsche Laag: | Koordinaten:53° 11′ N, 9° 50′ O53° 11′ N, 9° 50′ O | |
|
| ||
Wintemaur an de Chaussee (hoochdüütsch Wintermoor an der Chaussee) is en Dörp in de Gemeen Snevern in’n Landkreis Heidkreis, Neddersassen. Binnen de Gemeen höört de Oort to de polietsche Oortschop Ehrhoorn.
Wintemaur an de Chaussee heet kort eenfach Wintemaur. De Tosatz an de Chaussee is dor, üm en Ünnerscheed to maken to Wintemaur-Gäbesdörp (dat kort ok eenfach Wintemaur nöömt warrt), wat good twee Kilometer in’n Süüdwesten liggt. De Öörd heet all beid Wintemaur un warrt ok in wisse Wies as Eenheit sehn, hebbt aver fröher to verscheden Ämter un Gemenen höört un höört vondaag ok to verscheden Oortschoppen (Wintemaur an de Chaussee höört to de Oortschop Ehrhoorn un Wintemaur-Gäbesdörp billt en egen Oortschop).
Geografie
[ännern | Bornkood ännern]De Oort liggt in’t Holt von de Lümbörger Heid un direkt an de Grenz na dat Naturschuulrebeed Lümbörger Heid. De Oort liggt op de Waterscheed twüschen de Eest, de in’n Noordoosten von’n Oort langsflütt, un de Wümm, de in’n Süüdwesten langsflütt.
De Naveröörd sünd Handörp, Inzmöhlen, Wehlen un Wesel in’n Noordoosten, Unnel in’n Oosten, Ehrhoorn, Einem un Habenbeck-Nerndörp in’n Süüdoosten, Baal un Reinsählen in’n Süden, Wintemaur-Gäbesdörp in’n Westen un Ottermoor, Groot Todtshoorn, Lütt Todtshoorn un Will in’n Noordwesten.
Historie
[ännern | Bornkood ännern]
De Oort is 1794 grünnt worrn, as dat Huus von’n Chossee-Opseher Havemann anleggt worrn is.
De Heidbahn is 1901 anleggt worrn un in dat Johr hett de Oort en Bahnhoff kregen.
1942/1943 is twüschen Wintemaur un Ehrhoorn dat Krankenhuus Wintemaur anleggt worrn, dat later de Stadt Hamborg övernahmen hett. Düt Krankenhuus hett 1997 dichtmaakt. Von 1999 bet 2005 sünd de Anlagen denn noch as Pleegzentrum bruukt worrn. Siet 2005 verfallt de Anlagen.
In’n Tweten Weltkrieg sünd 19 Soldaten ut Wintemaur an de Chaussee fullen oder vermisst.[1]
An’t Enn von’n Tweten Weltkrieg sünd en Reeg Töög in Wintemaur strannt, de KZ-Häftlinge an Boord harrn. Dat KZ-Butenlager Harzungen is, as de Front neger keem, an’n 4. April 1945 evakueert worrn. De Häftlinge schullen na dat KZ Neengamm brocht warrn, aver dat Lager weer överfüllt. Dorüm is de Tog wedder na Süden föhrt un is in Wintemaur stoppt. En Reeg Häftlinge, de op de Fohrt al doodbleven weren oder eerst in Wintemaur ümbröcht worrn sünd, sünd in en Massengraff inkuhlt worrn. Nadem de Briten dat Rebeed innahmen harrn, hebbt se an’n 26. April dat Massengraff opdeckt un opgraavt. De Doden sünd denn op’n Karkhoff von Wintemaur nee begraven worrn. Alltohoop weren dat 156 Lüüd. Blots bi 26 Lüüd is de Identität bekannt.[2]
Verwaltungsgeschicht
[ännern | Bornkood ännern]In de Franzosentied hett de Oort toeerst 1810 bet 1811 binnen dat Königriek Westfalen to de Mairie Wils in’n Kanton Soltau höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Behrn in’n Kanton Garlstörp.
De Oort hett vör 1852 to de Amtsvaagdie Amelkusen in dat Amt Winsen tohöört un is 1852 in dat Amt Soltau wesselt. Na 1885 weer dat in’n Kreis Soltau. 1977 is dat Deel von’n Landkreis Soltau-Fambossel worrn (de siet 2011 Landkreis Heidkreis heet).
De Oort hett fröher to de Buurschop un Gemeen Ehrhoorn mit bihöört, de an’n 1. März 1974 mit de Gemeenreform in Neddersassen oplööst worrn is. Wintemaur an de Chaussee is tohoop mit Ehrhoorn un Einem Deel von de Gemeen Snevern worrn. Sietdem höört de Oort binnen de Gemeen to de Oortschop Ehrhoorn, de en egen Oortsvörsteiher hett.
Inwahnertall
[ännern | Bornkood ännern]| Johr | Inwahners |
|---|---|
| 1824[3] | 4 Füürsteden |
| 1848[4] | 60 Lüüd, 8 Hüüs |
| 1. Dezember 1871[5] | 74 Lüüd, 13 Hüüs |
| 1. Dezember 1885[6] | 92 Lüüd, 17 Hüüs |
| 1. Dezember 1905[7] | 91 Lüüd, 17 Hüüs |
Religion
[ännern | Bornkood ännern]Wintemaur an de Chaussee is evangeelsch-luthersch präägt un höört to dat Kaspel von de Peter-un-Paul-Kark in Snevern. Binnen dat Kaspel höört de Oort to’n Parrbezirk Wintemaur.
För de Kathoolschen is de St.-Ansgar-Kark in Snevern tostännig, de siet 1. November 2006 to de St.-Maria-Karkengemeen in Soltau tohöört. De St.-Ansgar-Kark is 1963 boot un an’n 1. Januar 1964 egenstännige Karkengemeen worrn. Vörher is dat Rebeed ok al von de St.-Maria-Kark in Soltau betreut worrn.
De Doden warrt op’n Karkhoff Wintemaur begraven, de siet 1942 besteiht. 1947 hett de Karkhoff ok en lüttje Kapell tokregen. 1968 is noch en ne’e Kapell boot worrn. Op den Karkhoff doot 156 KZ-Häftlinge, en Reeg kriegsfungene Soldaten un üm un bi 500 Lüüd ut Hamborg liggen, de in dat Krankenhuus Wintemaur doodbleven sünd.
Kultur
[ännern | Bornkood ännern]
En Denkmaal för de Fullenen ut de twee Weltkrieg’ steiht in Wintemaur op’n Karkhoff. 1991 sünd tosätzlich noch twee Gedenksteen un 26 Naamtafeln opstellt worrn för de Doden KZ-Häftlinge, de 1945 in Wintemaur strannt sünd.
Weertschop un Infrastruktur
[ännern | Bornkood ännern]För Wintemaur an de Chaussee is de freewillige Füürwehr Ehrhoorn/Wintemaur mit tostännig, de in Wintemaur an de Chaussee ehr Sprüttenhuus hett.
Verkehr
[ännern | Bornkood ännern]
Dör Wintemaur an de Chaussee löppt de Bundsstraat 3, de in’n Noorden över Will op Bookholt un Buxthu to geiht un de in’n Süüdoosten an de Autobahn 7 (Afsnidd Hamborg–Hannover) ran. De nächste Opfohrt op düsse Autobahn is aver de Opfohrt 43 Bissen 15 Kilometer in’n Süüdoosten an de Landsstraat 211. De L 211 löppt von Wintemaur an de Chaussee över Ehrhoorn un Habenbeck na Behrn un Bissen. In Wintemaur an de Chaussee münnt ok de L 171 in de B 3, de in’n Süüdwesten över Snevern, Schüllern un Sprengel na Neenkerken föhrt.
De Oort hett mit’n Bahnhoff Wintemaur en egen Bahnhoff an de Heidbahn.
Dat Dörp hett 2006 ne’e Oortsschiller kregen, op de nu ok de plattdüütsche Naam blangen den hoochdüütschen mit op steiht.
Scholen
[ännern | Bornkood ännern]De Kinner ut Wintemaur an de Chaussee gaht in Snevern op de Grundschool an’n Oosterwald.
Literatur
[ännern | Bornkood ännern]- 200 Jahre Colonie Wintermoor. 1994
Footnoten
[ännern | Bornkood ännern]- ↑ Onlineprojekt Gefallenendenkmäler
- ↑ http://www.kz-zuege.de/kapitel_07.htm
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 672
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 103
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 92
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 101
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 153
Weblenken
[ännern | Bornkood ännern]- Websteed över dat Dörp (hoochdüütsch)