Benedixland

Dat Benedixland is en Stadtdeel von Stood, Gemeen Stood, Landkreis Stood, Neddersassen.

Laag

Dat Benedixland liggt twüschen Oollanner Veerdel in’n Noorden, de Gemeen Hullern-Twielenfleet in’n Oosten, Kamp in’n Süden un de Ooldstadt von Stood in’n Noordwesten. In’n Westen slütt sik direkt de Bahnhoff Stood an.

De Ünnergrund is Masch. Geograafsch afgrenzt is dat Benedixland in’n Noorden dör de Hollener Moorwettern, de dat Rebeed ok in’n Oosten von Oolland trennt. In’n Süden un Süüdwesten is de Geestkant von de Stoder Geest de Grenz, an de ok de Nedderelvbahn langslöppt (von de Nedderelvbahn geiht en Gleis na Noorden na dat Industrierebeed op Bützfletersand af). Un in’n Noordwesten is de Borggraven (dör den de Swing flütt) de Grenzlien.

Historie

De Naam Benedixland kummt dorvon af, dat de Wischen dat St.-Marien-Klooster tohöört hebbt, wat en Benediktiner-Klooster weer na de Regeln von Bendix von Nursia.^[1]

Dör den fuchten Masch-Ünnergrund is dat Rebeed bet in dat 21. Johrhunnert blots as Wischen bruukt worrn, ofschoonst dat temlich zentraal in Stood direkt an Bahnhoff un Ooldstadt liggt. Blots an de Kant von’n Borggraven hett dat al fröher Bedrieven geven. Dor sünd ünner annern en Hotel un dat Postamt ansiedelt. Un an de Bahngleise leeg de Stoder Göderbahnhoff.

Dat eerste Gebüüd, dat in’n Oosten von dat Industriegleis nee boot worrn is, weer dat Staatsarchiv Stood, dat 2012 anfungen worrn is un 2014 trech weer. Bi de Boarbeiden is ok en ne’e Straat (de Steenkarker Straat) anleggt worrn, de över de Hollener Moorwettern föhrt un den Bahnhoff un dat Oollanner Veerdel verbinnt.

Siet 2019 loopt Boarbeiden, üm dat Benedixland in en richtigen Stadtdeel ümtowanneln.^[1] Dorför is toeerst en Sanddamm opföhrt worrn, üm en Straat dör dat Maschland antoleggen, de von An’t Staatsarchiv/Steenkarker Straat na de Bahn-Ünnerföhrung Achter’n Diek löppt.^[1] De Ünnerföhrung verbinnt opstunns de Straat An’n Göderbahnhoff mit Kamp. In Tokumst schall de Straat An’n Göderbahnhoff en Sackstraat warrn un de nee anleggte Straat schall dör de Ünnerföhrung na Kamp lopen.^[1] Dör den Sanddamm köst alleen düsse 400 Meter Straat 900.000 Euro.^[1] De Straat warrt woll eerst 2021 trech, denn so lang mutt sik de Sanddamm noch setten.^[1]

Wenn de Straat trech is, warrt dor dat ne’e Finanzamt von Stood (dat ole Finanzamt is in Kamp), dat Jugendamt (opstunns noch in Ottenbeek ünnerbröcht) un en ne’e Kita anleggt.^[1] An de Noordoost-Sied von de ne’e Straat schöölt Wahnhüüs boot warrn.^[1] Allens tohoop sünd dat twölv Hektar Land, de in dat Johr 2019 nee verplaant worrn sünd.^[1]