Carpo (Maand)

Vun Wikipedia
Wesseln na: Navigatschoon, Söök

Carpo (ok Jupiter XLVI) is een vun de lütten Maanden buten vun den Planet Jupiter.

De Maand is an’n 9. Februar 2003 vun en Koppel vun Astronomen ünner dat Regeer vun S. Sheppard opdeckt worrn. De Naam kummt ut de greeksche Mythologie vun Carpo, de een vun de Horen weer. De Naam is aver eerst 2005 vergeven worrn, de vörlöpige Beteken vun den Maand weer S/2003 J 20.

Ümloopbahn[ännern | Bornkood ännern]

Carpo löppt in en middleren Afstand von 16.989.000 km üm Jupiter un bruukt dorför so üm un bi 456 Daag, 2 Stünnen un 24 Minuuten. De Maandbahn is üm 51,395 ° gegen den Äquater von’n Jupiter kippt He is de butenste vun de Maanden, de prograd üm den Planeten lopen deit, also in de lieke Richt, as ok de Rotatschoon vun Jupiter stattfinnt. Carpo hett butendem ok en temlich groot Exzentrizität vun 0,4297. Dat bedüüt, dat de Bahn bannig dull vun de Kringform afwieken deit un to en Ellips langtogen is.

So as bi Themisto schient Carpo nich to en vun de Maand-Koppels to hören, de lieke Bahnegenschoppen opwiesen doot. De Bahnnegen liggt an de Grenz vun’n Kozai-Effekt, de en periodischen Wessel twüschen de Exzentrizität un de Bahnnegen utlöst. Wenn de Bahnnegen groot noog warrt kann de Exzentrizität so groot warrn, dat de Maand in sien Periapsis in de Neeg vun de Galileischen Maanden kummt. Dat kann dorüm also angahn, dat Carpo een Dag mit en vun de groten Maanden tohopstöten deit oder dör de Gravitatschoonskräft ut dat Jupitersystem sleudert warrt.

Egenschoppen[ännern | Bornkood ännern]

De Maand hett en Dörmeter vun rund 3 km un is dormit also een vun de ganz lütten. De Dicht is op 2,6 g/cm³ bestimmt worrn, wat teemlich groot is. De Wetenschopplers gaht dorvun ut, dat Carpo gröttstendeels ut Silikat-Steen besteiht. De Bavenflach hett en Albedo vun 0,04 – blots 4 % vun dat Licht, dat ankummt, warrt ok wedder torüchstrahlt.