Otterbarg

Vun Wikipedia
Zur Navigation springen Zur Suche springen

Disambig.svg Dit Woort hett noch annere Bedüden: kiek dorför ünner Otterbarg (Barg).

Wapen/Flagg Koort

Wapen vun Otterbarg

Otterbarg
Laag vun Otterbarg in Düütschland
Basisdaten
Bundsland: Neddersassen
Landkreis: Veern
Gemeen: Otterbarg
Flach: 17,13 km²
Inwahners: 5.355
Inwahnerdicht: 312,6 Inwahners pro km²
Postleettall: 28870
Vörwahl: 04205
Geograafsche Laag:
Koordinaten:53° 7′ N, 9° 9′ O
53° 7′ N, 9° 9′ O

Otterbarg (hoochdüütsch Ottersberg) is en Oort in de Gemeen Otterbarg in’n Landkreis Veern, Neddersassen. Otterbarg besteiht ut den olen Flecken Otterbarg an’t Noordöver von de Wümm un den ne’en Oortsdeel Otterbarg-Bahnhoff an’t Süüdöver von de Wümm.

Geografie[ännern | Bornkood ännern]

Bi Otterbarg münnt de Wiest in de Wümm.

De Naveröörd sünd Otterst in’n Noorden, Eckstever un Reeßen in’n Noordoosten, Stuckenbossel in’n Oosten, Hemelbarg, Dodenbarg un Evernhusen in’n Süüdoosten, Posthusen, Middeldörp un Giers-Schanzendörp in’n Süden, Bassen in’n Süüdwesten, Hu’e in’n Westen un Quelkhoorn in’n Noordwesten.

Historie[ännern | Bornkood ännern]

Dat Slott Otterbarg, wat op en Insel in de Wümm leeg, hett toeerst de Grafen von Wölpe tohöört. 1221 hett denn de Arzbischop von Bremen, Gerhard II., dat Slott innahmen. 1226 sünd Iso von Wölpe un Gerhard II. vör Gericht gahn, üm to klären, ’keen dat Slott tohöört. 1230 is dat denn dor mit toenn gahn, dat Gerhard II. dat Slott tospraken kregen hett. 1236 is dat Slott denn aver al von Otto von Sassen innahmen un tweimaakt worrn. 1273 hebbt de Arzbischöp von Bremen denn en neet Slott boot.

1547 is dat Slott an de Stadt Bremen gahn. In’n Rahmen von de Hardenbergschen Unruhen in Bremen 1562 hett denn wedder Arzbischop Georg dat Slott innahmen. 1626 warrt Otterbarg in’n Dörtigjohrigen Krieg von Tillysche Truppen dalbrennt. To Enn von’n Dörtigjohrigen Krieg is dat Slott 1645 an de Sweden gahn.

1675 hett de Bischop von Mönster dat Slott innahmen un 1676 in Stand setten laten. Dat hett aver blots bet 1679 wohrt, as mit’n Freed von Nimwegen dat Slott an Sweden fullen un afbraken worrn is. 1677 is de Oort Otterbarg an dat Noordöver von de Wümm leggt worrn (dor harr dat al en Dörp Bodenstedt geven), blots dat Slott is op de Insel in de Wümm bleven. 1712 is Otterbarg däänsch worrn un 1715 hannöversch. Dat Slott is 1757, to Anfang von’n Sövenjohrigen Krieg wedder herstellt worrn.

In’n Eersten Weltkrieg sünd 59 Soldaten ut Otterbarg fullen oder vermisst un in’n Tweten Weltkrieg 199[1]. De Twete Weltkrieg güng in Otterbarg toenn, as an’n 28. April 1945 de Briten den Oort innahmen hebbt.[2]

Verwaltungsgeschicht[ännern | Bornkood ännern]

Raadhuus von de Gemeen Otterbarg

In de Franzosentied von 1810 bet 1814 weer de Oort Seet von de Mairie Otterbarg un den Kanton Otterbarg. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1859 to de Huusvaagdie Otterbarg in dat Amt Otterbarg tohöört un denn to dat Amt Achem. Na 1885 weer dat in’n Kreis Achem. 1932 is dat Deel von’n Landkreis Veern worrn. In dat Amt Otterbarg hett dat von 1852 bet 1859 dat Amtsgericht Otterbarg geven.

De Oort is an’n 1. Juli 1972 mit de Gemeenreform in Neddersassen Deel von de ne’e gröttere Gemeen Otterbarg worrn. Sietdem billt de Oort en polietsche Oortschop mit egen Oortsraad un Oortsbörgermeester binnen de Gemeen Otterbarg.

Inwahnertall[ännern | Bornkood ännern]

Johr Inwahners
1812-00-00 1812[3] 925
1824-00-00 1824[4] 132 Füürsteden
1848-00-00 1848[5] 1.156 Lüüd. 149 Hüüs
1910-12-011. Dezember 1910[6] 1.375
1925-00-00 1925[7] 1.426
1933-00-00 1933[7] 1.720
1939-00-00 1939[7] 1.976

Religion[ännern | Bornkood ännern]

Christophorus-Kark in Otterbarg

Otterbarg is evangeelsch-luthersch präägt un billt mit de Christophorus-Kark en egen Kaspel. Bevör de Christophorus-Kark 1959 grünnt worrn is, hett Otterbarg to dat Kaspel von de Martinskark in Otterst tohöört. Otterbarg harr aver ok al in disse Tied en egen Kapell.

För de Kathoolschen is de Paulus-Kark in Eiten tostännig.

Wapen[ännern | Bornkood ännern]

Dat Wapen von Otterbarg wiest op blauen Grund över en sülvern Schildfoot ut Wellenlienen en gollen Otter, de en sülvern Fisch in’t Muul höllt un ut dat Water hoogstiggt.

Dat Water steiht för de Wümm un de Otter as sprechendes Wapen för den Oort Otterbarg. Dat hüdige Wapen hett de fröhere Gemeen Otterbarg offiziell 1949 tokennt kregen. Aver ok al vörher hett de Flecken en Otter in’t Wapen föhrt. Dat öllste Segel, dat den Otter in’t Wapen wiest, is von 1719.[8]

Oortsbörgermeesters[ännern | Bornkood ännern]

  • 2001–: Reiner Schnäpp (SPD)

Kultur[ännern | Bornkood ännern]

En Denkmaal för de Fullenen ut de twee Weltkrieg’ steiht in Otterbarg bi de Kark.

Verenen[ännern | Bornkood ännern]

Otterbarg hett en egene freewillige Füürwehr un en Schüttenvereen.

Weertschop un Infrastruktur[ännern | Bornkood ännern]

Polizei in Otterbarg

Otterbarg gellt na dat Regionale Ruumordnungsprogramm as Grundzentrum för de Öörd in de Ümgegend.

Weertschop[ännern | Bornkood ännern]

En wichtigen Arbeidgever mit 370 Lüüd is de Buss Fertiggerichte GmbH, de twüschen Otterbarg un Eckstever sitt.

De Volksbank Wümm-Wiest un de Kreisspoorkass Veern hebbt Filialen in Otterbarg.

Verkehr[ännern | Bornkood ännern]

Bahnhoff Otterbarg

Dör Otterbarg löppt de Landsstraat 168, de in’n Süüdwesten na Bassen un na Eiten geiht un in’n Oosten na Stuckenbossel un dor an de Autobahn 1 un an de Bundsstraat 75 anslaten is. De B 75 geiht denn wieder na Söttmer un na Rodenborg. Na Noorden twiegt de L 132 von de L 168 af un geiht över Otterst bi Zeven an de B 71 ran. Von de L 132 twiegt wedder de L 154 af, de in’n Noordwesten na Quelkhoorn un Leendaal löppt.

Von Otterbarg-Bahnhoff geiht von de L 168 de L 155 af, de na Posthusen un Völkersen geiht.

Ans gifft dat noch de Kreisstraat 37, de na Eckstever geiht.

De nächste Autobahn is de Autobahn 1. De Opfohrt 50 Stuckenbossel liggt so veer Kilometer in’n Oosten von Otterbarg un de Opfohrt 51 Posthusen is so twee Kilometer von Otterbarg-Bahnhoff weg.

De Oort hett mit’n Bahnhoff Otterbarg en egen Bahnhoff an de Bahnlien Hamborg–Wanne-Eickel.

Scholen[ännern | Bornkood ännern]

De Fre’e Rudolf-Steiner-School

De Grundschölers ut Otterbarg gaht na de Grundschool Posthusen. In Otterbarg gifft dat aver de Wümmschool, wat en Oberschool is, dat Gymnasium Otterbarg un de Waldorfschool Fre’e Rudolf-Steiner-School Otterbarg.

In Otterbarg sitt siet 1967 de Fachhoogschool Otterbarg.

De Kita Otterbarg-Bahnhoff is 1997 grünnt worrn.

Lüüd[ännern | Bornkood ännern]

De Künstler Martin Voßwinkel leevt in Otterbarg. De Afrikaforscher Eduard Mohr hett 1870 bet 1871 in Otterbarg leevt.

De Militärbischop Hermann Kunst is 1907 in Otterbarg boren un de Musikperfesser Harald Vogel 1941.

Literatur[ännern | Bornkood ännern]

  • Herbert Schwarzwälder: Ottersberg von den Anfängen bis zur Franzosenzeit. 1989
  • Heidelore Kluge: Wir haben immer gut zusammengelebt! Die Juden in Ottersberg. Bremen 1994, 93 S. mit 13 Teeknungen von Gundula Dangschat
  • Meike Boist, Ingrid Brandt un Cornelia Wolf-Becker: Erinnerungen an Mägde. Dokumentation einer Ausstellung. Otterbarg 2001, 63 S.

Footnoten[ännern | Bornkood ännern]

  1. http://www.denkmalprojekt.org/dkm_deutschland/ottersberg_ns.htm
  2. Lars Köppler: Als die Panzer durch Ottersberg rollten. Achimer Kurier an’n 17. April 2015
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 96: http://books.google.de/books?id=Q 5OAAAAcAAJ&pg=PA96
  4. C. H. Jansen: Statistisches Handbuch des Königreichs Hannover. 1824, Sied 476: http://books.google.de/books?id=tG0AAAAAcAAJ&pg=PA476
  5. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 138: http://books.google.de/books?id=eOI-AAAAcAAJ&pg=PA138
  6. http://www.gemeindeverzeichnis.de/gem1900/gem1900.htm?hannover/achim.htm
  7. 7,0 7,1 7,2 http://www.verwaltungsgeschichte.de/verden.html
  8. http://www.ngw.nl/heraldrywiki/index.php?title=Ottersberg