Oortsbörgermeester
En Oortsbörgermeester (oder in en Stadt en Bezirksbörgermeester) is in Neddersassen de Vörsitter von’n Oortsraad, de de Intressen von en Oortschop gegenöver de Gemeen vertriddt, to de de Oortschop höört.
Dör Gemeenreformen sünd in Neddersassen en Barg Gemenen to grote Eenheitsgemenen tohoopleggt worrn. Üm de Intressen von de enkelten Öörd binnen de Eenheitsgemenen to wohren, hebbt in veel Fäll de fröher egenstännigen Gemenen in de ne’e Gemeen den Status von en Oortschop kregen. Gemenen, de Deel von en Samtgemeen sünd, dröfft keen Oortschoppen oder Oortsrääd inrichten.
De Vertreder von de Oortschop warrt bi de Kommunalwahlen wählt. Dat kann en enkelte Person ween un is denn de Oortsvörsteiher. Dat köönt aver ok mehr Personen ween, de den Oortsraad billt un denn ünner sik en Oortsbörgermeester wählt.
De Regeln för de Oortsbörgermeesters warrt in dat Neddersassische Kommunalverfatensgesett in’n Paragraaf 92[1] fastleggt.