Inselgrupp

Vun Wikipedia
Satellitenbild vun de Inselgrupp Kap Verde

As Inselgrupp (Koppel vun Eilannen) warrt en Ansammeln vun dicht bienanner liggenden Eilannen betekent.

Definitschoon[ännern | Bornkood ännern]

Mit den Begreep Inselgrupp warrt mehrere Eilannen to en Koppel tosamenfaat, de teemlich dicht tohopen leegt aver to lieken Tiet wieter weg sünd vun annere Eilannen. Inselgruppen sülvst künnt ut enkelte Eilannen oder ok wedder ut Inselgruppen bestahn, as dat t. B. in’n Süüdpazifik bi de Republiek Vanuatu is.

Meist gliekbedüdend för Inselgrupp is de Begreep Archipel, wat en Frömdwoort ut dat greeksche is un so veel hett as en „See vun Eilannen“. Dormit is en Rebeet vun en See oder Ozean meent, dat veele Eilanenn bargt un ümfaat de Eilannen mitsamt dat Meer dortwüschen.

Eenige Inselgruppen as bispeelswies de Azoren oder de Kerguelen hebbt ünner Water en Drempel, op denn se all tohopen leegt, un künnt dormit geograafsch btw. geoloogsch tosamenfaat warrn. De sünd denn woll ok op de lieke Oort entstahn, faken dör en Hotspot oder as Inselbagen an en Subdukschoonszoon. För’t Tohopenreken vun Eilanenn to Inselgruppen speelt faken aver ok mehr de Politik oder histoorsche un kulturelle Saken en Rull. So is dat ok bi dat Indelen in Ünnergruppen vun an sik tosamenhörend Inselgruppen as to’n Bispeel de Westfreeschen un Oostfreeschen Eilannen.

Manchmol künnt ok all Eilannen vun een Meer oder Nevenmeer to en Inselgrupp tosamenfaat warrn, so as dat bi de Ionischen Eilannen is.

Afhangig vun de Anorden vun de Eilannen, warrt to en Inselgrupp ok Inselbagen oder Inselkeed seggt. En Sünnergrupp stellt de Eilannen dor, de to en Atoll tellt. De warrt den all tosamen as Atoll (Eentall) tohopenfaat.