Amtsgericht Oterndörp

Dat Amtsgericht Oterndörp is een von de acht Amtsgerichten in’n Landgerichtsbezirk Stood. Dat hett sien Seet in Oterndörp in’n Landkreis Cuxhoben.

Överornt Gerichten

Dat Amtsgericht Oterndörp sünd in’n Instanzentog dat Landgericht Stood, dat Oberlandsgericht Celle un de Bundsgerichtshoff in Karlsruhe överornt.

Geschicht

Mit dat hannöversche Gerichtsverfatensgesett von’n 8. November 1850, dat an’n 1. Oktober 1852 in Kraft gahn is, sünd Verwaltung un Justiz kumplett trennt worrn un de Amtsgerichten sünd as ünnerst Gerichten inricht worrn. Dat Amtsgericht Oterndörp is dor denn nee schapen worrn un weer för Amt Oterndörp un Stadt Oterndörp tostännig.

Von 1852 bet 1859 weer dat Obergericht Leh dat överornte Gericht, denn is dat Amtsgericht Oterndörp in’n Bezirk von dat Obergericht Stood wesselt. Na de Rieksjustizgesetten von 1877 is 1879 ut dat Obergericht Stood dat Landgericht Stood worrn.

Nadem 1973 dat Amtsgericht Neehuus oplööst worrn is, weer dat Amtsgericht Oterndörp ok för dissen Gerichtsbezirk mit tostännig. 1982 hett Oterndörp ok noch dat Rebeed von dat Amtsgericht Oosten övernahmen, dat ok al 1973 oplööst worrn is un in de Twüschentied to’n Gerichtsbezirk von dat Amtsgericht Stood tohöört harr^[1].

Gerichtsgebüüd

Dat Gericht leeg siet 1768, dunn noch as Bövergericht, in en Börgerhuus bi’n Markt, dat hüdige Kreishuus. 1885 is dat Gericht ümtagen in dat hüdige Gebüüd, dat 1773 boot worrn is. 1982 is dat Gericht grötter worrn un hett Afdelen in dat ole Kreishuus utlagert. Dat Gericht is ok vondaag noch in dat Gebüüd an de Straat An’n Groten Specken ünnerbröcht.