Wikipedia:Utwählt Artikel dissen Maand/Geografie
Düsse Sied wiest de uutwählt Artikels to’n Thema „Geografie“.
Artikels
[Bornkood ännern]2008
[Bornkood ännern]
Ägypten is en noordafrikaansch Land, dat twüschen de Middellannsche See un dat Rode Meer liggt. De gröttste Deel vun’t Land warrt vun Wööst innahmen, man bekannt is Ägypten sünners för’t Sinai-Halfeiland mit den Sueskanal un den bannig langen Nil-Stroom, de dör dat so nöömte Nildaal mit sien fruchtboren Bodden löpt. In’t Öllderdom geev dat in Ägypten en mächtige Hoochkultur mit de Pharaonentiet. De Pharaonen weern to de Tiet de Herrschers över’t Land, de as Söhns vun den Sünngott Re ansehn weern. Na jemehrn Dood kregen se’n Graff in de Pyramiden. De bekannsten staht neeg de Stadt Gizeh. Man, dat ägyptische Grootriek is in de Historie jümmer wedder vun Krieg plaagt worrn un ok besett wesen, so dat de Kultur nich bit in uns Tiet överduert hett. Politisch is Ägypten vundaag en Präsidialrepubliek, de Liddmaat vun de Araabschen Liga is. Ruchweg 80 Millionen Minschen leevt in Ägypten.
2009
[Bornkood ännern]
Revel (Tallinn) is de Hööftstadt vun Eestland un höört to de ollen Hansestäder. De Historie vun Revel füng, as dat annahmen warrt, Mitt vun’t 11. Johrhunnert an mit en holten Borg baven op’n hüütigen Dombarg, woneem sik mit de Tiet en Hannelsplatz ümto billt hett. Histoorsch hett de Stadt vele ünnerscheedliche Phasen beleevt, is fröh vun de Dänen innahmen worrn, un stünn later ünner’t Regeer vun Sweden, vun Russland un höör noch later to de Sowjetunion bit Eestland 1991 unafhangig worrn is. Vundaag leevt in Revel ruchweg 400.000 Minschen. In de Ooltstadt, de 1997 vun de UNESCO op de List vun’t Weltkulturarv sett worrn is, kann een sik ok vundaag noch Bowarken ut dat Middelöller ankieken.
En Eerdbeven is en Vörgang in de spröden Schichten vun de Eer, de an de Bavenflach den Bodden bannig dull to’n Wackeln bringen kann. Dat kann mitünner so dull wesen, dat de Eer an de Bavenflach apenrieten deit oder Hüüs to’n Instörten bröcht warrt. Se künnt ok Eerdrutschen un in enkelte Fäll sogor Tsunamis utlösen. Eerdbeven tellt dorüm to de Naturkatastrophen. Eerdbeven sünd en Utdruck un Folg vun de Platentektonik, dör de de Lithosphärenplaten, ut de de böverste Deel vun de Eer tohopensett is, gegenenanner bewegt un schaven warrt. Dorbi boet sik in’n Steen so lang Spannung op, bit de Steen tweibrickt un de ansammelte Energie in Form vun seismische Bülgen afstrahlt warrt. De meisten Eerdbeven passeert dorüm an de Ränner vun de tektonischen Platten, so dat de geograafsche Verdelen vun de Epizentren op’n Landkoort de Plattengrenzen natekent.
Dschibuti is en lütt Land in’n Oosten vun Afrika an de Meereng vun Bab el Mandeb. In dat Land hebbt anfangs Nomaden leevt, bit dat Rebeet twüschen dat 7. un 10. Johrhunnert vun araabsche Sultanen islamiseert worrn is. Dschibuti weer autonoom, as Frankriek sik dat Land 1892 anegent hett, üm en militäärsch Gegengewicht to den britschen Haven vun Aden to hebben. 1896 is ut dat Rebeet de franzöösche Kolonie Franzöösch-Somaliland worrn, mit Dschibuti as Hööftstadt. Siet den 27. Juni 1977 is Dschibuti nu as Staat wedder unafhangig. Mit de Verfaten vun 1992 is dat hüüt en Präsidialrepubliek. De Landschop is to’n gröttsten Deel Wööst un Bargen. Dschibuti hett dorüm faken mit Drögen to kämpen, un de mehrsten Nehrmiddel mööt – jüst so as dat Eerdööl för de Energieversorgen – in’t Land inföhrt warrn.
2010
[Bornkood ännern]
Pisa is de Hööftstadt vun de italieenschen Provinz Toskana. Mit ruchweg 90.000 Inwahners is de Stadt nich sünners groot, man dör ehr Wahrteken, den Scheven Toorn, is se wiethen bekannt. Pisa liggt an den Stroom Arno, de de Stadt in twee Hälften deelt. De Ooltstadt liggt an dat rechte Arno-Över, woneem in de Antike de Stadt Pisae legen hett. De fröheste Överlevern vun disse Stadt geiht op dat Johr 225 v. Chr. torüch, as en röömsche Armee an dissen Oort an Land gahn is. Bekannt is Pisa aver ok as Universitätsstadt. Ruchweg de Hälft vun de Inwahners sünd Studenten. An de Universität Pisa hett fröher ok al de beropene Astronom un Physiker Galileo Galilei (1554-1642) arbeit. Sien Huus kann een sik ok vundaag noch in de Ooltstadt vun Pisa ankieken. En wieteren Söhn vun de Stadt Pisa weer Leonardo Fibonacci (~1180-1241), de as een vun de bedüdensten Mathematikers vun’t Middelöller gellt.
Dat Lord-Howe-Eiland is mit en Flach vun 14,6 km² en teemlich lütt Eiland, dat in de Tasmansee (’n Deel vun’n Pazifik) liggt un to dat Staatsrebeet vun Australien höört. Ümto gifft dat noch en poor lüttere Eilannen, de to de gliek nöömte Inselgrupp tosamenfaat warrt. Tostannen kamen is dat Land dör en Hotspot, wat en sünnere Oort vun Vulkanismus is. De See ümto is 2.000 m deep, in’t Tasman-Becken in’n Westen sogors bit 4.000 m. Dat Eiland sülvst besteiht ut Basalt. Wietaf vun annere Eilannen oder vun’t Fastland wiest dat Lord-Howe-Eiland sünnere tyypsche Orden an Deerten un Planten op. Siet 1982 staht ruchweg dree Veerdel vun’t Eiland ünner Naturschuul. In’t glieke Johr is de hele Inselgrupp dör de UNESCO in de List vun’t Weltnaturarv opnahmen worrn. Op dat Eiland leevt ruchweg 300 Minschen.
2011
[Bornkood ännern]
Chile is en Staat in Süüdamerika, de in’t Johr 1818 sien Unafhangigkeit kregen hett. Vörher weer dat en Kolonie vun Spanien. De Oorinwahners vun Chile weern indiaansch. De meisten Indianers in’t Land höört to dat Volk vun de Mapuche. Politisch hett dat Land veel Kriegen beleevt, as den Salpeterkrieg oder den Börgerkrieg vun 1891. En düstern Afsnitt in de chileenschen Historie weer de Diktatur ünner Augusto Pinochet vun 1973 bit 1990, ünner den sien Regeeren eenige dusend Lüüd doodmaakt worrn oder verswunnen sünd. Dat Land liggt to’n gröttsten Deel in de Bargkeed vun de Anden an de Pazifik-Küst, wat en Grund dorför is, dat dat Land in de Historie jümmer wedder mit starke Eerdbeven to kriegen harr, dorünner dat vun 1960 bi Valdivia, wat bit hüüt dat dullste Eerdbeven weer, dat op de Eer je meten worrn is. Dat letzte starke Beven hett 2010 groten Schaden maakt.
De Stadt Esens liggt in Landkreis Wittmund in Neddersassen un hett hüüt knapp 7.000 Inwahners. De Oorsprung vun Esens reckt torüch bit ruchweg in’t Johr 800. Dat eerste mol duukt de Oort 1310 in en Oorkunn op. Lange Tiet weer Esens de Hööftoort vun’t Harlingerland, dat ok lange Tiet na’t Vereenigen mit Oostfreesland noch egenstännig bleven is. As dat Rebeet an Preußen gahn is, güng dat aver vun 1744 an bargdaal mit den Oort, bit sik in’t 20. Johrhunnert mit den Tourismus ok de Weertschop entwickeln de. De Inwahnertall vun Esens is in de Nakriegstiet düchtig anstegen dör de Flüchtlingen to de Tiet. Meten an de Inwahnertall is de Stadt liekers vundaag een vun de lüttsten Städer in Oostfreesland.
De vun Roald Amundsen leit Fram-Expeditschoon weer en norweegsch Antarktisexpeditschoon, de eerstmals bit to’n Süüdpool kommen is. In de Johren van 1910 bit 1913 is Amundsen mit de Fram, de all tweemal in de Arktis insett wurrn weer, in de Bucht vun de Wale, wo he Reeschopp un Hunnen an Land broch un sien Winterquartier upslahn dee. Vun dor truck he mit Hunnenschledden vun sien Basis Framheim ut to’n Süüdpool, de he an’ 14. Dezember 1911, 35 Daag vör sien Konkurrenten Robert Falcon Scott vun de britisch Terra-Nova-Expeditschoon, erreicht hett. Dormit harr he dat „Rennen um den Pool“ wunnen.
2012
[Bornkood ännern]
Windhuk is de Hööftstadt vun Namibia in’n Süüdwesten vun Afrika. De Stadt billt nich blots den politischen Middelpunkt vun’t Land man ok den geograafschen un weertschopplichen. In’t Johr 2011 leven dor ruchweg 320.000 Inwahners. Histoorsch hebbt toeerst de Buren en Kolonie in dat hüütige Stadtrebeet opboet. De Stadt weer aver bi en Krieg twüschen de Namas un Hereros tonichten maakt. De Grundsteen vun de modernen Stadt weer an’n 18. Oktober 1890 leegt, as de Olle Fasten as Militärstüttpunkt in de Kolonie Düütsch-Süüdwestafrika op de Ruinen vun de fröheren Stadt opboet weer. In’n Eersten Weltkrieg is de Stadt denn vun Süüdafrika innahmen un besett worrn. Siet de Unafhangigkeit 1990 hett sik Windhuk düchtig entwickelt un sien Inwahnertall meist verdreefackt.
2013
[Bornkood ännern]
As Ozean warrt en bannig wiet utdehnte Waterflach op de Eer betekent. De Begreep warrt aver ok op annere Himmelskörpers bruukt un beschrifft ok grote Flachen vun annere Fletigkeiten. Op de Eer sünd üm un bi 71 % vun de Böverflach vun Water bedeckt. Disse tosamenhangen Waterflach, de sik vör allen op de Süüdhalfkugel vun kunzentreert, is indeelt in fief Ozeanen, den Pazifischen Ozean, den Atlantischen Ozean, den Indischen Ozean, den Süüdozean un den Arktischen Ozean. Dorto kamt en Reeg vun Nevenmeeren. De Ozeanen hebbt op de Eer en grote Bedüden un warrt wetenschopplich in dat Fackrebeet vun de Ozeanografie utforscht. Se hebbt nich blots groten Influss op dat Klima un dat Weder, man deent ok as Levensruum för vele ünnerscheedliche Oorden vun Deerten.
Sylt is en düütsch Eiland, dat to Sleswig-Holsteen höört un vör de Noordsee-Küst liggt. Sylt höört to de Noordfrees’schen Eilannen un is sülvst mit en Flach vun ruchweg 99 km² dat gröttste Eiland vun disse Inselgrupp un dat veertgröttste Eiland vun heel Düütschland. Bekannt is Sylt för en utprägten Tourismus vunwegen de bedüdenen Kuröörd as Kampen oder Westerland, de feinen Stränn un de Laag in’t Watt. Liekers stellt de Noordsee ok en Gefohr dor, vunwegen dat Sylt – vör allen bi Stormfloten – jümmerto mit Landverlusten to kriegen hett. Mit dat Fastland is Sylt siet 1927 dör den Hindenburgdamm verbunnen, över de een mit de Iesenbahn fohren kann. En Stratenanbinnen na Sylt gifft dat dorgegen nich.
2014
[Bornkood ännern]
Somalia (Somali: Soomaaliya; الصومال aṣ-Ṣūmāl) is en Land ganz in’n Osten vun Afrika, an dat Hoorn vun Afrika. In’n Osten grenzt dat an den Indischen Ozean, in’n Norden an den Golf vun Aden, in’n Westen an Dschibuti un Äthiopien un in’n Süden an Kenia. De Naam vun dat Land kümmt vun dat Volk vun de Somali vun her. Dor höört de meisten Inwahners to un ok in de Länner ümto leevt düt Volk. Somalia is tostanne kamen, as de beiden Kolonien Britisch- un Italieensch Somaliland tohopenslaten wurrn sünd. De beiden sünd 1960 unafhängig wurrn. Vun den Momang af an, dat Siad Barre sien autoritäre Regeerung 1991 afsett wurrn is, hett dat Land in en Börgerkrieg leevt un dat hett bit to’n Upstellen vun en Regeerung för’n Övergang in dat Johr 2000 keen Regeeren geven, de annerwegens gellen laten wurrn is.
De Flagg vun de Bundsrepubliek Düütschland oder Bundsflagg is en Trikolore ut dree gliekgroot horizontaal Balken in Swart, Root un Gold (van baben; heraldisch: „Deelt to Swart, Root un Gold“) mit en Proportschoon 3:5. De heraldisch Kombinatschoon vun Swaart, Root un Gold is all siet dat Middelöller betüügt. En Vörlöper vun de düütsch Flaggen is dat Rieksbanner vun dat Hillig Röömsch Riek. In‘ Kriegsfall keemen wiedere Flagge, as de Rieksstormfahn oder, wenn de Kaiser involveert weer, de Rieksrennfahn, dorto.
Betlehem (ok Bethlehem, Broothusen; hebrääsch: בית לחם, Bet Lechem) is en Stadt in' Westjordanland mit 29.930 Inwahners. De Stadt hörrt to de Palästinensisch Autonomierebeden un grenzt in' Noorden an Jerusalem. Se hett twee Universitäten. To de Agglomeratschoon Betlehem hörrn ok Beit Dschala un Beit Sahur; de letzte Oort hett as Betlehem ok biblisch Bedüüden. Börgermeester vun de Stadt Betlehem is siet Mai 2005 de röömsch-kathoolsch Christ un Dokter in Ruhstand Victor Batarseh. För de 2,1 Mrd. Christen is de Stadt vun en besünner Bedüüden, wiel se nah de Överleefern nah as de Gebortsoort vun Jesus Christus gellt.
2015
[Bornkood ännern]
Stood is de Kreisstadt vun’n Landkreis Stood in Neddersassen. Se liggt twüschen Cuxhoben un Hamborg.
Stood liggt an den westlichen Rand vun Oolland an de Swing, blangen de Elv. In’n Noorden liggt Kehdingen. De Stadt liggt in en Landschap vun flache Maschen un dorin op en Geestspoor, de in de Maschen rinragen deit un bet 14 Meter (Spegelbarg, Steed vun de fröhere Borg) över de Masch ruutkickt.
In Stood sünd hüüt vele fröher egenstännige Öört ingemeent, so as Bützfleet, Haddörp, Hagen un Wiepenkathen.
De Stadtdeel Oollanner Veerdel liggt in’n Oosten von de Ooldstadt un is in de Johren 1960 anleggt worrn.
De Eerdköst is de butenste faste Schicht vun de Eer. Se liggt över den taag-plastischen Eerdmantel. Wenn man de Gröttenproportschonen verglieken will, denn is de Eerdköst för de Eer ruugweg dat, wat bi en Appel de Schell is. De Eerdköst billt tohopen mit den böversten Deel vun’n Eerdmantel de so nöömte Lithosphäär.
Dat Utforschen vun dat Binnere vun de Eer hett vör so bi 200 Johren anfungen. Aver ok de greekschen Naturphilosophen hebbt sik al Gedanken doröver maakt, woans de Eer binnen in opboot is. Mit en eenfach physikaalsch Modell hett Isaac Newton de Eerdafplatten utrekent, un ok de Vulkanismus un de Eerdbeven geven al eerste Henwiesen. Üm 1900 hebbt sik denn na un na de modernen Methoden to’n Utforschen vun de Eer entwickelt as de Gravimetrie, de Seismologie un de Eerdmagnetik.
2016
[Bornkood ännern]
Wittmund is en Stadt in' Noordwesten vun Neddersassen un Kreisstadt vun den glieknnaamigen oostfreeschen Landkreis. Vun de Flach her is se de gröttste Stadt in Oostfreesland, vun de Inwahnertall her liggt se achter Emden, Auerk, Leer un Nörden an fieft Stäe. De Stadt is man blots dünn besiedelt. In de Ruumordnung vun dat Land Neddersassen wurrd Wittmund as Middelzentrum führt.
Historsch hört den Grootdeel vun dat Wittmund Stadtrebeet to dat Harlingerland, dat endgültig eerst 1600 dör den Berumer Vergliek to de Grafschap Oostfreesland keem. Siet 1885 is Wittmund Seet vun den glieknaamigen Landkreis.
Bit to de Gebietsreform 1972 weer de Kreisstadt en Binnenlandgemeend. Nahdem umfangriek anner Oortschapen in de Gemeend mit upnommen wurrn - dorünner Oortschapen, de siet dat 16. Johrhunnert plaanmatig de Harlebucht afrungen wurrn weern, as etwa de Küstenoort Clienensiel - bildt de Noordsee de Noordgrenz vun de Stadt. Clienensiel führt siet 1983 de offiziell Beteken „Staatlich anerkanntes Nordseebad“. De Stadt is in düütlich Maat vun den Tourismus präägt, wobi neben den Küstenbadeoort in de vergangen Jahrteihnten ok dat Binnenland en gröttere Rull innehmen dee.
Argentinien (spaansch: Argentina) is en Republik in den Süüden vun Süüdamerika. Dor leevt 38.592.150 Inwahners (schätzt 2005) up 2.766.890 km². Dat sünd 14 Inwahners/km². Argentinien is de achtgröttste Staat up de Eer un de tweetgröttste in Süüdamerika. Wat de Inwahners angeiht, is Argentinien dat Land mit de drüttmeisten Inwahners in Süüdamerika. De Naam kümmt vun dat latiensche Woort argentum, wat Sülver bedüden deit. De eersten Europäers, de dat Land an sik rieten wollen, dachen, dat se dor veel Eddelmetall holen konnen.
2019
[Bornkood ännern]
Weener ok Weiner is en Lüttstadt in' Noordwesten vun dat Bundsland Neddersassen. Se is de eenzige Stadt vun de historsch Region Rheiderland un erstreckt sück linkssiets vun de Eems. Politisch hörrt Weener siet 1932 to'n Landkreis Leer un weer tovör de Kreisstadt vun den Kreis Weener, de mit dat Rheiderland meest identisch is. De Kreis weer to'n Tietpunkt vun de Uplöösen de lüttste vun Preußen.
In Weener leven 15.430 Minschen (Stand 31.12.2013) up en Rebeet vun 81,24 km². In de Karnstadt Weener leven mit rund 6700 Inwahner knapp 43 Perzent vun all Weeneraner. De Stadt is dör Ingemeenden in dat Johr 1973 stark wussen. 4,4 Perzent vun de Inwahner vun de grensnah Stadt sünd ut de Nedderlannen.
In verleden Johrhunnerten harr Weener en Hafen an de Eems un leeg an de linkseemsch Hannelsroute in dat südlich liggen Mönsterland. Weener weer vör allen dör sien Veeh- un Peermärkte bekannt un hett landwertschaplich Hannelsgöder exporteert. Intüschen spelen Hafen as Worenumslagsoort un Veehhannel kien Rull mehr. Wertschaptlich is Weener vun' Eenzelhannel för de Region Rheiderland, vun de Landwertschap un vun' Tourismus präägt. In de Stadt gifft dat ok eenzelt Industriebedrieven.
Up kulturell Rebeet hett Weener dör dat Organeum Bedüüden. Dorbi hannelt sück dat um en Kultur- un Billenszentrum mit en Museum för Tasteninstrumente, dat inmidden vun de Örgellandschap Oostfreesland liggt, en vun de bedüüdenst Örgellandschapen weltwiet. In de um 1230 baut St.-Georgs-Kark befind sück doröver herut en Örgel vun Arp Schnitger, de as en vun sien Laatwarken gellt. Neben de Georgskark is ünner de Sakralbauwarken de Stapelmoorer Kark to nömmen: De romano-gotische Krüüzkark gellt as en vun de herutragendst Karkenbauwarken vun Oostfreesland.
Koosfeld (düütsch: Coesfeld) is de westfälsche Kreisstadt von’n Kreis Koosfeld mit ca. 35.000 Inwahners in’t Mönsterland in den noorden Deel vun Noordrhien-Westfalen. 809 predigte de Bischop Liutger an den Dag vör sien Dood in en Koosfelder Kark.
Koosfeld kreeg 1197 de Stadtrechten vun’n Bischop vun Mönster un weer inst de Residenz vun de Bischop vun Mönster. Dat Klooster Werden un ok de Grafen vun Cappenberg harrn hier en Hoff.
An den Markt steiht nich blots dat Roothuus, män ok twee kathoolsche Karken: De Lambertikark un de Jesuitenkark St. Ignatius. In de ehrdem romanik Lambertikark steiht dat Koosfelder Krüüz ut dat Meddeloller un de gotisch Apostelfiguren vun Johann Düsseldorp. In Koosfeld gifft dat ok de Jesuitenkark St. Ignatius, wat en groten Saalbo in en Mischmasch vun Gotik un Barock ut dat 17. Johrhunnert is. In de Jesuitenkark steiht de Hoochaltar, de inst in de Sauster Minoritenkark vun 1668 weer.
2020
[Bornkood ännern]
Pforzheim is en Stadt in' Noordwesten vun Baden-Württemberg un liggt an' Noordrand vun den Swaartwald, wo de Strööms Enz, Nagold un Würm tosommenfleeten. Mit ca. 120.000 Inwahner tellt se as Grootstadt un is de achtgröttste Stadt vun Baden-Württemberg. De Stadt is en Zentrum vun den Verdichtensruum Karlsruhe/Pforzheim, de etwa 650.000 Inwahner tellt. Nächstgröötere Städer sünd Karlsruhe, etwa 25 km noordwestlich, un Stuttgart, rund 37 km süüdöstlich. Pforzheim is en eegenständig Stadtkreis un togliek Sitt vun den Enzkreis, vun de dat Stadtrebeet meest vullständig ümslooten is. Se is dorneben Böverzentrum vun de Region Noordswaartwald, un dor gifft dat tallriek wiederführend Scholen as ok en Hoochschool för anwendt Wetenschap (Hoochschool Pforzheim). Pforzheim is en oorsprünglich Römergrünnen. De Naam leit sück vun lat. Port(us) (= villicht „Stroomhafen“ oder „Stapelplatz“) af, den up den Leugensteen vun Friolzheim överleeferten röömschen (Deel-)Naam vun de röömsch Siedlung in dat Stadtrebeet vun Pforzheim.
2021
[Bornkood ännern]
Frentrop (hoogedütsch Essen-Frintrop genäumt) lett am wietessen em Westen van Essen on lett tüschen Essen-Delfken, Essen-Bergrott, Owerhuusen-Bermensfeld on Owerhuusen-Borbeck. Frentrop hät ca. 8.500 Enwönner.
Dän Oet Frentrop wett taum e‘eßen Mol en dän Isenberger Vogteirollen öm 1220 as Vrilincdorpe genäupt. Dä Name hät dat oldnederdütsche Woet freier Mann en sick. Genau gliek gebeldet es Essen-Frillendörp, öm 1220 ok Vrilincdorpe, Frentrup en Gladbeck, öm 1220 Vrilincdorpe, on Frentrop en Marl, öm 1150 Frilingthorpe.
Dän Stadtdeel konn me grondsetzlich än twe Ebenen onnerdeelen: dat em Volksmond sogenäumpte Owerfrentrop met dä St. Josef-Kärke an dä Stroote Hemmelpforten, on Onnerfrentrop met demm Leoplatz (büs 2008 stonn doe dä Herz-Jesu-Kärke). Bowen on onnen lott sick herleien ut dä Randlage Frentrops an dän Südhang vannet Emschedaal. Van dän Schildberg ut kann me wiet öwer dat Daal kieken, wobbie dä geographisch höchße Högde tüschen Reckstroote on Frentroper Stroote op 87,2 m, on dän deipsten am Schemannsfeld met 36 m ö. M. lätt.
2022
[Bornkood ännern]
Meideborg, ok woll Madeborg, (hoochdüütsch Magdeburg) is de Hööftstadt vun dat düütsche Bundsland Sassen-Anholt. In de Stadt leevt um un bi 238.000 Inwahners. Dor is se de tweet grottste Stadt in dat Bundsland, na Halle mit. In Meideborg sitt en evangeelschen un ok en kathoolschen Bischop. In de Stadt gifft dat twee Hoochscholen: Dat sund de Otto-vun Guericke-Universität Meideborg un de Hoochschool Meideborg-Stendal. De Stadt is bekannt vunwegen ehr histoorsch Arvdeel: Kaiser Otto de Grote, de eerste Kaiser vun dat Hillge Röömsche Riek vun 962 af an, hett dor sien Palz in harrt. In dat Johr 2005 hett Meideborg sien 1200. Boortsdag fiert. Vun dat Johr 2010 af an driggt Meideborg ok den Binaam Ottostadt.