Mower (Landkreis Horborg)

Wapen/Flagg

Koort

Basisdaten

Bundsland: Neddersassen

21423

04179

Koordinaten:53° 22′ N, 10° 17′ O53° 22′ N, 10° 17′ O

Mower (hoochdüütsch Mover) is en Dörp in de Gemeen Draag (Samtgemeen Elvmasch) in’n Landkreis Horborg, Neddersassen.

Geografie

De Oort liggt in de Masch von de Ilmenau üm un bi fiev Kilometer af von de Elv. Dat Dörp is an’n Ilmenaukanaal, leeg fröher aver an’n olen Loop von de Ilmenau, de wat wieder in’n Noorden langs lööp.

De Naveröörd sünd Hunnen in’n Noorden, Fohrenholt un O’rshusen in’n Oosten, Rottörp in’n Süüdoosten, Sangenstää un Bossel in’n Süüdoosten, Winsen in’n Westen un Tönnhusen in’n Noordwesten.

Historie

In’n Eersten Weltkrieg sünd dree Soldaten ut Mower fullen oder vermisst.^[1]

Verwaltungsgeschicht

In de Franzosentied von 1810 bet 1814 hett de Oort to de Mairie Meschacht in’n Kanton Bewick höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Amtsvaagdie Masch in dat Amt Winsen tohöört. Na 1885 weer dat in’n Kreis Winsen. 1932 is dat Deel von’n Kreis Horborg worrn.

Mower hett in dat 19. Johrhunnert tohoop mit Hunnen een Gemeen billt, is denn aver en egenstännige Gemeen worrn. Dat is so bleven bet 1928/1929, as Mower wedder an de Gemeen Hunnen kamen is. De Gemeen Hunnen is an’n 1. Juli 1972 mit de Gemeenreform in Neddersassen Deel von de Gemeen Draag worrn.

Inwahnertall

Johr	Inwahners
1791-00-001791^[2]	6 Füürsteden
1824-00-001824^[3]	6 Füürsteden
1848-00-001848^[4]	88 Lüüd, 10 Hüüs
1871-12-011. Dezember 1871^[5]	67 Lüüd, 9 Hüüs
1885-12-011. Dezember 1885^[6]	82 Lüüd, 9 Hüüs
1905-12-011. Dezember 1905^[7]	83 Lüüd, 10 Hüüs
1910-12-011. Dezember 1910^[8]	82

Religion

Mower is evangeelsch-luthersch präägt un höört to dat Kaspel von de Marien-Kark in Handörp.

För de Kathoolschen is de Goden-Hirt-Kark in Winsen tostännig.

Kultur

En Denkmaal för de Fullenen ut de twee Weltkrieg’ steiht in Hunnen.

Weertschop un Infrastruktur

För Mower is de freewillige Füürwehr Hunnen mit tostännig.

Verkehr

Von Mower loopt lüttjere Straten na Tönnhusen, Hunnen un Fohrenholt. In Hunnen besteiht Ansluss an de Kreisstraat 2, de in’n Westen na Tönnhusen un bi Nettelbarg an de Landsstraat 217 ran geiht un in’n Oosten na O’rshusen un an de K 81.

De L 217 löppt in’n Noorden na Draag un in’n Süüdwesten na Winsen. De K 81 in O’rshusen is an de Bundsstraat 404 anslaten, de in’n Noorden na Geesthacht löppt un in’n Süden na de Autobahn 39 (Afsnidd Hamborg–Lümborg), wat de nächste Autobahn is. De Opfohrt 5 Handörp op de A 39 liggt so negen Kilometer in’n Süüdoosten von Mower an de B 404.

De nächste Bahnhoff is so bi söven Kilometer wied weg in’n Süden de Bahnhoff Radbrouk an de Bahnlien Hamborg–Hannover. Op de Bahnlien Winsen–Neddermeschacht hett dat von 1912 bet 1966 Personenverkehr geven. De Oort harr in düsse Tied en egen Bahnhoff an düsse Bahnlien.