Oollanner Veerdel

Luftbild von de Stadt Stood mit dat Oollanner Veerdel baven rechts

Dat Oollanner Veerdel is en Deel von de Stadt Stood. Dat Veerdel liggt in’n Oosten von de Ooldstadt na Oolland rut in’n Süden von de Oollanner Straat.

Dat Veerdel is in’n Westen von de Ooldstadt afgrenzt dör den Borggraven un in’n Süden dör de Hollerner Moorwettern. Op de annere Sied von de Moorwettern liggt dat Benedixland. Na Noorden to is dat Süüdöver von de Swing (de Soltdoorsvörstadt) präägt von Gewarf un en Reeg ne’e Hüüs an’n olen Haven. Na Westen to liggt de Wöhrdener Wettern un noch 200 Meter wieder de Landsstraat 111, achter de sik Speersoort anslütt.

Historie

Dat Oollanner Veerdel is in de Johren 1960 plaant worrn, de Boarbeiden hebbt 1967 anfungen. Op en Rebeed von üm un bi 80 Hektar hett dat Ünnernehmen Neue Heimat Plattenbo-Hüüs boot. Na de eersten Plään schullen dor bet to 2000 Wahnungen mit 7000 bet 8000 Bewahners boot warrn, man dor sünd denn doch bloot 600 Wahnungen von worrn. Na de Plään schull dat en Stadtdeel warrn, de besünners modeern un vörwiesbor is un in de eerste Tied is dat ok good lopen. As in’n September 1968 de eerste Wahnungen trech weren, sünd dor glieks veel Lüüd optagen.

Nadem de Neue Heimat in de Tied 1984 bet 1986 pankrott gahn weer, hebbt Firmen de Hüüs opköfft un de enkelten Wahnungen an lüttjere Anlegers wiederverköfft. In disse Tied weren de Wahnungen kuum noch to vermeden un vör allen sozial swacke Meders sünd dor intagen. Över 60 % von de Lüüd stammt ut dat Butenland un meist jüstso veel kriegt Hartz IV.

1988 hett de Stadt in dat Oollanner Veerdel en Butensteed von de Grundschool an’n Borggraven apenmaakt, de 1995 as Montessori-Grundschool sülvstännig worrn is. De School hett 7,1 Milljonen Mark köst.

1999 is de Stadtdeel in dat Programm Soziale Stadt opnahmen worrn, in dat Veerdels mit soziale Problemen besünners stütt warrt. Sietdem hett dat Programm so bi 6 Milljonen Euro investeert. Dat Veerdel warrt von en groten Barg Kameras (so 300 bet 400 Stück) överwaakt. De Kameras staht hier so dicht as kuum jichtens anners in Düütschland.

De grote Plattenbo mit söven Etaaschen an de Jörker Straat is afreten worrn un von dat Grundstück hebbt se Boplätz för Eenfamilienhüüs maakt, dat wedder mehr egenbewahnt Wahnungen in’n Stadtdeel rinkaamt.

Üm 1990 rüm hebbt in dat Oollanner Veerdel so bi 2500 Lüüd wahnt, vondaag (Stand 2010) sünd dat man noch 1600.

De Straten in dat Veerdel sünd na Öörd in Oolland nöömt (Grööndieker Straat, Jörker Straat, Eestbrügger Straat, Königrieker Straat, Middelkarker Straat, Cranzer Straat), to’n Deel ok na Öörd in de dat fröhere Slesien (Waldenburger Straat, Liegnitzer Straat, Grünberger Straat, Hohenfriedberger Straat).

Religion

För de evangeelsch-luthersche Kark höört dat Oollanner Veerdel to de Gemeen von de Wilhadi-Kark in de Binnenstadt von Stood.

Weertschop un Infrastruktur

In de Greundieker Straat 1b hett dat en Filiaal von de Spoorkass Stood-Oolland geven, de 2017 aver dichtmaakt hett. Dat Gebüüd warrt nu von de Stadt Stood to en Begegnungszentrum ümboot.

Verkehr

Dat Veerdel is över de Oollanner Straat in’n Westen an de Ooldstadt von Stood anbunnen un in’n Oosten an de Landsstraten L 111 un L 140, de na Keden un Oolland föhrt. Bet 2016 weer dat de eenzige Straat, de ut dat Veerdel rutföhrt hett. In’n Juni 2016 is de ne’e Steenkarker Straat trech worrn, de dat Veerdel an de Straat An’t Staatsarchiv un dormit an’n Bahnhoff Stood anbinnt. De Bo von de Straat mit Brügg över de Hollerner Moorwettern hett 1,6 Milljonen Euro köst.