Amt Oterndörp
Dat Amt Oterndörp weer en Verwaltungsrebeed in Bremen-Veern un in dat Königriek Hannover mit Seet in Oterndörp binnen de Landdrostie Stood. Dor hebbt groff de hüdige Samtgemeen Land Hadeln un de oosten Delen von de hüdige Stadtgemeen Cuxhoben tohöört.
Dat Leid över dat Amt harr bet 1867 en Amtmann. In de Prüßentied na 1867 hett de eerste Beamte Amtshauptmann heten.
Dat Amt weer en reine Domanialverwaltung, de Justiz weer egenstännig organiseert.
Dat Amt Oterndörp is bi de Verwaltungs- un Justizreform an’n 1. Oktober 1852 ut dat ole sülvstännige Land Hadeln ahn de Stadt Oterndörp billt worrn. Hadeln weer in twee Stänn indeelt. De eerste Stand (Hoogland mit besünners goden Maschbodden) bestünn ut de söven Kaspels Olenbrook, de Worth, de Lee, Neenkarken, Oosterbrook un dat Oosterenn un Westerenn von Oterndörp. De twete Stand (Siedland mit deelwies Masch- un deelwies Moorbodden) weren de fiev Kaspels Ooster- un Wester-Helmworth, Godshem, Steenau un Wannen.
Dat Amt weer tohoop mit de Stadt Oterndörp 326 km² groot.
As Gericht för dat Amt is to’n 1. Oktober 1852 dat Amtsgericht Oterndörp inricht worrn.
Nadem dat Königriek Hannover 1866 an Prüßen kamen is, sünd 1867 Stüürkreise in de ne’e Provinz Hannover inricht worrn. Dat Amt hett denn to’n Stüürkreis Oterndörp tohöört.
Bi de Verwaltungsreform in Prüßen to’n 1. April 1885 is dat Amt Oterndörp oplööst worrn un dor is tohoop mit de Stadt Oterndörp de Kreis Hadeln von worrn.
Inwahnertall
[ännern | Bornkood ännern]| Johr | Inwahners |
|---|---|
| 1848[1] | 15.546 Lüüd, 2.696 Hüüs |
| 1867[2] | 15.751 |
Amtlüüd
[ännern | Bornkood ännern]- 1853–1857: Joachim Ferdinand Heins
- 1857–1859: Heinrich Holtzermann
- 1860–1864: Carl Franz August Meyer
- 1864–1879: Otto Gustav Hesse
- 1879–1885: Alexander Sostmann
Footnoten
[ännern | Bornkood ännern]- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 172: http://books.google.de/books?id=eOI-AAAAcAAJ&pg=PA172
- ↑ Zeitschrift des Königlich preussischen statistischen Landesamts. Band 8, http://books.google.de/books?id=gHdKAAAAYAAJ&pg=PA149
Hartogdom Bremen: Stadt Stood | Stadt Buxthu | Stadt Bremervöör | Amt Achem | Amt Beers* | Amt Beverst* | Amt Blomendal | Amt Bremervöör | Amt Dorum | Amt Freeborg | Amt Hagen | Amt Harsfeld | Amt Himmelpoorten | Amt Hornborg* | Amt Jörk | Amt Leendaal | Amt Leh | Amt Lesum* | Amt Neehuus | Amt Oosten | Amt Oosterholt | Amt Otterbarg* | Amt Stood* | Amt Wischhoben* | Amt Zeven
Hartogdom Veern: Stadt Veern | Amt Rodenborg | Amt Snevern* | Amt Veern
Land Hadeln: Stadt Oterndörp | Amt Oterndörp
* bet 1859
