Reidörp

Vun Wikipedia
Wapen/Flagg Koort

Wapen vun Reidörp

Reidörp
Laag vun Reidörp in Düütschland
Basisdaten
Bundsland: Neddersassen
Landkreis: Horborg
Gemeen: Winsen
Inwahners: 1.259 (2014-06-3030. Juni 2014)
Postleettall: 21423
Vörwahl: 04171
Geograafsche Laag:
Koordinaten:53° 21′ N, 10° 11′ O
53° 21′ N, 10° 11′ O

Karte

Reidörp (hoochdüütsch Roydorf) is en Dörp in de Gemeen Winsen in’n Landkreis Horborg, Neddersassen. De Oort billt binnen de Gemeen Winsen en Oortschop mit egen Oortsvörsteiher.

Geografie[ännern | Bornkood ännern]

Dör Reidörp flütt de Luh dör un na Westen to liggt de Parrnser Graven. Dat Water ut de Rebeden in’n Oosten flütt över de Riede af, hen na’n Slüsengraven un de Ilmenau.

De Naveröörd sünd Winsen un Bossel in’n Noordoosten, Sangenstää in’n Oosten, Luhdörp un Beborg in’n Süden, Parrns in’n Süüdwesten, Scharmbääk in’n Westen un Ashusen, Gehrden un Grevelau in’n Noordwesten.

Historie[ännern | Bornkood ännern]

Reidörp kummt 1158 toeerst in de Oorkunnen vör.

In’n Eersten Weltkrieg sünd ölven Soldaten ut Reidörp fullen oder vermisst un in’n Tweten Weltkrieg 14.[1]

Dat ole Dörp Reidörp liggt vondaag ganz an’n Westrand von’n Oort. De gröttste Deel von Reidörp besteiht ut Hüüs, de eerst in dat 20. Johrhunnert na Oosten rut an de Straat von Winsen na Luhdörp un in de Reidörper Heid boot worrn sünd. Disse Deel von Reidörp is in’n Noorden mit Winsen tohoopwussen.

De Brügg över de Luh in dat ole Dörp is 1910 boot worrn. Later weer de Brügg denn to small un dor is en ne’e Brügg boot worrn.[2]

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Winsen in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots in de Tied von 1852 bet 1859 weer de Oort kort in dat Amt Parrns. Na 1885 weer dat in’n Kreis Winsen un is 1932 Deel von’n Kreis Horborg worrn.

De Oort is an’n 1. Juli 1972 mit de Gemeenreform in Neddersassen Deel von de Gemeen Winsen worrn.

Inwahnertall[ännern | Bornkood ännern]

Johr Inwahners
1793-00-001793[3] 11 Füürsteden
1812-00-001812[4] 102
1824-00-001824[5] 12 Füürsteden
1848-00-001848[6] 111 Lüüd, 14 Hüüs
1871-12-011. Dezember 1871[7] 131 Lüüd, 20 Hüüs
1910-12-011. Dezember 1910[8] 257
1925-00-001925[9] 293
1933-00-001933[9] 307
1939-00-001939[9] 306
2014-06-3030. Juni 2014 1.259

Religion[ännern | Bornkood ännern]

Reidörp is evangeelsch-luthersch präägt un höört to dat Kaspel von de Gertrud-Kark in Parrns.

För de Kathoolschen is de Goden-Hirt-Kark in Winsen tostännig.

Börgermeesters/Oortsvörsteihers[ännern | Bornkood ännern]

Börgermeesters:

  • 1953–1972: Heinrich Riedel

Oortsvörsteihers:

  • opstunns: Monika Wendlandt

Wapen[ännern | Bornkood ännern]

Dat Wapen wiest op sülvern Grund en swarte Brügg över en blauen Schildfoot ut Wellenlienen.

Kultur[ännern | Bornkood ännern]

En Denkmaal för de Fullenen ut de twee Weltkrieg’ steiht in Reidörp op’n Karkhoff. Dat Denkmaal lett ok an 17 Lüüd ut de Oostrebeden denken, de in’n Tweten Weltkrieg doodbleven sünd un de ehr Familien in Reidörp opnahmen worrn sünd.

Verenen[ännern | Bornkood ännern]

Reidörp hett tohoop mit Luhdörp en Schüttenkameraadschop, de 1925 grünnt worrn is. De MTV Luhdörp-Reidörp is 1910 grünnt worrn.

Brüük[ännern | Bornkood ännern]

In Reidörp warrt ünner annern Faslam fiert.

Weertschop un Infrastruktur[ännern | Bornkood ännern]

Reidörp hett en egene freewillige Füürwehr, de an’n 7. März 1914 grünnt worrn is. Vörher hett dat en Plichtfüürwehr geven.

In’n Westen von’n Oort liggt en lütten Windpark mit dree Windrääd.

Ünnernehmens[ännern | Bornkood ännern]

1944 hett de Fabrikant Willy Spangenberg in Reidörp an’n Ilmer Moorweg un an de Bahnlien Winsen–Hützel en Fabrik boot, de op dat Rebeed von de Extrakschoon arbeidt hett. Ünner annern hett de Fabrik Bleekeer mit Mineralööl dor in un Celluloos verarbeidt. Na’n Krieg hett dat Wark ok Bruunköhlen extraheert, aver is 1947 stillleggt worrn. 1955 hett denn de Cheemsche Fabrik Fridingen dat Gelänn övernahmen un de Produkschoon wedder opnahmen. Bet 1986 hett de Fabrik denn Paraffin ut Bleekeer extraheert.[10]

Verkehr[ännern | Bornkood ännern]

Dör Reidörp löppt de Landsstraat 234, de in’n Noorden na Winsen un an de L 217 geiht un in’n Süden över Luhdörp un Gastää na Solzhusen. An’n Oostrand von dat Dörp löppt parallel to de Landsstraat de Kreisstraat 84 (Oosttangent Winsen) von Winsen na Luhdörp. Lüttjere Straten loopt ans na Scharmbääk un Grevelau.

De nächste Autobahn is de Autobahn 39 (Afsnidd HamborgLümborg). De Opfohrt 4 Winsen-Oost liggt üm un bi een Kilometer in’n Oosten von Reidörp an de K 84.

De nächste Bahnhoff is so bi twee Kilometer wied weg in’n Noorden de Bahnhoff Winsen an de Bahnlien Hamborg–Hannover. Lieker wied weg in’n Süüdoosten weer de Bahnhoff Luhdörp an de Bahnlien Winsen–Hützel, op de dat von 1906 bet 1970 Personenverkehr geven hett.

Scholen[ännern | Bornkood ännern]

In Reidörp gifft dat de Grund- un Oberschool An’n Ilmer Barg, dat Luh-Gymnasium, dat 2004 grünnt worrn is, un de Integreerte Gesamtschool Reidörp, de siet 2011 besteiht.

Literatur[ännern | Bornkood ännern]

  • Heinrich Riedel: Unser Roydorf. Heimat- un Museumvereen Winsen (Luh) un Ümgegend, 1995, ISBN 3980303861
  • Roydorf: 1158–2008; ein Dorf im Wandel der Zeit. Heimat- un Museumvereen Winsen (Luh) un Ümgegend, 2008, ISBN 3980911543

Footnoten[ännern | Bornkood ännern]

  1. http://www.denkmalprojekt.org/2011/roydorf_stadt_winsen_wk1_wk2_ns.html
  2. Günther Hagen: Winsen (Luhe). Sutton Verlag GmbH, 1999, Sied 120
  3. Christoph B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 196: https://books.google.de/books?id=jN5QAAAAcAAJ&pg=PA196
  4. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 62: http://books.google.de/books?id=Q 5OAAAAcAAJ&pg=PA62
  5. C. H. Jansen: Statistisches Handbuch des Königreichs Hannover. 1824, Sied 522: http://books.google.de/books?id=tG0AAAAAcAAJ&pg=PA522
  6. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 104: http://books.google.de/books?id=eOI-AAAAcAAJ&pg=PA104
  7. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 134: https://books.google.de/books?id=qTZDAQAAMAAJ&pg=RA2-PA134
  8. http://www.gemeindeverzeichnis.de/gem1900/gem1900.htm?hannover/winsen.htm
  9. a b c http://www.verwaltungsgeschichte.de/harburg.html
  10. Die Geschichte der Chemiefabrik in Roydorf, Hamburger Abendblatt an’n 9. April 2002