Slüsengraven

Vun Wikipedia
Zur Navigation springen Zur Suche springen
Slüsengraven
Laag Landkreis Horborg
Stroomsystem Elv
Läng 6,6 km
Born bi Rottörp
Münn bi Nettelbarg in de Ilmenau
Afströömrebeed 24,68[1] km²

De Slüsengraven is en 6,6 Kilometer langen[2] Waterloop in’n Landkreis Horborg, de dör dat Viefeld bi Winsen flütt un von links in de Ilmenau münnt.

De Slüsengraven hett keen enkelten Born. He spiest sik ut en Reeg Gravens, de dat Water ut de Masch langs de Ilmenau afföhrt. De Anfang liggt bi Rottörp nich wied af von de Roddau. Von dor geiht de Graven eerst na Noorden, denn na Westen. De Slüsengraven nimmt hier von links en ganze Reeg Gravens op, de von Rottörp, von Sangenstää un von Bossel her kaamt. In’n Oosten von Winsen nimmt de Graven de Ried op, knickt dor na Noorden af un münnt bi Nettelbarg nich wied von Tönnhusen in de Ilmenau.

Dat Water in de Ilmenau flütt denn wieder in de Elv un in de Noordsee.

De Ried spiest sik ut Gravens, de in’n Oosten von Reidörp tohoopfleten doot. Von dor geiht dat na Noordoosten, dör den Süden von Winsen un ünner de Bahnlien Hannover-Hamborg ünnerdör. De Ried flütt denn dör Bossel un münnt in’n Noorden von Bossel in’n Slüsengraven. Se hett en Afströömrebeed von 8,10 km².

Footnoten[ännern | Bornkood ännern]

  1. Gewässergütebericht ELBE 2000 Niedersachsen.
  2. Michael Bergemann: Gesamtliste der Fließgewässer im Elbeeinzugsgebiet. 2012