Bundsautobahn 26

Vun Wikipedia
(wiederwiest vun Opfohrt 5 (A 26))
Bundsdüütsche Autobahntall 26
Verloop von de plaanten A 20 un A 26
Luftbild Affohrt Dullern

De Bundsautobahn 26 (Afkört BAB 26 oder A26) is en Autobahn mit veer Fohrbahnen in Hamborg un Neddersassen. Von de fiev plaanten Afsneed is opstunns een Stück von 10,5 km trech. Wenn de Autobahn ganz trech is, schall se 50 km lang wesen un von de A 20 (ok eerst plaant) bi Drochters bet na de A 7 in Hamborg (bi Moorborg) lopen. De A 26 schall denn vör allen ok Verkehrslast von de B 73 wegnehmen, de twüschen Stood un Hamborg faken temlich dicht is.

Historie[ännern | Bornkood ännern]

Autobahnbrügg twüschen Hornborg un Neekark 2006 in Bo

Eersten Afsnidd[ännern | Bornkood ännern]

Mit den eersten Afsnidd, de twölv Kilometer lang is un bet achter de Lüh reckt, hebbt se 2002 anfungen. De Afsnidd weer 2008 trech un de eerste Verkehr is testwies von’n 5. August bet to’n 5. September 2008 över de Autobahn freegeven worrn. An’n 4. Oktober 2008 is de Autobahn denn fierlich an’n Verkehr övergeven worrn. Nadem de Autobahn eerst noch wedder för letzte Arbeiden dicht weer, hebbt se ehr denn an’n 23. Oktober 2008 kumplett un op Duur freegeven.

De Autobahn geiht twüschen Stood un Ottenbeek an de Kant von Geest un Oollanner Masch in de B 73 (in de Richt na Cuxhoben) över. De Straten na Ottenbeek, Stood un de B 73 (in de Richt na Hamborg) sünd över en Kringstraat anslaten, de över de Autobahn liggt.

Disse Afsnidd hett Affohrten na de Landsstraat 111 (Stood-Oost), de L 125 (Dullern) un de Kreisstraat 36 (Hornborg), wat bet nu to ok dat Enn is. Hier löppt de Verkehr över de K 36 wedder na de B 73.

Tweten Afsnidd[ännern | Bornkood ännern]

De twete Afsnidd is so bi teihn Kilometer lang un reckt von Hornborg bet na Buxthu achter de Eest. De Planfeststellungsbeschluss is 2004 maakt worrn un de Afsnidd warrt opstunns boot.

Disse Afsnidd schall en Affohrt an de K 26 kriegen.

Drüdden Afsnidd[ännern | Bornkood ännern]

De drüdde Afsnidd is 3,5 km lang un reckt von Buxthu bet na de Landsgrenz Neddersassen/Hamborg hen bi Rübk. Dat Planfeststellungsverfahren för den Afsnidd hett an’n 25. März 2009 anfungen.

Disse Afsnidd schall en Affohrt an de L 235 kriegen.

Veerten Afsnidd[ännern | Bornkood ännern]

De veerte Afsnidd reckt von de Landsgrenz bet na Moorborg an de A 7 ran. Dat Bundsverkehrsministerium hett in’n Mai 2011 beslaten, dat se dat Geld dor för geven wüllt, aver de Afsnidd is noch nich anfungen.

Föfften Afsnidd[ännern | Bornkood ännern]

De föffte Afsnidd schall von Stood bet na Drochters lopen un dor dat Autobahndreeeck Drochters mit de A 20 billen, de hier mit en Tunnel ünner de Elv langsgahn schall. Dat Planfeststellungsverfahren för den Afsnidd hett an’n 20. September 2010 anfungen.

De Afsnidd schall in’n Noorden von Stood bi Schölisch en Affohrt kriegen, de an de L 111 un an de L 110 rangeiht, un en twete Affohrt bi de K 28 twüschen Ritsch un Ritschermoor.

Opfohrten[ännern | Bornkood ännern]

Knoten Dreeeck Drochters A20
Anschlussstelle Drochters
Anschlussstelle Stood-Noord
Anschlussstelle (2)  Stood-Süüd B73
Anschlussstelle (3)  Stood-Oost
Anschlussstelle (4)  Dollern
Anschlussstelle (5)  Hornborg
Anschlussstelle (6)  Jörk
Anschlussstelle (7)  Buxthu
Anschlussstelle (8)  Vosshusen B3n
Anschlussstelle (9)  Krüüz Hamborg-Süderelv A7

Borns[ännern | Bornkood ännern]


Weblenken[ännern | Bornkood ännern]

Bundsautobahn 26. Mehr Biller, Videos oder Audiodateien to’t Thema gifft dat bi Wikimedia Commons.