Himalia (Maand)

Vun Wikipedia
Wesseln na: Navigatschoon, Söök

Himalia (ok Jupiter VI) is en von de Maanden wieter buten von den Planet Jupiter, man dorvon en von de grötteren. De Maand is an’n 3. Dezember 1904 von den US-amerikaanschen Astronomen Charles Dillon Perrine an de Lick-Steernwacht in Kalifornien opdeckt worrn. De Naam kummt ut de greeksche Mythologie, wo de Nymphe Himalia en Leevste von Zeus weer. De Naam is aver eerst 1975 vergeven worrn.

Ümloopbahn[ännern | Bornkood ännern]

Himalia hett en middleren Afstand von’n Jupiter von üm un bi 11.461.000 km. He bruukt för een Ümloop ungefäähr 250 Daag, 13 Stünnen un 35 Minuuten. De Maandbahn is üm 27,496 ° gegen den Äquater von’n Jupiter kippt un hett mit 0,1623 ok en teemlich groote Exzentrizität. Dat bedüüd, de Bahn is nich fein rund, man ’n beten in de Läng tagen. De Bahn is von de Egenschoppen en beten liek mit noch en paar annere Maanden. De warrt as de Himalia-Grupp betekend, as Himalia de gröttste von disse Maanden is.

Egenschoppen[ännern | Bornkood ännern]

Himalia hett en Dörmeter von rund 170 km. De Dicht is op 2,6 g/cm³ bestimmt worrn, wat teemlich groot is. De Wetenschoplers gaht dorvon ut, dat de Maand gröttstendeels ut Silikat-Steen besteiht – as de anndern ut de Grupp ok. De Bavenflach hett en Albedo von 0,04 – blots 4 % von dat Licht, dat ankummt, warrt ok wedder trüggstrahlt. In 7:47 Stünnen dreiht sik Himalia eenmol üm de egen Ass.

An’n 19. Dezember 2000 hett de Ruumsond Cassini-Huygens Biller von Himalia na de Eer schickt, as se an den Jupiter vörbi flogen is. De Sond weer man teemlich wiet weg, so dat keen Enkelheiten künnig warrt.