Kührst
| Wapen/Flagg | Koort | |
|---|---|---|
|
|
| |
| Basisdaten | ||
| Inwahners: | ||
| Hööchd: | 5 m över NN | |
| Postleettall: | 27624 | |
| Vörwahl: | 04708 | |
| Geograafsche Laag: | Koordinaten:53° 35′ N, 8° 48′ O53° 35′ N, 8° 48′ O | |
|
| ||
Kührst (hoochdüütsch Kührstedt) is en Dörp in de Gemeen Geestland in’n Landkreis Cuxhoben, Neddersassen. Binnen de Gemeen höört de Oort to de Oortschop Kührst.
Geografie
[ännern | Bornkood ännern]De Oort liggt op de Geest, an de sik na Süüdoosten un Süden dat siede Moorland an de Strööm von de Wittgeest un Geest anslütt. Siet dat 19. Johrhunnert löppt dör dit siede Land ok de Beers-Geest-Kanaal dör. Dat Water ut dat Rebeed flütt över den Scheebeek, den Wulfahnbeek un Gravens na’n Beers-Geest-Kanaal hen af (fröher na de Wittgeest). In’n Süüdwesten un Noordwesten wasst Holt (Löhbusch un Kührster Holt).
De Naveröörd sünd Alfst, Beers un Lintig mit de Kanaalhütt in’n Noordoosten, Hainmöhlen in’n Oosten, Ringst in’n Süüdoosten, Oolluunbarg un Wehdel in’n Süden, Sellst un Bramel in’n Süüdwesten, Maschkamp un Elm in’n Westen un Drangst in’n Noordwesten.
Grenzen
[ännern | Bornkood ännern]De histoorschen Grenzen von de Feldmark sünd in’n Noorden na Alfst de Scheebeek, in’n Oosten na Lintig un in’n Süüdoosten na Ringst de ole Loop von de Wittgeest un in’n Süüdwesten na Sellst de Loop von de Geest. De Grenz in’n Westen na Elm löppt von de Geest na Noorden merrn dör den Löhbusch, denn von de K 62 af an an’n Quabbenbeek langs un von dor de Westkant von’t Kührster Holt hoog.
Historie
[ännern | Bornkood ännern]Kührst kummt 1139 as Curstide toeerst in de Oorkunnen vör.
In’n Eersten Weltkrieg sünd 13 Soldaten ut Kührst fullen oder vermisst un in’n Tweten Weltkrieg 42.[1]
Verwaltungsgeschicht
[ännern | Bornkood ännern]In de Franzosentied von 1810 bet 1814 hett de Oort to de Mairie Beers in’n Kanton Beverst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1859 to de Vaagdie Kührst von de Böörd Ringst in dat Amt Beers tohöört un denn von 1859 bet 1885 to dat Amt Leh. Na 1885 weer dat in’n Kreis Leh. 1932 is dat Deel von’n Kreis Wersermünn worrn un 1977 von’n Landkreis Cuxhoben.
De Oort hett sik 1968 mit Alfst tohoopslaten un de ne’e Gemeen Kührst billt. Disse Gemeen is 1971 Maat von de ole Samtgemeen Beers worrn un mit de Gemeenreform in Neddersassen an’n 1. März 1974 Deel von de ne’e un gröttere Samtgemeen Beers. Gemeen un Samtgemeen sünd to’n 1. Januar 2015 oplööst worrn. Dat Rebeed is denn Deel von de Eenheitsgemeen Geestland worrn.
Inwahnertall
[ännern | Bornkood ännern]| Johr | Inwahners |
|---|---|
| 1791[2] | 32 Füürsteden |
| 1812[3] | 221 |
| 1824[4] | 51 Füürsteden |
| 1848[5] | 279 Lüüd, 55 Hüüs |
| 1. Dezember 1871[6] | 326 Lüüd, 63 Hüüs |
| 1. Dezember 1910[7] | 380 |
| 1925[8] | 398 |
| 1933[8] | 416 |
| 1939[8] | 421 |
Religion
[ännern | Bornkood ännern]Kührst is evangeelsch-luthersch un evangeelsch-reformeert präägt un höört to dat Kaspel von de Simultankark St. Fabian in Ringst.
För de Kathoolschen is de Hillig-Hart-Jesu-Kark in Leh tostännig, to de ok de St.-Benedikt-Kapell in Beers tohöört.
De Karkhoff Kührst liggt an de Dörpstraat.
Wapen
[ännern | Bornkood ännern]Dat Wapen von Kührst wiest op grönen Grund en sülvern Reiher mit gollen Snavel un Been, de na vörn kickt. Vörn blangen den Reiher is en gollen Kleverbladd to sehn.
Kultur
[ännern | Bornkood ännern]En Denkmaal för de Fullenen ut de twee Weltkrieg’ steiht op’n Karkhoff.
Verenen
[ännern | Bornkood ännern]De Schüttenvereen Kührst is 1909 grünnt worrn un de Sportvereen TSV Kührst an’n 25. April 1912.
Weertschop un Infrastruktur
[ännern | Bornkood ännern]Kührst hett en egene freewillige Füürwehr.
De Filiaal von de Volksbank Bremerhoben-Cuxland in Kührst hett 2013 dichtmaakt.
Verkehr
[ännern | Bornkood ännern]Dör Kührst löppt de Kreisstraat 38, de in’n Noorden över Alfst na de L 119 un Beers geiht un in’n Süüdoosten na Ringst un dor an de Landsstraat 128 ran. In’n Westen geiht von de K 38 de K 62 af na Elm an de K 60. De K 60 wedder geiht in’n Süüdwesten över Maschkamp un Bramel na Schippdörp un in’n Noorden na Drangst an de L 120.
De nächste Autobahn is de Autobahn 27 (Afsnidd Bremerhoben–Cuxhoben). De Opfohrt 5 Debst liggt so 14 Kilometer in’n Noordwesten von Kührst an de L 120 un de Opfohrt 8 Geestmünn liggt 16 Kilometer in’n Süüdwesten an de Bremerhobener Poristraat.
De nächste Bahnhoff is so bi twölv Kilometer wied weg in’n Süüdoosten de Bahnhoff Geestenseth an de Bahnlien Bremerhoben–Buxthu. Von 1896 bet 1968 hett dat ok Personenverkehr op de Bahnlien Bremerhoben–Beers geven. De Bahnhoff Beers leeg söven Kilometer in’n Noorden von’n Oort.
In’n Süden von Kührst liggt de Sünnerlannplatz Kührst, de för lütte Flegers bet 2 Tunnen MTOW tolaten is. De Lannplatz warrt von’n Flegerclub Bremerhoben bedreven.
Scholen
[ännern | Bornkood ännern]De Grundschool Kührst/Ringst is to’n 31. Juli 2015 dichtmaakt worrn un höört nu to de Grundschool Drangst/Elm. De School in Kührst schall as Butensteed aver noch tominnst bet 2018 wiederbedreven warrn.
Dat Schoolhuus in Kührst is 1952 boot worrn. De Sportünnerricht is in de Sporthall von’n TSV Kührst.
Lüüd
[ännern | Bornkood ännern]De Politiker Hinrich Schniedewind is 1928 in Kührst boren.
Literatur
[ännern | Bornkood ännern]- Hinrich Schniedewind (Rutgever): Kührstedt und Alfstedt. 1139-1989. Ditzen Verlag, Kührst 1989
Footnoten
[ännern | Bornkood ännern]- ↑ http://www.denkmalprojekt.org/2009/kuehrstedt_wk1u2_ns.htm
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 133
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 103
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 346
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 131
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 152
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
