Mairie Ringst
De Mairie Ringst weer in de Franzosentied (1810 bet 1813) een von de fiev Mairien, in de de Kanton Beverst indeelt weer. De Seet weer in Ringst. Se harr 1813 Inwahners.[1]
Historie[ännern | Bornkood ännern]
De Ümgegend von Ringst hett vör de Franzosentied to de Vaagdie Bremervöör von dat Amt Bremervöör, dat Amt Beers un de Bezirken von dat Borggericht Oolluunbarg un dat Arvgericht Beverst (all beid to dat Gericht Beverst) in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Ringst een von de acht Mairien in’n Kanton Beers von’n Distrikt Bremervöör, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Ringst weer nu een von de fiev Mairien in’n Kanton Beverst, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to fiev Mairien höört harrn: de Mairien Ringst, Köhlen un Lintig ut’n Kanton Beers un de Mairien Frellsdorp un Oolluunbarg ut’n Kanton Beverst. De Mairie Ringst müss den Oort Alfst an de Mairie Beers afgeven. Von de Mairie Frellsdorp is allens utbenahmen de Oort Wolljes an de Mairie Ringst gahn. Wolljes is in de Mairie Beverst wesselt. Von de Mairie Lintig is de gröttere Deel an de Mairie Loomst gahn. De Rest keem an de Mairie Ringst. Von de Mairie Oolluunbarg is de grote Deel an de Mairie Ringst gahn, blots de lüttje Oort Böcken is an de Mairie Bexhöv fullen.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd[ännern | Bornkood ännern]
Dor hebbt düsse Öörd tohöört:
- Kaiserriek Frankriek:[1]
- Ringst (390 Inwahners), Köhlen (413), Grotenhain (57), Lüttenhain (12), Geestenseth (156), Frellsdorp (202), Wehdel (158), Oolluunbarg (206), Haxhoorn (3), Olenstöhlen (8), Olenkamp (10), Wisswohl (26), Langel (7), Frellsdorpermöhlen (69), Haavkost (42), Havekesch (5), Hainmöhlen (49)
Vondaag sünd düsse Öörd Deel von de Gemenen Geestland, Beverst un Schippdörp.
Footnoten[ännern | Bornkood ännern]
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 103
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 15