Lysithea (Maand)

Vun Wikipedia

Lysithea (ok Jupiter X) is en vun de lütteren Maanden wieter buten vun den Jupiter. Opdeckt weer Lysithea an’n 6. Juli 1938 vun den US-amerikaanschen Astronom Seth Barnes Nicholson an de Mount Wilson Steernwacht. Nöömt is de Maand na Lysithea, de in de greekschen Mythologie en Leevste vun Zeus weer. Den hüütigen Naam hett Lysithea erst 1975 kregen. Dorvör weer de Maand as Jupiter X betekend.

Ümlopbahn[ännern | Bornkood ännern]

De Maand Lysithea kreist op en Ümlopbahn mit en middleren Afstand vun 11.717.000 km üm Jupiter. Dorvör bruukt he 250 Daag, 4 Stünnen un 48 Minuuten. De Bahn hett en Exzentrizität von 0,1124 un is üm 28,302° gegen den Äquater vun den Jupiter kippt. De Egenschoppen vun de Bahn sünd teemlich liek mit annere Jupiter-Maanden, de as de Himalia-Grupp tohopenfaat warrt.

Egenschoppen[ännern | Bornkood ännern]

Lysithea tellt mit en middleren Dörmeter vun 36 km to de lütteren Maanden. De Böverflach wiest en Albedo vun blots 0,04 op – dat heet, dat blots 4 % vun dat infallend Licht wedder torüchstrahlt warrt. Dormit höhrt he to de düsteren Maanden. De Dicht liggt bi 2,6 g/cm³. Dat is recht veel, wat vermoden lett, dat Lysithea to’n gröttsten Deel ut Silikat-Steen opboot is.