Eversdörp

Wapen/Flagg

Koort

Basisdaten

Bundsland: Neddersassen

Landkreis: Rodenborg (Wümm)

Samtgemeen: Geestborn

Flach:

28,8 km²

Inwahners:

1056 (31. Dezember 2023)

14 m över de See

27432

04765, 04768

Koordinaten:53° 32′ N, 9° 3′ O53° 32′ N, 9° 3′ O

Grenzen bi OSM:

1079024

Gemeenslötel:

03 3 57 012

Öörd in de Gemeen:

3

Börgermeester:

Claus Dieter Wagenlöhner (CDU)

Websteed:

www.ebersdorf-nds.de

Koort

Kreis

Eversdörp is en Gemeen in’n Landkreis Rodenborg (Wümm) in Neddersassen. Se höört to de Samtgemeen Geestborn un hett 1056 Inwahners (Stand 31. Dezember 2023). Blangen den Hööftoort höört noch de beiden Oortsdelen Westerbeek un Nee Eversdörp to de Gemeen.

Geografie

De Gemeen Eversdörp liggt in’n Noorden vun’n Landkreis. Se warrt na Noordoosten vun de Gemeen Alfs begrenzt un na’n Süüden vun de Gemeen Oerel. In’n Süüdwesten slutt sik Hipst an. All dree höört ok to de Samtgemeen Geestborn. Na Oosten besteiht ’n lütt Stück Kuntakt na de Eenheitsgemeen Bremervöör, un in’n Noordwesten is de Grenz na’n Landkreis Cuxhoben.

De Landschop is teemlich even un warrt vun de Bueree mit ehr wieten Ackerflachen prägt. In de Gemeen gifft dat Heid- un Wooldrebeden un een poor Moorflachen, de vun en ganze Reeg Wannerweeg dörtogen warrt.

Geologie

En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.

Historie

Eversdörp weer 1272 to’n eersten mol in en Oorkunn nöömt. Ünner den Naam „Everestorppe“ hett dat Dörp to de Börd Oerel höört un stünn lange Tiet ünner dat Regeer vun de Bremer Arzbischöp^[1].

Wiel den Dörtigjohrigen Krieg güng dat de Minschen, de in Eversdörp leven, gresig slecht. Vele Inwahners hebbt üm 1630 rüm jemehr Hüüs un Höff verlaten möten. Dorto keem de Pest, de in de Tiet vun 1626 bit 1628 in’t Rebeet ümgüng. Ut 1706 is överlevert, dat Afgaven an de sweedschen Besetters to betahlen weer, 1715 keem dat Dörp in hannobersche Hannen. In’n „Füerstedenverteken vun 1766“ warrt sössundörtig Wahnsteden angeven. In dat Johr 1750 hebbt 140 Minschen in Eversdörp leevt, hunnert Johren later weern dat 400^[1].

Anfang vun’t 20. Johrhunnert geev dat in Eversdörp ruchweg 500 Inwahners. 1901 warrt dör’n Besluss vun de Gemeen de Liekensmuus afschapt. In de Tiet bit to’n Eersten Weltkrieg warrt veel boet in Eversdörp un de Weeg warrt to Straten utboet. Af 1921 warrt dat Dörp ok mit elektrischen Stroom versorgt, 1927 keem de Ansluss an’t Telefonnett dorto^[2].

Af 1933 weiht över’t Dörp to’n eersten mol de Fahn mit dat Hakenkrüüz un de NSDAP finnt vele Anhangers ünner de 715 Inwahners to de Tiet. 1941 warrt Eversdörp wiel den Tweeten Weltkrieg vun Bomben drapen. An’n 4. un 5. Mai 1945 warrt dat Dörp vun britische Soldaten mit Panzers innahmen. Vun de 108 Mannslüüd, de to’n Krieg inberopen weern, kamt mehr as 40 % nich mehr na Huus^[2].

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Eversdörp in’n Kanton Bremervöör höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Loomst in’n Kanton Bremervöör.

Vör 1885 leeg de Oort in de Vaagdie Bremervöör von dat Amt Bremervöör un is denn Deel von’n Kreis Bremervöör ween, de 1932 mit’n Kreis Zeven to’n ne’en Kreis Bremervöör tohoopleggt worrn is. 1977 is de Oort denn an’n Landkreis Rodenborg kamen.

An’n 1. März 1974 warrt de Gemeen denn in’n Rahmen vun de Gemeenreform in Neddersassen mit de annern Gemenen ümto to de Samtgemeen Geestborn tosamenslaten.

Religion

Eversdörp is evangeelsch-luthersch präägt un höört to dat Kaspel von de Kark in Örel.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Politik

De Gemeenraat vun Eversdörp sett sik ut ölven Raatslüüd tosamen, de op de „gemeensome List Eversdörp“ kandideert hebbt. De letzte Kommunalwahl weer in’n September 2011. De Börgermeester is Claus Dieter Wagenlöhner vun de CDU.

Partei	2016	2011	2006
GL Eversdörp	11	11	11

Kultur

Dat kulturelle Leven warrt vun de Dörpgemeenschoop tosamen bestreden. Dat gifft vele gemeensome Anstalten, as to’n Bispeel dat gemeensome Bööm Planten oder Boen, wobi veel in Egenleistung maakt warrt. De Freetiet kann in verscheden Verenen ok gemeensom verbröcht warrn. De Dörpsgemeenschoop hett to’n Bispeel en Filmgrupp, de dat Dörpslven in’t bewegte Bild fasthollen un archiveeren deit. In’t Förhjohr warrt an dree Avenden jümmer ne’e Filmen un „Oldies“ wiest. Wieter gifft dat in Eversdörp ünner annern en Freewillige Füerwehr, verscheden Choor-Singgruppen, en Schüttenvereen, en Motorsportvereen, den Riet- un Fohrvereen as ok, för den Sport, den TSV Eversdörp vun 1911 e.V.

Weertschop un Infrastruktur

De Volksbank Oosterholt-Scharmbeek hett in Eversdörp in de Hauptstraat 18 en Filiaal.

Verkehr

Dör Eversdörp verlöppt de B 495. In’n Süden münnt se bi Glinn in de B 71 in un verbinnt de Gemeen so mit Bremervöör. Na Noorden föhrt de B 495 wieter na Loomst in’n Landkreis Cuxhoben. De Oortsdeel Westerbeek liggt an de L 119, de vun Eversdörp ut na Bad Beers föhrt. Vun Westerbeek ut kummt en ok na Nee Eversdörp, dat twüschen de L 119 un de K 116 liggt.

Scholen

De Schölers ut dat Dörp gaht na de Grundschool Eversdörp/Alfs in Eversdörp. Later wesselt se na Oberschool op de Geestborn-School in Örel oder na dat Gymnasium Bremervöör.

Borns

Weblenken

Eversdörp. Mehr Biller, Videos oder Audiodateien to’t Thema gifft dat bi Wikimedia Commons.

Städer un Gemenen in den Landkreis Rodenborg (Wümm)

[hist-1] ttp://www.ebersdorf-nds.de/Geschichte/vor1900/vor1900.html

[hist2-2] ttp://www.ebersdorf-nds.de/Geschichte/ab1900/ab1900.html

[1]

[2]