Bexhöv
| Wapen/Flagg | Koort | |
|---|---|---|
|
|
| |
| Basisdaten | ||
| Flach: | 12,270 km² | |
| Inwahners: | 2.227 (30. November 2011) | |
| Inwahnerdicht: | 181,5 Inwahners pro km² | |
| Hööchd: | 12 m över NN | |
| Postleettall: | 27612 | |
| Vörwahl: | 04703 | |
| Geograafsche Laag: | Koordinaten:53° 29′ N, 8° 42′ O53° 29′ N, 8° 42′ O | |
 | ||
|
| ||
Bexhöv is en Dörp in de Gemeen Lox in’n Landkreis Cuxhoben, Neddersassen. Dat Dörp hett so bi 2400 Inwahners. Bi dat Dörp höört ok de lüttjen Öörd Junkernhoos un Hosermöhlen to.
Geografie
[ännern | Bornkood ännern]Bexhöv liggt op de Wersermünner Geest mit en Reeg Moorrebeden ümto. Dat Water flütt in’n Noorden över Gravens na de Rohr hen af un in’n Süden över den Lox-Düringer Kanaal na de Luun.
De Naveröörd sünd Junkernhoos un Hosermöhlen in’n Noorden, Sellst un Donnern in’n Noordoosten, Stinst inn Süüdoosten, Friedrich-Wilhelmsdörp, Düring, Lox un Dünenfähr in’n Süüdwesten un Nückel, Hogeworth un Apeler in’n Noordwesten.
Geschicht
[ännern | Bornkood ännern]Al in de Steentied vör 12.000 Johr hebbt Minschen in de Ümgegend von Bexhöv leevt. Dat wiest Funnen von’n Rand von dat Steertmoor.
Toeerst in de Oorkunnen kummt de Oort in dat 12. Johrhunnert vör. 1180 hebbt se de eerste Kark boot. Ut Bexhöv stammt dat ole Adelsgeslecht von de Buxhoeveden. 1199 is Albrecht von Buxthoeven Bischop von Livland worrn un hett 1200 de Stadt Riga grünnt.
De Oort hett vundaag ’n Charakter von en Vöroort mit veel Eenfamilienhüüs. En groten Deel von de Inwahners sünd Pendlers, de in Bremerhoben arbeiden doot. In’n olen Oort gifft dat noch welk Resthööv un an de Bundsstraat 71 en poor Gärtnereen. Sied en poor Johr gifft dat in Bexhöv keen Laden för Levensmiddel mehr. Blot noch en Gemischtworenladen, twee Tankstellen un een Slachter.
Bexhöv is de Oort, wo dat ole Määrken vun Haas un Swienegel toeerst speelt hett. Willem Schröder harr de Geschicht in Bexhöv in’n Kroog höört un ehr later to Poppeer bröcht. Dorbi hett he den Oort aver na Buxthu ännert. Wohrschienlich weer de Grund, dat Buxthuud bekannter weer.
In’n Eersten Weltkrieg sünd 19 Soldaten ut Bexhöv fullen oder vermisst un in’n Tweten Weltkrieg 32.[1]
Verwaltungsgeschicht
[ännern | Bornkood ännern]In de Franzosentied von 1810 bet 1814 hett de Oort to de Mairie Bexhöv in’n Kanton Bremerleh höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1851 to de Huusvaagdie Bexhöv in dat Gericht Beverst tohöört, von 1851 bet 1859 to dat Amt Beverst un denn von 1859 bet 1885 to dat Amt Leh. Na 1885 weer dat in’n Kreis Geestmünn. 1932 is dat Deel von’n Kreis Wersermünn worrn un 1977 von’n Landkreis Cuxhoben.
1929 is dat Dörp Nückel (mit de Hüüs von Dünenfähr) Deel von de Gemeen Bexhöv worrn. To’n 1. März 1974 denn is Bexhöv, dat al vörher siet 1971 Deel von de Samtgemeen Lox weer, bi de Gemeenreform in Neddersassen Deel von de Gemeen Lox worrn. Binnen de Gemeen Lox billt Bexhöv nu en polietsche Oortschop mit egen Oortsvörsteiher.
Inwahnertall
[ännern | Bornkood ännern]| Johr | Inwahners |
|---|---|
| 1791[2] | 27 Füürsteden |
| 1812[3] | 141 |
| 1824[4] | 29 Füürsteden |
| 1848[5] | 167 Lüüd, 28 Hüüs |
| 1. Dezember 1871[6] | 155 Lüüd, 32 Hüüs |
| 1. Dezember 1885[7] | 229 Lüüd, 42 Hüüs |
| 1. Dezember 1910[8] | 350 |
| 1925[9] | 425 |
| 1933[9] | 577 |
| 1939[9] | 611 |
Religion
[ännern | Bornkood ännern]
Bexhöv is evangeelsch-luthersch präägt un billt mit de Johannes-de-Döper-Kark en egen Kaspel.
För de Kathoolschen is de Johannes-de-Döper-Kark in Lox tostännig, de 1965 grünnt worrn is. Vör 1965 weer de Nikolaus-Kark in Wulsdörp tostännig. De Johannes-de-Döper-Kark höört siet 1. November 2006 to de Karkengemeen Hillig Hart Jesu in Geestmünn.
Oortsvörsteihers
[ännern | Bornkood ännern]- opstunns: Gerold Piastowski
Kultur
[ännern | Bornkood ännern]En Denkmaal för de Fullenen ut de twee Weltkrieg’ steiht in de Linnenstraat.
Verenen
[ännern | Bornkood ännern]De Schüttenvereen Bexhöv is 1970 grünnt worrn.
Weertschop un Infrastruktur
[ännern | Bornkood ännern]Bexhöv hett en egene freewillige Füürwehr, de 1895 grünnt worrn is.
De Filiaal von de Werser-Elv-Spoorkass in Bexhöv hett to’n 1. Dezember 2015 dichtmaakt.
Verkehr
[ännern | Bornkood ännern]Bexhöv liggt an de Bundsstraat 71, de dat Dörp mit Bremerhoben in’n Noordwesten un Beverst in’n Süüdoosten verbinnt. Ok de Landsstraat 135 löppt dör Bexhöv un geiht na Donnern un Sellst in’n Noordoosten un in’n Süüdwesten na Lox un Ness.
De nächste Autobahn is de Autobahn 27 (Afsnidd Bremen–Bremerhoben). De Opfohrt 9 Wulsdörp liggt so veer Kilometer in’n Noordwesten von Bexhöv an de B 71.
De nächste Bahnhoff is so bi dree Kilometer wied weg in’n Süüdwesten de Bahnhoff Lox an de Bahnlien Bremen–Bremerhoben.
Footnoten
[ännern | Bornkood ännern]- ↑ http://www.denkmalprojekt.org/dkm_deutschland/bexhoevede_ns.htm
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 24
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 102
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 56
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 149
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 151
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 163
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Weblenken
[ännern | Bornkood ännern]
- Websteed över Bexhöv (hoochdüütsch)
