Autonoe (Maand)

Vun Wikipedia
Wesseln na: Navigatschoon, Söök

Autonoe (ok Jupiter XXXVIII) is en vun de lütten buteren Maanden vun’n Planet Jupiter. Opdeckt weer de Maand an’n 10. Dezember 2001, neemlich vun en Koppel US-amerikaansche Astronomen vun de University of Hawaii ünner dat Regeer vun Scott S. Sheppard. Nöömt is de Maand na de Figur Autonoë ut de greekschen Mythologie. Dat is de Süster vun Semele. De vörlöpige Beteken vun den Maand weer toeerst S/2001 J 1.

Ümloopbahn[ännern | Bornkood ännern]

Autonoe löpt op en Ümloopbahn in en middleren Afstand vun 23.039.000 km vun’n Planeten. För een Ümloop bruukt he üm un bi 762 Daag un 12 Stünnen. De Bahn hett en bannig grote Exzentrizität vun 0,334 un is üm 152,9 ° gegen den Äquater vun’n Jupiter kippt. De Bewegen vun den Maand is dormit retrograd, dat heet, dat sik Autonoe gegen den de Richt vun de Rotatschoon vun den Jupiter bewegen deit. De physikaalsch Egenschoppen vun de Bahn is liek as en poor annere Maandbahnen ok. Disse Maanden warrt dorüm tohopenfaat to de Pasiphae-Grupp, nöömt na den gröttsten Maand ut de Grupp.

Egenschoppen[ännern | Bornkood ännern]

Autonoe hett en middleren Dörmeter vun üm un bi 4 km un tellt dormit to de ganz lütten Maanden. De Böverflach vun den Maand wiest en Albedo vun blots 0,04 op – dat heet, dat blots 4 % vun dat infallend Licht wedder torüchstrahlt warrt. Dorüm is de Maand ok bannig düster. De Dicht warrt op ruchweg 2,6 g/cm³ schätzt. Dorut warrt vermodt, dat Autonoe vör allen ut Silikat-Steen opboot is. Ok dor is de Maand liek de annern ut de Pasiphae-Grupp.