Töst

Wapen/Flagg	Koort
Basisdaten
Bundsland: Neddersassen Landkreis: Horborg Samtgemeen: Töst Gemeen: Töst
Inwahners:
Postleettall:	21255
Vörwahl:	04182
Geograafsche Laag:	53° 17′ N, 9° 43′ O

Luftbild von Töst (von Noordwesten keken, 2012)

Raadhuus von de Gemeen Töst

Töst (hoochdüütsch Tostedt) is en Oort in de Gemeen Töst (Samtgemeen Töst) in’n Landkreis Horborg, Neddersassen.

To Töst höört polietsch ok al von öllers dat Dörp Wüstenhöben mit bi. In dat 20. Johrhunnert is bito de Siedlung Depenbrook op dat Rebeed von Töst grünnt worrn. Ok de Öörd Töst-Land un Dreehusen höört to Töst. Disse beiden Öörd sünd op dat Moorland grünnt worrn, dat de Gemeen in dat Moor twüschen de Oost un de Wümm todeelt worrn is.

Geografie

De Oort liggt in de Lümbörger Heid. In’n Süden liggt de Otterbarg. In Töst hebbt de Duhrner Möhlenbeek un de Glüser Beek ehren Born. De Möhlenbeek flütt na Noorden un münnt in de Eest un de Glüser Beek na Oosten. De Beken in’n Süden un Oosten von Töst doot na de Oost fleten, de in’n Süden von’n Oort ehren Born hett.

De Naveröörd sünd Duhrn in’n Noorden, Boitschen un Kakenstörp in’n Noordoosten, Glüsen un Langeloh in’n Oosten, Hinkenbossel, Kamp, Otter, Knick un Schillingsbossel in’n Süüdoosten, Quellen, Depenbrook, Riepshoff, Dreehusen, Töst-Land un Wist in’n Süüdwesten, Veloh in’n Westen un Wüstenhöben in’n Noordwesten.

Historie

Amtsgericht

Toeerst in de Oorkunnen dükert de Oort an’n 11. November 1105 as Ozstide op, as Adela von Beichlingen Land in Töst an dat Klooster Katelnborg schenkt hett. Dat is aver nich kumplett kloor, wat mit Ozstide Töst meent ween is. Wenn dor en annern Oort mit meent weer, denn is dat eerste Vörkamen in de Oorkunnen 1197 as Totstede.

Siet 1852 is Töst Seet von dat Amtsgericht Töst.

In’n Eersten Weltkrieg sünd 87 Soldaten ut Töst fullen oder vermisst.

Verwaltensgeschicht

In de Franzosentied von 1810 bet 1814 weer de Oort Seet von de Mairie Töst un den Kanton Töst. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Vaagdie Töst in dat Amt Horborg tohöört. 1852 is de Vaagdie Töst in dat Amt Mesborg wesselt, dat 1859 denn in dat Amt Töst ümwannelt worrn is. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

De Oort is an’n 1. Juli 1972 mit de Gemeenreform in Neddersassen Deel von de nu gröttere Gemeen Töst worrn, de mit Glüsen tohoopgahn is.

Inwahnertall

Johr	Inwahners
1793-00-001793	33 Füürsteden
1812-00-001812	357
1824-00-001824	57 Füürsteden
1848-00-001848	523 Lüüd, 68 Hüüs
1871-12-011. Dezember 1871	644 Lüüd, 98 Hüüs
1910-12-011. Dezember 1910	1.753
1925-00-001925	1.753
1933-00-001933	2.030
1939-00-001939	2.178

Religion

Johannes-de-Döper-Kark in Töst

Töst is evangeelsch-luthersch präägt un billt mit de Johannes-de-Döper-Kark en egen Kaspel.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Börgermeesters

Bet 1935 is de Baas von Töst Gemeenvörsteiher nöömt worrn.

• 1853–1872: Christoph Wicke
• 1872–1898: Joachim Kröger
• 1899–1904: Friedrich Sommerfeld
• 13. März 1904–27. Oktober 1919: Karl Möller
• 27. Oktober 1919–23. Januar 1931: Adolf Gerlach
• 1. Februar 1931–30. September 1933: Claus Hamann
• 1. Oktober 1933–30. September 1934: Otto Mohrmann
• 1. Oktober 1934–31. Mai 1945: Claus Hamann
• 11. Juni 1945–31. August 1945: Alexander Daum
• 1. September 1945–28. September 1946: Friedrich Rossmann
• 29. September 1946–7. Dezember 1950: Heinrich Fricke
• 8. Dezember 1950–15. März 1971: Willy Aldag
• 13. April 1971–30. Juni 1972: Paul Elbers

Kultur

In Töst steiht en Denkmaal för de Fullenen ut den Eersten Weltkrieg. En Gedenkbook för de Fullenen ut’n Tweten Weltkrieg gifft dat in de Johannes-Kark.

Verenen

De Schüttenvereen Töst is 1854 grünnt worrn. De MTV Töst is 1879 grünnt worrn, de mit de Dischtennis-Froonslüüd al in de Bundsliga speelt hett.

Weertschop un Infrastruktur

Töst gellt na dat Regionale Ruumordnungsprogramm as Grundzentrum för de Öörd in de Ümgegend.

Töst hett en egene freewillige Füürwehr.

Verkehr

Bahnhoff Töst

Dör Töst löppt de Bundsstraat 75, de in’n Noordoosten över Kakenstörp an Bookholt langs un na Ninndörp geiht un in’n Süüdwesten na Lauenbrüch, Scheeßl un Rodenborg. De Landsstraat 141 löppt in’n Noorden na Duhrn, Hullnst un Mesborg un in’n Süüdoosten na Will an de B 3. De B 3 wedder geiht in’n Süden op Snevern un Soltau to. In’n Noordwesten geiht de Kreisstraat 15 över Wüstenhöben na Avens un Evsdörp un in’n Oosten de K 57 na Glüsen un Neddernhoff un denn an de B 3.

De tokamen Autobahn is de Autobahn 1. De Opfohrt 46 Heidenau liggt so negen Kilometer in’n Noordwesten von Töst an de K 15 un de Opfohrt 45 Hullnst negen Kilometer in’n Noorden an de L 141.

De tokamen Bahnhoff is de Bahnhoff Töst an de Bahnlien Hamborg–Bremen. Von 1917 bet 1971 harr de Oort ok noch en tweten Bahnhoff an de Bahnlien Wilst–Töst. Dat weer de Bahnhoff Töst-West an de B 75.

Scholen

De Kinner ut Töst gaht na de Grundschool Töst (mit de twee Standöörd Dieckhofstraat un Poststraat) op School. Na de Grundschool gaht de Kinner normalerwies füdder in Töst na School, op de Hauptschool Töst, de Realschool Töst oder dat Gymnasium Töst.

Weblenken

• Websteed von de Samtgemeen Töst (hoochdüütsch)