Faslam

Vun Wikipedia
Zur Navigation springen Zur Suche springen
Faslam in Mechtsen
Borentrecken in Sülfeld
Schild in Bredenfeld, dat Faslam verkünnt

Faslam (ok Faslom, Fasslom, Fasslaom oder Faßlom schreven oder as Faslampietschen betekent) is en olen noorddüütschen Bruuk. De Traditschonen to Faslam stammt ut en protestantisch Buurnümfeld, sünd aver an vele Stellen eng mit Traditschonen von’n kathoolschen Karneval verknütt.

De Naam sett sik tohoop ut -am, wat en tohooptrucken Form von Avend is, un Fas-. Bi Fas- is nich ganz kloor, wat dor mit meent is, is aver wohrschienlich dat sülve as in de süüddüütsche Fastnacht.

Faslam warrt in’n Winter in de Buurndörper fiert. Dorbi teht de Deelnehmers von Huus to Huus un snurrt Etenssaken (vör allen Eier, Wust, Schinken un Speck) un Kööm, de denn mehrstentieds in en gemeensame Fier achterher verspiest un drunken warrt. De Fier is faken mit Danz un Verkleden un warrt denn in vele Öörd Lumpenball nöömt.

Deelnehmers weren fröher faken Knechten un Deerns, vondaag all junge Lüüd ut dat Dörp. Dat gifft aver ok en Reeg Dörper mit annere Traditschonen, bi de ok öllere Deelnehmers dorbi sünd.

Ok de Termin kann von Dörp to Dörp wied varieren. Faken warrt de Faslam an’n Terminklenner von’n Karneval anlehnt un dat gifft an’n 11. November bestimmte Traditschonen. To’n Bispeel en Drepen, bi dat de Faslam vörbereidt un de Faslamöllern (Faslamvadder un Faslammudder) bestimmt warrt. Düt Drepen warrt in vele Öörd Anbinnen nöömt.

De egentliche Faslam liggt aver twüschen 2. Januar (dat Ümtehn von Huus to Huus to Neejohr an’n 1. Januar warrt Neejohrwünschen nöömt) un Aschermiddweken.

Rebeed[ännern | Bornkood ännern]

In de Nutied is Noordoosten-Neddersassen dat Zentrum von’n Faslam. Vör allen in’n Landkreis Horborg is de Traditschoon noch stark un warrt in en grote Tall Dörper fiert. In annere Rebeden sünd dat man noch enkelte Dörper, in de de Traditschoon bleven is. Fiern sünd in Neddersassen bekannt ut de Landkreise Celle, Cuxhoben, Gifhorn, Lümborg, Neenborg, Rodenborg, Stood un Ülzen, ut de Region Hannover un ut de Stadt Wulfsborg. Buten Neddersassen warrt Faslam ok in enkelte Öörd in de Landkreise Ludwigslust-Parchen (Mekelborg-Vörpommern), Prignitz (Brannenborg) un Soltwedel (Sassen-Anholt) fiert, de all dicht bi de Landsgrenz na Neddersassen liggen doot.

Literatur[ännern | Bornkood ännern]

  • Birger Antholz: Faslam. Deskription des norddeutschen Karnevals im Landkreis Harburg. Harburg 2005, DNB 978259998
  • Heike Müns: Von Brautkrone bis Erntekranz: Jahres- und Lebensbräuche in Mecklenburg-Vorpommern. Ein Handbuch. Hinstorff, Rostock 2002, ISBN 3-356-00913-3