Amtsgericht Stood

Ingang to dat Gericht (Wilhadikarkhoff 1)

Dat Amtsgericht Stood is een von de acht Amtsgerichten in’n Landgerichtsbezirk Stood. Dat hett sien Seet in Stood in’n Landkreis Stood.

Överornt Gerichten

Dat Amtsgericht Stood sünd in’n Instanzentog dat Landgericht Stood, dat Oberlandsgericht Celle un de Bundsgerichtshoff in Karlsruhe överornt.

Gerichtsbezirk

To’n Gerichtsbezirk höört disse Öörd: Aasp, Aßel, Balje, Beeß, Blomendol, Bossel, Bredenwisch, Brobargen, Burweg, Bützfleet, Deinst, Drochters, Düünbeudel, Engelschopp, Esdörp, Eßel, Freeborg, Gauderhandviddel, Greundiek, Gröpel, Groot Freenbeek, Groot-Steernbarg, Grootweurn, Haddörp, Hagen, Hogenoh, Hammah, Heinbockel, Helmst, Himmelpoorten, Hollern-Twielenfleth, Hüll, Kronenborg, Krummendiek, Kruutsand, Kuhla, Kutenhult, Lüttjen Freenbeek, Middelsdörp, Mittelskark, Mulsen, Neekark, Neeland, Öderquart, Olendörp, Schölisch, Steenkark, Stood, Swing, Wehl, Wiepenkathen un Wischhoben.

Geschicht

Mit dat hannöversche Gerichtsverfatensgesett von’n 8. November 1850, dat an’n 1. Oktober 1852 in Kraft gahn is, sünd Verwaltung un Justiz kumplett trennt worrn un de Amtsgerichten sünd as ünnerst Gerichten inricht worrn. De Amtsgerichten Stood un Bützfleet sünd dor denn nee schapen worrn un hebbt de Gerichtsborkeit övernahmen, de vörher bi dat Stadtgericht Stood un dat Grevengericht Bützfleet legen hett. Dat Amtsgericht Bützfleet weer ok mit för dat Amt Stood tostännig. Beide Amtsgerichten weren tohoop in Stood ünnerbröcht.

1859 is dat Amtsgericht Bützfleet oplööst worrn un dat Amtsgericht Stood weer nu ok för en Deel von dissen Gerichtsbezirk tostännig. Ok för den gröttsten Deel von’n Gerichtsbezirk von dat oplööste Amtsgericht Himmelpoorten weer Stood von 1859 af an tostännig (de Deel, de an’t rechte Över von de Oost leeg un 1859 nich an dat Amtsgericht Oosten fullen is).

1973 hett sik de Gerichtsbezirk vergröttert, as de beiden Amtsgerichten Freeborg un Oosten oplööst worrn sünd. Dat Rebeed von’t Amtsgericht Oosten is denn aver 1982 an dat Amtsgericht Oterndörp afgeven worrn.

Amtsrichters Stood

~1858: Conrad Christ. Theodor Trautmann
~1863: Hans Geo. von Trampe
~1876: Eduard Georg Christoph Rudorff

Amtsrichters Bützfleet

~1858: August Friedrich von Issendörp

Gerichtsgebüüd

Dat eerste Gebüüd von de beiden Amtsgerichten weer in dat Hauptfängnis, dat 1840/1841 boot worrn is, vondaag dat Sozial- un Jugendamt twüschen Begunen- un Grünnelstraat. 1889 harr dat Gericht nich mehr noog Ruum un dat is na achtern rut utboot worrn.

De Tokoop von en Gebüüd an’n Wilhadikarkhoff hett dat mööglich maakt, in de Johren 1903 bet 1905 en neet Gebüüd an de Eck Ridderstraat na’n Wilhadikarkhoff to boon. Dit Huus, dat mit de Front na de Kark wiest, is in en historiseerenden Stil (Late Renaissance an’n Övergang na’t Barock) boot worrn. In dit Gebüüd is dat Amtsgericht in de ünnerste Etaasch intagen.