Staatsarchiv Stood

Vun Wikipedia
Zur Navigation springen Zur Suche springen

Dat Staatsarchiv Stood is en Archiv in de Straat An’n Sann 4c in Stood, dat dat Neddersassische Landsarchiv ünnerordent is. Baas von dat Archiv is Gudrun Fiedler.

Historie un Bestand[ännern | Bornkood ännern]

Nadem de Oorkunnen von dat oplööste Arzbisdom Bremen na’t Enn von’n Dörtigjohrigen Krieg von Bremen na Stood kamen sünd, hebbt de Sweden 1651 dor en Archiv grünnt. 1667 is dor dat Archiv von dat Sticht Veern tokamen. Bet 1712 weer dat Archiv in dat Gebüüd von dat sweedsche Guvernement ünnerbröcht, na 1712 in dat Raadhuus. 1823 is dat Archiv in dat Gebüüd von de Landdrostie bröcht worrn.

1864 sünd denn de Oorkunnen na Hannover bröcht worrn, 1869/1870 un 1898 ok de Akten. An’n 30. September 1959 hett de Neddersassische Ministerpräsident denn per Erlass dat Stoder Staatsarchiv nee inrichten laten. 1962 hebbt se en Neeboo an’n Sann in Stood anfungen, de 1964 trech weer.

Bet 1978 hett dat Archiv de Akten ut den Regerensbezirk Stood sammelt. To de Sammlung höört ok Akten von de Vörwesers von’n Bezirk Stood, de Landdrostie Stood, de Hertogdömer Bremen un Veern, ut de Swedentied un dat Land Hadeln. Nadem de Bezirk an’n 1. Februar 1978 Deel von’n Regerensbezirk Lümborg worrn is, hett dat Archiv ok de Akten von de staatlichen Deenststellen in’n Bezirk Lümborg sammelt. De Akten, de vör 1978 archiveert worrn sünd, liggt aver in’t Hauptstaatsarchiv Hannover. Na dat Enn von de Bezirke in Neddersassen 2004 sammelt dat Archiv wieder de Akten ut dat Rebeed von’n olen Regerensbezirk Lümborg. Dat sünd de Landkreise Celle, Cuxhoben, Horborg, Lüchow-Dannenbarg, Lümborg, Oosterholt, Rodenborg, Heidkreis, Stood, Ülzen und Veern.

Gebüüd[ännern | Bornkood ännern]

En neet Gebüüd för dat Staatsarchiv warrt opstunns in’n Gravenweg in Stood boot. De Grundsteen is an’n 4. Juli 2012 leggt worrn un dat Richtfest weer an’n 10. Dezember 2012. Trech wesen schall dat 2014. In dat ne’e Archiv schöölt blangen de Stoder Akten ok 20 Regalkilometer Grundbook-Akten von de Stadt Hamborg liggen.

Dat ne’e Archiv is 10.000 m² groot un hett alltohoop 50 Regalkilometer Platz. De Kösten för dat Gebüüd sünd 4,6 Millionen Euro, tohoop mit Grundstück, dat Planen etc. köst dat 22,3 Millionen Euro. De Front von dat Gebüüd is ut Backsteen un Glas boot. Dat hett twee Delen, dat 18 Meter hoge Magazin un dor vör sett en twee Stockwark hogen Bo, in den Büros, de Bibliothek mit Leessaal un annere Rüüm ünnerbröcht sünd.

Literatur[ännern | Bornkood ännern]

  • Erich Weise: Geschichte des niedersächsischen Staatsarchivs in Stade nebst Übersicht seiner Bestände. Veröffentlichungen der Niedersächsischen Archivverwaltung, Band 18, Göttingen 1964

Weblenken[ännern | Bornkood ännern]

Commons-logo.svg Staatsarchiv Stood. Mehr Biller, Videos oder Audiodateien to’t Thema gifft dat bi Wikimedia Commons.