Himalia-Grupp

Vun Wikipedia
Wesseln na: Navigatschoon, Söök
Dat Diagramm wiest de Bahnhalfassen (in Mio. km, waagrecht Ass) un de buteren Jupiter-Maanden gegen de Inklinatschoon (in °, Halfbagen) dor. De roten Kreisen düüdt de Maandradien an. De gelen Lienen markkeert den Speelruum twüschen den neegsten un wietsten Punkt vun’n Jupiter.
Utsnitt ut dat bövere Bild, welk de Himalia-Grupp wiesen deit.

De Himalia-Grupp is en Koppel vun fief irreguläär Maanden, de sik üm den Planet Jupiter bewegen doot. Se warrt tosamenfaat, wieldat se all teemlich lieke Ümloopbahnen hebbt.

De Himalia-Grupp is nöömt na den gröttsten Maand Himalia binnen de Koppel, de anneren veer sünd Leda, Lysithea, Elara un S/2000 J 11. Jemehr Bahnen wiest all en düchtig grote Exzentrizität un ok en grote Bahnnegen (Inklinatschoon) gegen de Äquatereven vun’n Jupiter op. De fief Maanden hebbt aver all en rechtlöpigen Ümloop (prograd), dat heet, se loppt üm den Planeten in de lieke Richt as he ok roteert.

De buteren Jupitermaanden, de disse Egenschoppen hebbt, kriegt siet 1976 Naams, de op a ennen doot. Dorgegen warrt irreguläre Jupitermaanden mit torüchlöpigen Bahnen (retrograd) mit Naams betekent, de op e endt. Reguläär Maanden sünd jümmer prograd.

Himalia is nich blots de gröttste Maand vun disse Koppel, man togliek ok de föfftgröttste vun all Jupitermaanden. De Wetenschopplers glöövt vun wegen de lieken Bahnegenschoppen, dat de hele Koppel fröher mol en enkelten Asteroid wesen is, de vun den Jupiter sien Gravitatschoon infungen weer un dör dat Inwirken vun Tiedenkräft över de Johren twei broken is.