Wittgeest

Vun Wikipedia
Zur Navigation springen Zur Suche springen
Wittgeest
Laag Landkreis Cuxhoben
Stroomsystem Werser
Born bi Hain
Münn bi Kührst in de Geest

De Wittgeest is en Beek, de von rechts in de Geest münnt.

De Wittgeest hett keen richtigen Born. Se spiest sik ut Gravens, de in’n Noorden von Hain tohoopfleten doot un ünner annern Water ut dat Lange Moor opnehmt. De Wittgeest flütt von dor na Westen un nimmt bi Wisswohl dat Water von’n Meckelster Graven op, de sien Born bi Meckelst hett. De Beek dreiht denn bilütten na Süüdwesten un flütt dör Hainmöhlen.

De fröhere Loop von de Wittgeest güng denn an Ringst langs, weer mit’n Ringster See verbunnen un is in’n Süden von Kührst in de Geest münnt. Vondaag münnt de Wittgeest aver al in’n Westen von Hainmöhlen in’n Beers-Geest-Kanaal, de 1860 boot worrn is. De Loop von Hainmöhlen bet na de Münn besteiht nu blots noch ut Gravens.

Dat Water flütt över den Beers-Geest-Kanaal na de Geest un von dor na de Werser un in de Noordsee.

Den eersten Versöök, en Kanaal von’n Beerser See na de Wittgeest to graven, hebbt de Lüüd in’t Haadler Siedland al in’t 17. Johrhunnert maakt. Dat is aver von’n Arzbischop von Bremen stoppt worrn. De twete Versöök weer 1768/1769. Dat hett aver nich recht klappen wullt, se kunnen dat Water nich looswarrn, vonwegen dat dat Gelänn nich bargdal güng un de Schoppmöhlen nich noog Water schöppen kunnen.