Herse (Maand)

Vun Wikipedia

Herse (ok Jupiter L) is en vun de lütten Maanden wieter buten vun den Planeten Jupiter.

Opdeckt weer de Maand an’n 6. Februar 2003 dör en Koppel vun Astronomen vun de Universität vun Hawaii. Toeerst weer he as S/2003 J 17 betekent, later denn, in’t Johr 2009, hett he den Naam Herse kregen.

Ümloopbahn[ännern | Bornkood ännern]

Herse löpt in en middleren Afstand von 22.992.000 km üm den Jupiter un bruukt dorför 714 Daag, 11 Stünnen un 17 Minuuten. De Maand hett en Exzentrizität vun 0,2378 un wiekt also mit sien Bahn bannig vun en Kreis af. De Bahn is butendem üm 164,917° gegen de Jupiter-Bahn neegt. Dormit hett Herse en retrograden Ümloop, also gegen den Dreihsinn vun’n Jupiter üm den Planeten.

Vun wegen disse Bahnegenschoppen warrt de Maand to de Carme-Grupp tellt, de na denn Jupiter-Maand Carme nöömt is. Dat is neemlich de gröttste ut de Koppel. Ut disse Koppel is Herse de Maand, de an’n dichtsten to’n Jupiter steiht.

Physikalsch Egenschoppen[ännern | Bornkood ännern]

De Dörmeter vun Herse is üm un bi 2 km, he is also bannig lütt. De Dicht warrt op 2,6 g/cm³ schätzt. Man nimmt an, dat de Maand vör allen ut Silikat-Steen besteiht. Herse is ok bannig düster. De Bavenflach reflekteert blots 4 % vun dat infallen Sünnlicht torüch. Man seggt, he hett en Albedo vun 0,04.