Waaschen

Wapen/Flagg	Koort
Basisdaten
Bundsland: Neddersassen Landkreis: Rodenborg Gemeen: Rodenborg
Flach:	15,23 km²
Inwahners:
Postleettall:	27356
Vörwahl:	04268
Geograafsche Laag:	53° 7′ N, 9° 19′ O
Websteed:	www.waffensen.de

Grotendöör von’n Worthmannhoff. Dat Neddersassenhuus is vondaag en Mehrgeneratschonenhuus

Blick op dat 2005 grünnte Mehrgeneratschonenhuus un den Speelplatz von’n Kinnergoorn

Waaschen (hoochdüütsch Waffensen) is en Dörp mit üm un bi 900 Inwahners in de Gemeen Rodenborg in’n Landkreis Rodenborg, Neddersassen.

Geografie

Waaschen liggt op de Geest. In’n Süden von dat Dörp so twee Kilometer weg flütt de Wümm langs.

De Naveröörd sünd Höperhöben un Boitzen in’n Noorden, Rodenborg in’n Oosten, Ünnerst in’n Süüdoosten, Ahusen in’n Süden, Hellweeg in’n Süüdwesten, Hassendörp un Söttmer in’n Westen un Sleßel in’n Noordwesten.

Historie

De Oort kummt 1320 toeerst in de Oorkunnen vör.

Vör 1885 leeg Waaschen in’t Amt Rodenborg un na 1885 in’n Kreis Rodenborg (de 1977 Deel von’n hüdigen Landkreis Rodenborg worrn is).

An’n 1. März 1974 is de Gemeen Waaschen Deel von de ne’e Gemeen Rodenborg worrn.

In’n Krieg von 1866 sünd twee Soldaten ut Waaschen fullen oder vermisst un in’n Krieg von 1870/1871 veer.

1988 un wedder 2010 hett dat Dörp bi Unser Dorf hat Zukunft de Goldmedallj wunnen. In de Johren 1975, 1978, 1983, 1986 un 2009 weer Waaschen ok al Kreiswinner un 1987 Landswinner.

Inwahnertall

Johr	Inwahners
1824-00-001824	34 Füürsteden
1848-00-001848	265 Lüüd, 51 Hüüs
1910-12-011. Dezember 1910	379
1925-00-001925	426
1933-00-001933	418
1939-00-001939	462

Religion

Waaschen is evangeelsch-luthersch präägt un höört to dat Kaspel von de Georgskark in Söttmer.

För de Kathoolschen is de Corpus-Christi-Kark in Rodenborg tostännig.

Wapen

Dat Wapen von Waaschen wiest op sülvern Grund en bruun Klockentoorn mit Klock un an de Sieden in Gröön Ekenloff.

Politik

Waaschen billt en Oortschop binnen de Gemeen Rodenborg un hett en egen Oortsraad mit negen Maten un en Oortsbörgermeester.

Tied	Oortsbörgermeester
opstunns	Hartmut Leefers

Oortsraad

Johr	Maten
2011	Hartmut Leefers, Henning Poppe, Kai Hastedt, Andreas Holsten, Joachim Jessat, Henrik Klee, Jost Köhnken, Heiko Siegmann, Manuela Thies

Kultur

In Söttmer an de Grote Straat steiht en Denkmaal för de Fullenen ut de Krieg’ von 1866 un 1870/1871 ut Waaschen.

Verenen

De Schützenvereen Waaschen is 1924 grünnt worrn un fiert sien Schützenfest jümmer an’t drüdde Wekenenn in’n Juli. De Turn- un Sportvereen is 1912 grünnt worrn.

Weertschop un Infrastruktur

De Freewillige Füürwehr Waaschen is 1902 grünnt worrn

Verkehr

Dicht bi Waaschen löppt de Bundsstraat 75 langs, de in’n Westen na Söttmer un Otterbarg geiht un in’n Oosten bi Rodenborg mit de B 75 tohooplöppt. Na Noordwesten löppt de Kreisstraat 202 na Boitzen, Höperhöben un Sleßel. De nächste Opfohrt op de Autobahn 1 is so bi söss Kilometer weg an de B 75 de Opfohrt 50 Stuckenbossel.

De nächste Bahnhoff is de Bahnhoff Rodenborg an de Bahnlien Bremen–Hamborg. Twee Kilometer in’n Noordoosten von dat Dörp liggt de Flegerplatz Rodenborg.

Scholen

Waaschen hett en egen Grundschool un Kinnergoorn. De Kinnergoorn hett sik 2003 ut en Speelkreis billt, de 1973 in dat ole Schoolhuus apenmaakt harr.

Lüüd

Sven Jaschan, de mit 17 Johr 2004 de Computerwörm NetSky un Sasser programmeert un freesett hett, kummt ut Waaschen.

Weblenken

• Websteed von Waaschen (hoochdüütsch)

Oortschoppen von de Stadt Rodenborg

Borchel (mit Stellmoor un Borchelhoff) | Mulmshoorn | Rodenborg (mit Luhn un Grafel) | Ünnerst | Waaschen