Volksbank Wümm-Wiest

De Volksbank eG Wümm-Wiest is en Volksbank mit Seet in Söttmer. De Bank höört to’n Genossenschaftsverband un hett ölven Filialen (plus twee SB-Filialen) in’n Süden von’n Landkreis Rodenborg (Ooldkreis Rodenborg) un den Noorden von’n Landkreis Veern (dör de de beiden Strööm Wümm un Wiest fleten doot). Den Vörstand billt Matthias Dittrich un Stefan Hunsche, de Vörsitter von’n Opsichtsraad is Wilfried Rogge.

De BLZ is 291 656 81 un de BIC GENO DEF1 SUM. De Bilanzsumm weer an’n 31. Dezember 2011 430 Millionen Euro, de Inlagen weren 283 Millionen Euro un de Kunnenkredite 254 Millionen Euro. De Bank hett 157 Mitarbeiders un 8.629 Maten.

Blangen Söttmer hett de Volksbank ok noch Filialen in Otterbarg, Scheeßel, Rodenborg, Ahusen, Bassen, Posthusen, Karkwals, Fintel, Hu’e un Boitzen. Twee SB-Filialen gifft dat in Söttmer un Otterst.

Historie

Söttmer

De Spoor- un Dorlehnskass Söttmer is an’n 12. Oktober 1892 grünnt worrn. Grünner un eersten Vörsitter von’n Vörstand weer Johann Dietrich Müller.

1951 un 1952 hett de Kass in Söttmer Filialen in Hellweeg, Horß un Boitzen apenmaakt un 1961 in Waaschen. De Filiaal in Taaken hett von 1958 bet 1978 bestahn.

De Kass is 1971 dör Fusion mit de Spoor- un Dorlehnskass Karkwals tohoopgahn un hett denn Volksbank Söttmer heten. 1973 hett de Filiaal in Ahusen apenmaakt. 1990 is de Volksbank Fintel dör Fusion Deel von de Volksbank Söttmer worrn.

1999 sünd de Volksbank Söttmer un de Volksbank Otterbarg dör Fusion tohoopgahn un hebbt dorbi ok noch de Filiaal in Scheeßel von de Breemsche Volksbank övernahmen. Dat ne’e Ünnernehmen hett denn Volksbank eG Söttmer-Otterbarg-Scheeßel heten.

2004 hett de Bank denn noch en ne’e Filiaal in Rodenborg an’n Ne’en Mark apenmaakt, wieldes de Filialen in Hellweeg, Hörß un Waaschen 2007 dichtmaakt hebbt. De Filiaal in Otterst is 2008 in en reine SB-Filiaal ümboot worrn.

2012 hett sik de Volksbank eG Söttmer-Otterbarg-Scheeßel denn ümdöfft in Volksbank eG Wümm-Wiest.

Otterbarg

De Spoor- un Dorlehnskass Otterbarg hett sik in de Johren 1890 grünnt. De Bank hett 1963 in Bassen und 1973 in Posthusen Filialen apenmaakt. De Kass is 1966 dör Fusion mit de Spoor- un Dorlehnskass Otterst tohoopgahn un hett denn Volksbank Otterbarg heten. 1986 is denn de Volksbank Hu’e dör Fusion Deel von de Volksbank Otterbarg worrn. 1999 is se denn dör Fusion mit de Volksbank Söttmer tohoopgahn. Dat ne’e Ünnernehmen hett denn Volksbank eG Söttmer-Otterbarg-Scheeßel heten.

Hu’e

De Spoor- un Dorlehnskass Hu’e is in de Johren 1890 grünnt worrn. 1986 is se dör Fusion Deel von de Volksbank Otterbarg worrn.

Fintel

De Spoor- un Dorlehnskass Fintel is 1905 grünnt worrn. 1990 is se dör Fusion Deel von de Volksbank Söttmer worrn.

Otterst

De Spoor- un Dorlehnskass Otterst is 1909 grünnt worrn. 1966 is se dör Fusion mit de Spoor- un Dorlehnskass Otterbarg to de Volksbank Otterbarg tohoopgahn.

Karkwals

De Spoor- un Dorlehnskass Karkwals is 1921 grünnt worrn. 1971 is se dör Fusion mit de Spoor- un Dorlehnskass Söttmer to de Volksbank Söttmer tohoopgahn.

Weblenken

• Websteed von de Volksbank (hoochdüütsch)