Elara (Maand)

Vun Wikipedia
Wesseln na: Navigatschoon, Söök

Elara (ok Jupiter VII) is een von de Maanden wieter buten von den Planet Jupiter. De Maand is an’n 2. Januar 1905 von den US-amerikaanschen Astronomen Charles Dillon Perrine an de Lick-Steernwacht opdeckt worrn. De Naam kummt ut de greeksche Mythologie von Elara, de een Leevste von Zeus weer. Dissen Naam kreeg de Maand ober eers 1975.

Ümloopbahn[ännern | Bornkood ännern]

Elara löppt in en middleren Afstand von 11.741.000 km üm Jupiter un bruukt dor so üm un bi 259 Daag, 15 Stünnen un 22 Minuuten för. De Maandbahn is üm 26,627 ° gegen den Äquater von’n Jupiter kippt un hett ok en temlich groot Exzentrizität. Dat bedüüd, de Bahn is nich fein rund, man ’n beten in de Läng tagen. De Bahn is von de Eegenschoppen en beten gliek mit den Maand Himalia un warrt dorüm to de Himalia-Grupp rekent.

Egenschoppen[ännern | Bornkood ännern]

De Maand hett en Dörmeter vun rund 86 km. De Dicht is op 2,6 g/cm³ bestimmt worrn, wat teemlich groot is. De Wetenschopplers gaht dorvun ut, dat Elara gröttstendeels ut Silikat-Steen besteiht. De Bavenflach hett en Albedo von 0,04 – blots 4 % vun dat Licht, dat ankummt, warrt ok wedder torüchstrahlt. In 12 Stünnen dreiht sik Elara eenmol üm sik sülvst.