Mairie Beers

De Mairie Beers weer in de Franzosentied (1810 bet 1813) een von de fiev Mairien, in de de Kanton Beverst indeelt weer. De Seet weer in Beers. Se harr 2433 Inwahners.

Historie

De Ümgegend von Beers hett vör de Franzosentied to dat Amt Beers in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Beers een von de acht Mairien in’n Kanton Beers von’n Distrikt Bremervöör, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Beers weer nu een von de fiev Mairien in’n Kanton Beverst, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de veer Mairien Beers, Flögeln, Elm un Ringst (all veer in’n Kanton Beers) höört harrn. Von de Mairie Ringst is blots de Oort Alfst in de Mairie Beers wesselt. De Rest is bi de Mairie Ringst bleven.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Beers, Holterborg

• Kaiserriek Frankriek:

  Beers (1037 Inwahners), Neemöhlen (9), Alfst (189), Flögeln (309), Fickmöhlen (54), Drangst (196), Kührst (221), Elm (250), Maschkamp (162), Holterborg (6)

Vondaag sünd düsse Öörd Deel von de Gemeen Geestland.