Rottörp (Landkreis Horborg)
| Wapen/Flagg | Koort | |
|---|---|---|
|
|
| |
| Basisdaten | ||
| Inwahners: | 1.175 (30. Juni 2014) | |
| Hööchd: | 6 m över NN | |
| Postleettall: | 21423 | |
| Vörwahl: | 04133 | |
| Geograafsche Laag: | Koordinaten:53° 20′ N, 10° 19′ O53° 20′ N, 10° 19′ O | |
|
| ||
_COA.svg)
Rottörp (hoochdüütsch Rottorf) is en Dörp in de Gemeen Winsen in’n Landkreis Horborg, Neddersassen. De Oort billt binnen de Gemeen Winsen en Oortschop mit egen Oortsvörsteiher.
Geografie
[ännern | Bornkood ännern]De Oostgrenz von Rottörp billt de Roddau un de Noordgrenz deelwies de Slüsengraven. In’n Süden von’n Oort münnt de Huusbeek in de Roddau un direkt bi Rottörp de Brookbeek.
De Naveröörd sünd O’rshusen in’n Noordoosten, Handörp in’n Oosten, Nee Wittörp un Bewick in’n Süüdoosten, Brauk in’n Süden, Radbrouk in’n Süüdwesten un Sangenstää, Mower, Hunnen un Fohrnholt in’n Noordwesten.
Historie
[ännern | Bornkood ännern]Rottörp kummt 1233 as Rothorp toeerst in en Verdrag von Helena von Lümborg un ehren Söhn Otto mit dat Michaelis-Klooster in Lümborg vör. In’n Verdrag is regelt, dat Helena de Kark in Winsen kriggt un dat Klooster de Kapell St. Knut op’n Lümbörger Kalkbarg. As Utgliek schöölt twee Mark Penn ut Rottörp un Sangenstää an de Kark in Parrns tahlt warrn (duas marcas denariorum dedimus de Rothorp et Sankenstede).
In’n Eersten Weltkrieg sünd 17 Soldaten ut Rottörp fullen oder vermisst un in’n Tweten Weltkrieg 30.[1]
Verwaltungsgeschicht
[ännern | Bornkood ännern]In de Franzosentied von 1810 bet 1814 hett de Oort to de Mairie Winsen in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Vaagdie Parrns in dat Amt Winsen tohöört. Blots in de Tied von 1852 bet 1859 weer de Oort kort in dat Amt Parrns. Na 1885 weer dat in’n Kreis Winsen un is 1932 Deel von’n Kreis Horborg worrn.
De Oort is an’n 1. Juli 1972 mit de Gemeenreform in Neddersassen Deel von de Gemeen Winsen worrn.
Inwahnertall
[ännern | Bornkood ännern]| Johr | Inwahners |
|---|---|
| 1793[2] | 10 Füürsteden |
| 1812[3] | 106 |
| 1824[4] | 11 Füürsteden |
| 1848[5] | 190 Lüüd, 23 Hüüs |
| 1. Dezember 1871[6] | 212 Lüüd, 24 Hüüs |
| 1. Dezember 1910[7] | 293 |
| 1925[8] | 314 |
| 1933[8] | 338 |
| 1939[8] | 347 |
| 30. Juni 2014 | 1.175 |
Religion
[ännern | Bornkood ännern]Rottörp is evangeelsch-luthersch präägt un höört to dat Kaspel von de Marien-Kark in Handörp.
För de Kathoolschen is de Goden-Hirt-Kark in Winsen tostännig.
Wapen
[ännern | Bornkood ännern]Dat Wapen von Rottörp wiest op gollen Grund dree gröne Bööm un in de Midd en rood Fackwarkhuus.
Oortsvörsteihers
[ännern | Bornkood ännern]- opstunns: Hans-Bernd Graubner
Kultur
[ännern | Bornkood ännern]En Denkmaal för de Fullenen ut de twee Weltkrieg’ steiht in de Midd von’n Oort.
Verenen
[ännern | Bornkood ännern]De Sportvereen MTV Rottörp is 1920 grünnt worrn.
Brüük
[ännern | Bornkood ännern]In Rottörp warrt Faslam fiert.
Weertschop un Infrastruktur
[ännern | Bornkood ännern]Rottörp hett en egene freewillige Füürwehr, de an’n 1. Juni 1906 grünnt worrn is. Vörher hett dat en Plichtfüürwehr geven.
Siet 2013 löppt de Eerdgas-Pieplien NEL in’n Noorden von dat Dörp un denn twüschen Rottörp un Sangenstää langs.
Verkehr
[ännern | Bornkood ännern]Dör Rottörp löppt de Kreisstraat 87 (de fröher Deel von de Bundsstraat 4 weer), de in’n Noordwesten över Sangenstää un Bossel na Winsen geiht un in’n Süüdoosten in’n Landkreis Lümborg as K 46 över Handörp un Bewick na Lümborg. In’n Süüdwesten geiht de K 3/K 43 na Radbrouk. In’n Oosten von Rottörp warrt de K 46 bi Handörp krüüzt von de Bundsstraat 404, de in’n Noorden an O’rshusen un Rönn vörbi över de Elv na Geesthacht geiht un in’n Süden an de Autobahn 39 (Afsnidd Hamborg–Lümborg) ran. De Opfohrt 5 Handörp op de A 39 liggt knapp fiev Kilometer in’n Süüdoosten von Rottörp an de B 404.
De nächste Bahnhoff is so bi dree Kilometer wied weg in’n Süüdwesten de Bahnhoff Radbrouk an de Bahnlien Hamborg–Hannover.
Scholen
[ännern | Bornkood ännern]Rottörp hett siet 1998 en Kinnergoorn, de von dat DRK bedreven warrt.
Footnoten
[ännern | Bornkood ännern]- ↑ http://www.denkmalprojekt.org/dkm_deutschland/rottorf.htm
- ↑ Christoph B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 196: https://books.google.de/books?id=jN5QAAAAcAAJ&pg=PA196
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 62: http://books.google.de/books?id=Q 5OAAAAcAAJ&pg=PA62
- ↑ C. H. Jansen: Statistisches Handbuch des Königreichs Hannover. 1824, Sied 522: http://books.google.de/books?id=tG0AAAAAcAAJ&pg=PA522
- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 104: http://books.google.de/books?id=eOI-AAAAcAAJ&pg=PA104
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 134: https://books.google.de/books?id=qTZDAQAAMAAJ&pg=RA2-PA134
- ↑ http://www.gemeindeverzeichnis.de/gem1900/gem1900.htm?hannover/winsen.htm
- ↑ a b c http://www.verwaltungsgeschichte.de/harburg.html
_COA.svg)
Beborg | Bossel | Gehrden | Hoopt | Lassrönn | Luhdörp | Parrns | Rottörp | Reidörp | Sangenstää | Scharmbääk | Stöckt | Tönnhusen | Winsen