Amtsgericht Bremervöör

Dat Amtsgericht Bremervöör is een von de acht Amtsgerichten in’n Landgerichtsbezirk Stood. Dat hett sien Seet in Bremervöör in’n Landkreis Rodenborg.

Överornt Gerichten

Dat Amtsgericht Bremervöör sünd in’n Instanzentog dat Landgericht Stood, dat Oberlandsgericht Celle un de Bundsgerichtshoff in Karlsruhe överornt.

Geschicht

Mit dat hannöversche Gerichtsverfatensgesett von’n 8. November 1850, dat an’n 1. Oktober 1852 in Kraft gahn is, sünd Verwaltung un Justiz kumplett trennt worrn un de Amtsgerichten sünd as ünnerst Gerichten inricht worrn. Dat Amtsgericht Bremervöör is dor denn nee schapen worrn un hett de Gerichtsborkeit övernahmen, de vörher bi de Amtslüüd von dat Amt Bremervöör legen hett. Överornt weer dat Obergericht Stood. Toeerst hett dor man een Richter arbeidt un so üm un bi 1900 hett dat denn en twete Richtersteed geven.

1859 hett dat Amtsgericht Bremervöör dat Kaspel Loomst an dat Amtsgericht Oosten afgeven un de Kaspels Karkwist un Kuhs (utbenahmen de Gemeen Giehl mit Giehlermöhlen un Giehlermoor) von dat oplööste Amtsgericht Beverst tokregen. Ok för dat Kaspel Sürsen un de Gemenen Plönjeshusen un Bokel, de vörher to’n Bezirk von dat Amtsgericht Zeven tohöört hebbt, weer dat Amtsgericht Bremervöör nu mit tostännig.

Na dat Enn von’n Tweten Weltkrieg sünd all Gerichten in Düütschland dichtmaakt worrn. Dat Amtsgericht in Bremervöör hett an’n 1. Dezember 1945 wedder apenmaakt^[1].

Amtsrichters

~1858: Ernst Theodor Fischer
1869–: Cramer

Gerichtsgebüüd

Dat Gericht weer toeerst in dat Landraadsamt in de Amtsallee ünnerbröcht. 1898 is dat von de Firma Bröder Knackstedt ut Geestmünn nee boote Amtsgerichtsgebüüd inwieht worrn. Een Johr later keem dor ünner annern noch en Fängnis to. 1900 is güntsiet dat Gericht en Wahnhuus för den Amtsrichter boot worrn. Dat Gericht is ok vondaag noch in de Gebüüd in de Amtsallee ünnerbröcht^[1].