Amtshauptmann

Amtshauptmann is en olen Utdruck för en hogen Verwaltungsbeamten.

De Amtshauptmann harr dat Leid över en territorial afgrenzt Amt. De Ämter weren Orgaan von de Verwaltung dör den Landsförst un sünd in dat Late Middelöller un in de fröhe Neetied opkamen in de Rebeden von dat Ole Riek un in Däänmark. Wat de Amtshauptlüüd för Rechten un Plichten harrn, weer von Land to Land temlich verscheden. Se harrn faken Opgaven in dat Gerichtswesen, in de Finanzverwaltung un bi de Stüürn, wat seldener ok bi dat Verdeffenderen von dat Land.

Besünners fröh un good organiseert hett sik de Amtsverfaten in Prüßen un in dat Kurförstendom Sassen utbillt. Von 1838 bet 1938 harrn Amtshauptlüüd dat Leid över de sassischen Amtshauptmannschoppen. Mit de Drüdde Verordnung över den Neeopbo von dat Riek von’n 28. November 1938 sünd de Utdrück för de Verwaltungsämter in dat Düütsche Riek eenheitlich maakt worrn. Dorüm sünd to’n 1. Januar 1939 ut de Amtshauptlüüd, de dat to de Tied in Sassen un Ollnborg noch geven hett, Landrääd worrn.

In dat Königriek Hannover hebbt de Baaslüüd von en Amt Amtmann heten. As Hannover 1867 von Prüßen övernahmen un to de prüüßsche Provinz Hannover ümwannelt worrn is, sünd ut de Amtlüüd Amtshauptlüüd worrn. Amtshauptlüüd hett dat in Hannover denn bet to de Reform an’n 1. April 1885 geven, as de Ämter to Kreise un de Amtshauptlüüd to Landrääd worrn sünd.