Ebendörp

Wapen/Flagg	Koort
Basisdaten
Bundsland: Neddersassen Landkreis: Horborg Samtgemeen: Hanstää Gemeen: Äästörp
Flach:	11,76 km²
Inwahners:	355 (2011-03-1919. März 2011)
Inwahnerdicht:	30,2 Inwahners pro km²
Postleettall:	21272
Vörwahl:	04175
Geograafsche Laag:	53° 9′ N, 10° 4′ O

Ebendörp (hoochdüütsch Evendorf) is en Dörp in de Gemeen Äästörp in’n Landkreis Horborg, Neddersassen.

Geografie

Ebendörp liggt in de Lümbörger Heid. In’n Süüdoosten von dat Dörp liggt de Born von’n Swinnbeek.

De Naveröörd sünd Äästörp in’n Noorden, Lübberstä, Eyendörp un Raben in’n Noordoosten, Rulfsen un Soosdörp in’n Oosten, Swinnbeek in’n Süüdoosten (de letzten veer in’n Landkreis Lümborg), Stimbeck, Hützel un Adolfshusen in’n Süüdwesten, Hörpel in’n Westen (de veer all in’n Landkreis Heidkreis) un Döhl in’n Noordwesten.

Historie

Dat Dörp kummt an’n 3. August 1287 toeerst in de Oorkunnen vör.

1858 hett en Avkaat ut Swarms twee Hööv in Ebendörp köfft un dor en Good inricht. De 2.050 Morgen grote Hoff warrt 1903 wedder verköfft un dorna weer dat en Lehrhoff för Schaap- un Tuffeltucht.

In’n Eersten Weltkrieg sünd söss Soldaten ut Ebendörp fullen oder vermisst un in’n Tweten 26.

An’n 16. Dezember 1968 is de Footballspeler Jürgen Moll op de Autobahn 7 bi Ebendörp bi en Unfall doodbleven.

Verwaltungsgeschicht

Vör 1885 leeg Ebendörp in’t Amt Winsen un na 1885 in’n Kreis Winsen, de 1932 denn Deel von’n Landkreis Horborg worrn is.

An’n 1. Juli 1972 is de Gemeen Ebendörp Deel von de Gemeen Äästörp worrn.

Inwahnertall

Johr	Inwahners
1824-00-001824	9 Füürsteden
1848-00-001848	98 Lüüd, 10 Hüüs
1910-12-011. Dezember 1910	172
1925-00-001925	201
1933-00-001933	217
1939-00-001939	245
2011-03-1919. März 2011	355

Religion

Ebendörp is evangeelsch-luthersch präägt un höört to dat Kaspel Äästörp. Von dat 13. Johrhunnert af an bet 1954 harr de Oort to dat Kaspel von de Martinskark in Raben tohöört.

De Oort hett en egen Karkhoff mit en lüttje Kapell.

Wapen

Dat Wapen von Ebendörp wiest baven op roden Grund twee gollen Immenkörv un ünnen op sülvern Grund den swarten Kopp von en Heidsnuck mit gollen Höörn. Dat Rood steiht för de Heid, de Immenkörv för de Immentucht in de Lümbörger Heid un de Heidsnuck för de Schaaptucht un ook as Symbol för den Naam von dat Dörp (en Eev).

Kultur

En Denkmaal för de Fullenen ut de twee Weltkrieg’ steiht op’n Karkhoff.

Verenen

De Schützenvereen Ebendörp is 1927 grünnt worrn. In’n Tweten Weltkrieg hett de Vereen von 1939 af an roht un is denn eerst 1962 wedder nee grünnt worrn. Dat Schützenfest warrt jümmer an’t eerste Wekenenn in’n Juli fiert. De Theatergrupp De Ebendörper Immenschwoorm speelt elk Johr en plattdüütsch Stück.

Brüük

In’n Winter warrt in Ebendörp Faslam fiert.

Weertschop un Infrastruktur

De Freewillige Füürwehr Ebendörp is 1893 grünnt worrn.

Verkehr

Ebendörp liggt an de Landsstraat 212, de in’n Noorden na Äästörp un Garlstörp löppt un in’n Süüdwesten na Hörpel, Volgern un Bissen. In’n Süüdwesten löppt de Kreisstraat 51/6 na Hützel, in’n Noordoosten de K 30/41 na Raben un in’n Oosten de K 36/K 45 na Soosdörp. In’n Noordwesten löppt de K 36 na Döhl.

500 Meter in’n Noorden von Ebendörp liggt de Opfohrt 42 Ebendörp op de Autobahn 7 (Afsnidd Hamborg–Hannover) an de L 212.

De nächste Bahnhoff is de Bahnhoff Hemsen an de Heidbahn. Fröher harr dat Dörp ok en lüttjen Bahnhoff an de Bahnlien Winsen–Hützel.

Scholen

De Kinner ut Ebendörp gaht na de Grundschool Äästörp.

Weblenken

• Websteed över dat Dörp (hoochdüütsch)