Sangenstää

Vun Wikipedia
Zur Navigation springen Zur Suche springen
Wapen/Flagg Koort

Wapen vun Sangenstää

Sangenstää
Laag vun Sangenstää in Düütschland
Basisdaten
Bundsland: Neddersassen
Landkreis: Horborg
Gemeen: Winsen
Inwahners: 513 (2014-06-3030. Juni 2014)
Hööchd: 5 m över NN
Postleettall: 21423
Vörwahl: 04171
Geograafsche Laag:
Koordinaten:53° 21′ N, 10° 16′ O
53° 21′ N, 10° 16′ O

Hoff Porth in Sangenstää

Sangenstää (hoochdüütsch Sangenstedt) is en Dörp in de Gemeen Winsen in’n Landkreis Horborg, Neddersassen. De Oort billt binnen de Gemeen Winsen en Oortschop mit egen Oortsvörsteiher.

Geografie[ännern | Bornkood ännern]

Sangenstää liggt in de Masch von de Ilmenau (Ilmenaukanaal). Dat Water ut’n Süden von dat Dörp flütt över Möhrengraven, Huusbeek un Brookbeek na de Roddau hen af un dat Water ut’n Noorden von dat Dörp över den Slüsengraven. De Ilmenaukanaal sülvs is en beten mehr as twee Kilometer in’n Noorden von dat Dörp. In’n Süüdwesten liggt dat Naturschuulrebeed Rethmoorsee.

De Naveröörd sünd de Dörper Hunnen, Mower un Fohrnholt in de Binnenmasch in’n Noordoosten, Rottörp un Handörp in’n Oosten, Radbrouk in’n Süüdoosten, Luhdörp in’n Süüdwesten, Reidörp un Bossel in’n Westen un Winsen, Nettelbarg un Tönnhusen in’n Noordwesten.

Historie[ännern | Bornkood ännern]

Sangenstää kummt 1233 as Sankenstede toeerst in en Verdrag von Helena von Lümborg un ehren Söhn Otto mit dat Michaelis-Klooster in Lümborg vör. In’n Verdrag is regelt, dat Helena de Kark in Winsen kriggt un dat Klooster de Kapell St. Knut op’n Lümbörger Kalkbarg. As Utgliek schöölt twee Mark Penn ut Rottörp un Sangenstää an de Kark in Parrns tahlt warrn (duas marcas denariorum dedimus de Rothorp et Sankenstede).

De Familie von Sangenstää, de in Sangenstää ehren Seet harr un na dat Dörp nöömt is, dükert in dat 13. Johrhunnert in de Oorkunnen op. In dat 16. Johrhunnert is se utstorven. Dat Wapen von de Familie hett vondaag de Oortschop as Wapen övernahmen.

In’n Dörtigjohrigen Krieg sünd 1627 eerst däänsche Truppen dör dat Dörp tagen un 1631 sweedsche Truppen. Sangenstää hett beid maal swoor leden.

Olen Mielensteen von de Schossee Lümborg–Hoopt

Wichtig för den Oort weer de ole Hannels- un Poststraat von Lümborg över de Tollenspieker Fähr na Hamborg, de an dat Dörp langslööp. En Badenverkehr twüschen Hamborg un Lümborg is toeerst för 1459 nawiest. Von 1746 af an hett dat en Postverkehr geven, de een Maal in de Week föhrt is, un 1821 is de ole Heerweg to en Schossee utboot worrn. Von 1821 steiht ok vondaag noch en olen Mielensteen in Sangenstää. De Hoogtieden von’n Hannel op de Schossee weren aver al 1847 wedder vörbi, as de Bahnlien Hamborg–Hannover apenmaakt hett, de ok över Lümborg lopen is. Ut de Schossee is aver liekers later en Rieksstraat un denn en Bundsstraat worrn (Bundsstraat 4), de eerst to en Kreisstraat rafstuft worrn is, as 1995 de Autobahn 250 trech worrn is.

In’n Eersten Weltkrieg sünd söven Soldaten ut Sangenstää fullen oder vermisst un in’n Tweten Weltkrieg 19.[1]

De Twete Weltkrieg weer in Sangenstää toenn, as an’n 19. April 1945 brietsche Truppen von Rottörp her in dat Dörp inmarscheert sünd. Dorbi sünd en poor Hüüs in Sangenstää afbrennt, von wegen dat enkelte düütsche Truppen op’n Trüggtog de Briten angrepen hebbt.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Winsen in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots in de Tied von 1852 bet 1859 weer de Oort kort in dat Amt Parrns. Na 1885 weer dat in’n Kreis Winsen un is 1932 Deel von’n Kreis Horborg worrn.

De Oort is an’n 1. Juli 1972 mit de Gemeenreform in Neddersassen Deel von de Gemeen Winsen worrn.

Inwahnertall[ännern | Bornkood ännern]

Johr Inwahners
1793-00-001793[2] 4 Füürsteden
1812-00-001812[3] 50
1824-00-001824[4] 4 Füürsteden
1848-00-001848[5] 69 Lüüd. 7 Hüüs
1871-12-011. Dezember 1871[6] 84 Lüüd. 11 Hüüs
1910-12-011. Dezember 1910[7] 172
1925-00-001925[8] 173
1933-00-001933[8] 174
1939-00-001939[8] 177
2014-06-3030. Juni 2014 513

Religion[ännern | Bornkood ännern]

Sangenstää is evangeelsch-luthersch präägt un höört to dat Kaspel von de Marien-Kark in Handörp.

För de Kathoolschen is de Goden-Hirt-Kark in Winsen tostännig.

De Karkhoff mit Karkhoffskapell för de beiden Dörper Bossel un Sangenstää is in de Johren 1950 anleggt worrn. 1957 is dor de eerste Persoon begraven worrn. Vörher sünd de Lüüd bi de Kark in Handörp begraven worrn.

Wapen[ännern | Bornkood ännern]

Dat Wapen von Sangenstää wiest op sülvern Grund en swart-sülvern Schild un en sülvern Rüstung mit Schullerdeek. Op dat Schild sünd twee Mohrenköpp mit rode Lippen in gröne Kledaasch un mit grönen Kranz op’n Kopp to sehn. De Helm driggt twee Büffelhöörn, de na buten wiest. In de Midd twüschen de Höörn is noch en Mohrenkopp to sehn, de en Strußenfedder an’n Vörkopp driggt.

Dat Wapen weer fröher dat Wapen von de Familie von Sangenstää, de in dat 16. Johrhunnert utstorven is.

Börgermeesters/Oortsvörsteihers[ännern | Bornkood ännern]

Börgermeesters:

  • –30. Juni 1972: Arthur Band

Oortsvörsteihers:

  • opstunns: Andrea Röhrs

Kultur[ännern | Bornkood ännern]

Kriegerdenkmaal in Sangenstää

In Sangenstää steiht en Denkmaal för de Fullenen ut de twee Weltkrieg’.

Verenen[ännern | Bornkood ännern]

De Schüttenkameraadschop Bossel-Sangenstää is 1950 grünnt worrn un de Sportvereen MTV Bossel-Sangenstää 1910.

Weertschop un Infrastruktur[ännern | Bornkood ännern]

Sangenstää hett en egene freewillige Füürwehr.

De Dörpladen in Sangenstää hett 1984 dichtmaakt un de Poststeed 1996. De twee Gasthüüs an de fröhere Bundsstraat 4 sünd unrentabel worrn un hebbt dichtmaakt. Se sünd all beid later afbrennt.

Siet 2013 löppt de Eerdgas-Pieplien NEL twüschen Rottörp un Sangenstää langs un denn dör den Süden von dat Sangenstäer Rebeed.

Verkehr[ännern | Bornkood ännern]

Dör Sangenstää löppt de Kreisstraat 87 (fröher Deel von de Bundsstraat 4), de in’n Noordwesten över Bossel na Winsen geiht un in’n Süüdoosten över Rottörp un Handörp na Bewick un Lümborg.

De nächste Autobahn is de Autobahn 39 (Afsnidd HamborgLümborg), de 1995 as A 250 för den Verkehr freegeven worrn is un siet 2010 de Nummer A 39 driggt. De Opfohrt 4 Winsen-Oost liggt so fiev Kilometer in’n Süüdwesten von Sangenstää an de K 84.

De nächsten Bahnhööv sünd so bi fiev Kilometer wied weg an de Bahnlien Hamborg–Hannover de Bahnhoff Winsen in’n Noordwesten un de Bahnhoff Radbrouk in’n Süüdoosten.

Scholen[ännern | Bornkood ännern]

De Volksschool in Sangenstää hett 1972 dichtmaakt.

Footnoten[ännern | Bornkood ännern]

  1. http://www.denkmalprojekt.org/dkm_deutschland/sangenstedt.htm
  2. Christoph B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 199: https://books.google.de/books?id=jN5QAAAAcAAJ&pg=PA199
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 62: http://books.google.de/books?id=Q 5OAAAAcAAJ&pg=PA62
  4. C. H. Jansen: Statistisches Handbuch des Königreichs Hannover. 1824, Sied 530: http://books.google.de/books?id=tG0AAAAAcAAJ&pg=PA530
  5. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 105: http://books.google.de/books?id=eOI-AAAAcAAJ&pg=PA105
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 134: https://books.google.de/books?id=qTZDAQAAMAAJ&pg=RA2-PA134
  7. http://www.gemeindeverzeichnis.de/gem1900/gem1900.htm?hannover/winsen.htm
  8. a b c http://www.verwaltungsgeschichte.de/harburg.html

Weblenken[ännern | Bornkood ännern]

Commons-logo.svg Sangenstää. Mehr Biller, Videos oder Audiodateien to’t Thema gifft dat bi Wikimedia Commons.